راتبي وزوجي

النصيحة لا تعطينه وجه وخليك على حالك وحاول تمسكين قرشك والله بكره أذا كبرو عيالك وتزوجوا ماراح ينفعك غير قرشك
عندي نظرية أن الرجا ل إذا عطيتيه وجه صار يتكل عليك في كل شيئ مثل حالة أمي المسكينة راتبها مايتعدى الستة وعليها السواق والبنزين والإقامة والشغالة مصروف المدارس وقاضي البيت وترميم البيت والعزايم والحفايل والهدايا والأخ الكريم الوالد مايمد يده إلا إذ اتكرم إلا بعشرة ريال في الشهر وإذا قلتيله عطني قال ماعندي شي والله شيئ يقهر .

أختي عطيه بس بالقطاره يعني شوي بس كل مره
وانتبهي يبدأ يستغلك يقول ابغى سياره ابغى اسوي مشروع
لاتعطينه والأفضل تستثمرين فلوسك فالبنك وتقولين ماعندي شئ

لا باالعكس يااختي المفروض تتساعدوا انتو بعض هذا حياتكم اثنينكم واكيد هو ماراح يطلب منك الا لمى يحتاج .. والمفروض قبل مايطلب منك تجي انتي من نفسك ..
وماعليك من الكلام الي يقولونه انه يعطيك مصروف على راتبك والله لو انه جالس على بنك مابيقدر ..
وهو له طاقته بيصرف عاالكل في البيت وانتي ماتدفي ولاشيء من راتبك مع انه اكثر منه ...
لازم تتساعدوا مع بعض هذي حياتكم اثنينكم وفي الاخير هو سند لك ومالك غيره ...
والقرار لك واتمنا تعتبرها نصيحه مني ..
تحياتي لك

حبيبتي الغالية النيرة ان زوجك هو اقرب الناس اليك فهو لا يبخل عليك كما قلتي في رسالتك فلا تبخلي عليه فحياتكم مشاركه بينك وبينه واذا كنتي باستطاعتك ان تحسني من وضعكم المالي فبادري انت لانه بيتك انت اولا ولكن بالحكمة
وربنا يوفقك ان شاء الله

بسم لله والصلاة والسلام على محمد وآله لاكرام
أختي والله لا اتخلين احد يدخل بينكم انتي اقعدي بينش وبين نفسش وفكري ويش الصح اللي لازم اتسوينه ادا زوجش يحبش ويحترمش والله الفلوس وسخ دنيا وزوجش الباقي لش اللي يسعدش ويضمش انتي واعيالش والله مهما كان لا اتخلين الفلوس طريق وعر في طريق حياتكم الزوجية السعيدة والله كل قولي له انت اغلى من هالفلوس اللي ما اكون بها سعيدة الا ادا كنت سعيدة معك وما بين فترة وفترة قبل لا يقول لش زوجش انه محتاج فلوس انتين حسي به وانتين اللي قولي حبيبي تحتاج فلوس والله ما تغلى عليك الفلوس وهكذا وان شاء الله تعيشون حياة زوجية سعيدة بعيدة عن المادة تملؤها المشاعر الدافئة والحنان ونسألكم الدعاء

السلام عليكم ورحمه الله وبركاتة
اختى النيرة"ليش كل هالقلق والله باعدك ان شاء الله اولا مش كل الرجال مثل بعضهم اكيد فى اختلاف فى رجل كريم حتى اذا معكى بديكى وبيزودك وفى رجل حتى معه فلوس الدنيا وما يرضى يسويلك شء وبيخاف عالقرش جدا لازم تعرفى زوجك هل يستحق فعلا ان تشاركة ام لا واعملى انكم انتم الاثنين تصبون جهدكم فى بوتقه واحدة الا وهى البيت وتربية الاطفال ومساعده زوجك شوى ممكن بشرط الا يسوء فيها ويبرطع هو بالمال ويتركك انتى تصرفى مدام اديتية الحق هذا حاولى اترفى بحكمه شوى يعنى ساعدية ولكن حسسية انك بتعملى كدة عشان البيت يصير لكن مش عشان هو واجب عليكى وحوالى الا يزعل واذا زعل انك ما بتصرفى عالبيتمثله ازعلى انتى منه وعرفيه كدة وقوليله انت الراجل وشغلى هدا اكيد اى شيء بيبقى من البيت بيحتاج يتشرى انا بجيبة من غير ما اقولك عليه.
هذا رايى ويارب اكون افدتك لكننى الحمد لله لا اعانى هذة المشكله لانى لا اعمل برضائى وبرضه زوجى طلب منى.
ام عبدالله

