دلوني كيف أتعامل معاه

1. المشكلة تتركز في حاجتين ::

السلام عليكم
كيفكم يا أحلى فراشات ؟؟
أعذروني بشارككم همومي وياريت إللي واجهت هالمشكلة ولقت حل تدلي بدلوها
أنا ملكت قبل 6 شهور والحمدلله أحس إني اتعرفت وفهمت خطيبي في أمور كثيرة ،،،، إلا شي واحد وهو إللي مكدرني ومخليني أشوف مستقبلنا ضبابي

المشكلة تتركز في حاجتين ::

الأولى إنه عصبي شوي بس الحمدلله للآن يمسك نفسه >>> وياخوي من المستقبل
الثانية إنه من طبقة ال ( هاي ) وأنا من طبقة ال ( باي باي ) ،،، يعني هم عندهم البنت تتدلل وتتشيك وترتز وكل شي يجيها لعندها ،، وأنا بحكم إني وحيدة أهلي فأنا ماسكة البيت من إلى وكمان ماسكة المقاضي و ... و ... و ............... ألخ
بعطيكم موقف صارلي ،، وبقكلم شعوري ،، وأبغى منكم النصيحة الله يبارك فيكم
::::: الموقف :::::
العماره إللي ساكنين فيها لنا ولله الحمد ،، وفي شقة فضيت من شهرين ولا اتأجرت للحين ... كل من شاف البيت قال يبغاله تصليح و ... و ... و ... ،، والمشكلة إنه أبوي كبير بالعمر ولا يقدر يروح ويجي ..
المهم قررت إني أعدل فيه قد ما أقدر .. جبت علبة بوية وبديت أجمل بعض الأماكن ،،، وبكل فخر أرسلت لخطيبي رسالة وقلتله إني أدهن بويه ...
طبعا لو قلت هالكلام لوحده من عيلتي كان طارت فرح بيه وقالت هذي والله الشاطرة
لكني انصدمت من ردة فعله
يقلي زوجتي أنا تدهن بويه ؟!؟!؟!؟!
مجنونه انتي ؟!؟!؟!؟!
دحين تطلعي من الشقة ,,,,,,,,,,,,,,,
إفرض دخل عليكي أحد ؟؟؟ >>> مع إني متربسه الباب
إفرض دخل بعيونك شي ،، >>> مع إني ما دهنت أماكن كبيرة وماخذه احتياطي ،، حتى الفرشه ماسكتها بإصبع ونص
لو سمحتي روحي غيري ملابس العمّال وبطلي هالحركات ................
لا والمصيبه يقولي ليه ما قلتيلي من أول ؟؟ أكيد خبيتي عني لأني بزعل >>> كأني أعلم بالغيب ،، ما كأني قلتله من باب الفخر بنفسي
طبعا حاولت أبلع عصبيته وقلتله حبيبي أنا أسوي هالشي عشان أبويه ،، وفعلاً هدي شوي
لكني مره متضايقة من الموضوع ،، كأنه يعايرني ،،، وكمان أحسه يشك فيه لمن قالي إفرض أحد دخل عليكي ،، يعني أنا هبله ما أقفل الباب على نفسي ؟؟؟؟؟؟
طيب يارب بالمستقبل كم تصرف ما بيعجبه ؟؟ وكم تصرف بيتسرع بالحكم عليه ؟؟ وهل بيكون تصرفي معاه كل مره ب ( بلع ) العصبيه والتخفيف من الوقف حتى لو كنت على حق ؟؟؟
المشكلة إني أخاف من عصبية الرجال وممكن أبكي بشكل هستيري وأزيد الطين بله ( كأني فعلاً عاملة عمله سودا )
قولتكم فعلاً الموضوع معايره .. أو شك ..
ولا أنا حساسه زيادة ؟؟؟
وكمان لمن يعصب أحس إني مرتكبه جريمة ،، مع إنه حرام طيوب ويهدى بسرعه ويعتذرلي كمان ،، بس أنا خايفه بيوم أعصب معاه وتصير خبيصه
من جد هالموضوع مأزمني لأنه في عدة مواقف صارت شبيهه بهالموقف وللحين ماني عارفه كيف أتصرف ...
بليز ساعدوني لأنه كل الناس تقولي بكره تتعودي وباقي ما شفتي شي
وأنا ما أحب التشاؤم ،، أكيد فيه حل