زوجي تزوج بالسر ويبي اسامحه وانا مو قادره

1. السلام عليكم

السلام عليكم

اول مره اكتب مشكلتي لاني تعبت من التفكير وابي نصايحكم ولو كنتو مكاني وش تسون
انا متزوجه لي عشرين سنه تزوجت وانا صغيره عمري 15 سنه كان زوجي كل شي بحياتي وكان لي الاخ والاب والصديق والام والاخت يحن على يراعيني صبر علي شجعني اخلص دراساتي رزقني ربي بالعيال كان مبسوط مره عشت عشرين سنه معاه ماعمره زعلني ولا قصر معاي ولا يخليني انام بيت اهلي بحجه انه ما يستغني عني كانت حيانتا ينضرب فيها المثل عيالي ما شاء الله متفوقين وما قصرنا في تربيتهم
جاني يوم من الايام ( وهذا اكره يوم في حياتي ) قالي بسافر لدبي انا استغربت قلت له وش عندك قالي واحد من اصحابه بيروح ياخذ له اجهزه لانه بيتزوج قريب ودبي اسعارها ارخص وقالي اروح معاه انا قلت اوكي قالي وش تبين اجيب وش الي ناقصك وقالي جهزي لي شنطتي انا جهزت له شنطته وسافر الصباح كلمتني امي المغرب قالت لي تعالي البيت جلسي معانا انا قلت لها لا بجلس في بيتي قالت لي تعالي تعشي معانا ورجعي بيتك انا رحت بيت اهلي وبعد العشا فاجئني اخوي يقولي زوجك تزوج اليوم قالت له ها قالي زوجك تزوج ورسل لي رساله اخبرك قالت من جد ولا تمزح معاي وعطاني جواله وقريت الرساله بنفسي هنا بغيت اجن ليش سوا كذا وش قصرت معاه وليش وليش جاني شعور وما قدرت ابكي كتمت في قلبي وقلت لولدي خلنا نروح البيت امي ما رضت اروح خايفه اسوي شي في نفسي وراحت معاي اول ما دخلت بيتنا ورحت لغرفتي جلست ابكي بقوه حتى عيالي خافو ماقدرت اكتم جلست امي تهدي فيني ولين نمت ويوم ثاني جاو لي خواته وجلست معاهم وكلموني انا اجلس عشان العيال واتحمل .. صدقوني الكل هذيك الليله ما نام ومستغرب ليش تزوج
والي قاهرني اكثر وشلون خطب وانا مو حاسه ليه يستغفلني والله العظيم ما حسيت باي تغير اتجاههي ولا يطلع ولا يغيب عن البيت متى خطب وملك ما ادري
غاب يومين ورجع لنفس المنطقه الي ساكنين فيها ولا فكر يجي لنا ولا يسال عن عياله ولدي الكبير يشوف ابوه ولا كانه يعرفه شافه مره في الاشاره ومره في السوق ولا يكلمه ولا شي
جا البيت بعد ما قضى شهر العسل اول مادخل فرحوا العيال ( لانه مدلعهم ومتعلقين فيه ) سلموا عليه دخل الغرفه واناداني وقالي انا تزوجت وخلصت لا تفتحين موضوع ليش تزوجت وانتي موجوده في البيت عشان العيال بس مالك اي حق عندي فاهمه واذا ما تبين روحي بيت اهلك . انا استغربت وابتسمت قالته وربي عينك قويه فوق الي سويته جاي تهدد مثل ما تبيني انا بعد ما ابيك وما يربطني فيك الا العيال .
والله لو هم مب اولاد كان ما جلست دقيقه معاه بس المشكله كلهم اولاد وتعرفون الاولاد ماقدر لازم ابو يربيهم
جلسنا على هذا الوضع شهرين يوم يجي البيت وعشره لا حتى العيال تعبو وهم يسالون عنه و خلاص بطلوا يسالون وتعودوا على الوضع عندي بنت عمرها ست شهور وكان ميت عليها ويحبها ومن تزوج ولا يسال عنها ولا يشوفها بعد شهرين جا يتغرب ويطلبني قالت له نعم وش بغيب نسيت كلامك الي قلته لي ما تبيني ومالي اي حق قالي انا اسف قلت له ما ابيك وصار يجلس كثير في البيت وانا زاد كرهي له ما ابيه بس عشان العيال وما اخليه يقرب مني وحتى وانا ارضع بنتي اغطي يقولي ليه انا غريب عنش تغطين اقول له اخاف العيال يجون المهم اصرفه ما اعطيه مجال يسوي شي
الحين جالي ندمان ويتعذر وانا اقول له عذرك مو مقبول يقول لي وش يتبي وش يريحك اسويه تبيني اطلقها انا مستعد انا قلت له ما ادري روح لها ما ابيك وقسم بالله جالس يبكي وندمان ويذكرني بالعشره الي بينا انا قلت له منو الي نسى العشره وباعني من غير سبب
الحين حالته حاله ويبني اسامحه وترجع حياتنا مثل اول دخل خواته في الموضوع عشان يكلمون وانا مو قادره انسى ليش سوا كذا فيني
انتظركم خواتي وشلون انسى الي سوه واسامحه مو قادره