حبيبتي النيره، اللي انقال لك انقالي واللي تخافين منه خوفوني منه كثير.. بس فكري معاي.. دوامك هذا ما قاعد ياخذ من جهدك؟ مو قاعد يقلل من وقتك مع زوجك؟ مو قاعد ياخذ من تفكيرك حتى وانتي معاه؟
انسي انه زوج وانه اللي لازم يصرف وكذا، بس ترى الرجال مو بنك! الرجال انسان حاله حالك! يحتاج المساعده والحب والعنايه. اللي ما يخلينا نفكر كذا انهم ما يطلبون ولا يقولون. هل نعاقبهم على كبريائهم وعزة نفسهم؟ لا حبيبتي الله يهديكي! حاولي تتخيلين السيده خديجه رضي الله عنها لما سلمت الرسول صلى الله عليه وسلم كل اموالها بثقة عمياء. فكري كيف ظل يذكرها بالخير لاخر عمره الله يجمعنا وياه بالجنه قولي امين. انا ما اقول عطيه كل شي واقعدي عالحديده، بس ترى الحياة تعاون حبيبتي. انا راتب زوجي اكثر مني بكثير ماشالله، بس مع ذلك احب يكون لي دور معاه. مو صح ان كل فلوسك تروح البنك وكل فلوسه تنصرف! وبعد تبين منها مصروف؟ جمعو سوا واصرفو سوا وابنو سوا وعيشو سوا ياقلبي. والله الحياه تصير أحلى! وحده اعرفها مسويه مع زوجها بنود صرف كل واحد منهم عليه نسبه منها، حتى لطلعات المطاعم! وعندهم بعد بند توفير. وماشالله عليهم! الحين في سياره باسمها وسياره باسمه وبيتهم اللي زي القصر بنوه سوا يد بيد وكتبوه باسمهم هم الاثنين. كل شي بالعقل والتوازن يضبط ويصير مافي احلى منه صدقيني.. تحياتي

عزيزاتي الفراشات ألحين أنا راتب زوجي أعلى عني وبعد ياخذ مني كل شهر 2000 درهم لأن بياخذ له سيارة وأساعده ما أقول له شي وكنت راضية لكن حسيت إنهم ما ينعطون ويه لأن بدا يتمادى ويقول إذا بتزيدين الشهر إلي ياي من عندج بعد خير صح خيرني بس شفته يقول لي بعد عطيني نصف بيزات الإيجار من فستان عرسي ومصروف ما يعطيني لأني أشتغل صح راتبي يكفيني بس الواجب عليه النفقة وهو يدري إني أبغي أي مبلغ من النفقة حتى لو كان بسيط علشان أحس إني زوجة لكن قررت في داخل نفسي إني ما أعطيه ولا شي أنا أتعب مثل ما هو يتعب والواحد ما يعرف الدنيا اليوم إنتي اتساعدينه وباشر يروح يتزوج عليج بعد ما جمع وفاضت فلوسه فجمعي للمستقبل أخير لج لأن الرياييل هالزمن ما لهم أمان.

والله احس الحياة لازم تكون جذي تعاون ومدام مايبخل عليك بشي ليش لا ؟؟؟؟ انتو من لكم غير بعض وشنو راح تسوين بالمعاش اذا مايصر وقت الضيق اذا بلاها الوظيفه اذا عوار راس ع الفاضي صدقيني جذي الحياه اخذ وعطا زوجين متفاهمين مااحد يبخل على الثاني بشي شنو احسن من جذي ؟؟؟؟؟؟