زوجي وأهلي

السلام عليكم جميعًا , حابَّة
أستشيركم بشغلة لأنّو صعبة جداً أحكي لأحد أعرفه عنها : (
المشكلة هيّ زوجي وعلاقته بأهلي !
لي 6 اشهر متزوجة .. بس زوجي جداً جداً رسمي مع أهلي , من العيد للعيد يشوفهم إلا إذا كان فيه مناسبة طبعاً أو أحد عزمه !
أيام العيد أنا أقوله إذا مرّ عليّ ادخل عايد أمي وأبوي ! وأرسلّه رسالة أذكره بأنه يعايدهم !
والا لوّ عليه ما كان فكّر يسويها !
أنا ماعندي مشكلة لو كان رسمي معهم بس نفس الشيء أنا رسمية مع أهله !
لا !
العيدين أول سنة رايحة من صبح الله أعايد أهله وأروح اجتماعهم ! العصر رحت أعايد أهلي لأن فيه نوم وأمي بترجع الظهر موفاضي!
كل أسبوع كل أسبوع لازم لي يوم أروح معه نتعشى مع أهله .. ولو ماناسبني اليوم , غيّروه بس مايفوتني أسبوع بدون ما أشوفهم !!
لدرجة أحيانًا يقولّي ليه ماتروحين معي نسلّم ع أهلي بوسط أسبوع مع أني رايحة لهم قبل كم يوم خخ
عزايمهم يلزّم عليّ بقوة إني أروح !
آخرتها وآخر موقف صراحة صدمني منه ..
هو أنا لسّه أهلي ماعزمتهم ببيتي !
طبعاً أهله من فترة عازمتهم ! وأمي يا بعد قلبي مسوية كل شيء .
المهم قلتله إنو أهلي لسه ما شافوا البيت أبغى أقولهم الاربعاء .. ماخالف ..وعزمتهم ولزّمت ع أساس عزييمة!
بعدها قاللي إنو صعبة ومدري إيش ودوامات ..
شوي اتصلَت عليّ أمي وقالت إنو يناسبني وكذا ..
لمّه قلتله .. عصّب وجلس يهاوش مو أنا قلتلك تقولين لهم يوم ثاني غير الاربعاء !
أنا ماني فاضي أتمشور لك وأنا راجع من الدوام !
بعدها هدى .. قال ياللا إيش تبغين قوليلي من الحين إيش تبغين !
صرااحة ..
مررة انصدمت خنقتني العبرة .. جلست أصيح اصلاً حتى من الصدمة جلست أعاتبه ليه تصرخ عليّ وهو ماصرخ أصلاً خ
يعني الناس هذولا أهلي ! أنا حاشمة أهلك ومقدرتهم وعازّتهم ليه كذا ؟حتى ما تقدر تستغني عن ساعة بالعصر بدل النوم عشاني أنا مو عشانهم ! كلّها هذا اليوم !!
طبعاً اعتذرت من أهلي ومرة انحرجت منهم جداً والله .. يعني من نص ساعة داقة وملزمة ومستعدين والخ الخ بعدها أعتذر ! هذولا أهلي : (
اللي محزنّي هو إنو علاقة أزواج أخواتي - ماشاءالله - كويسة مع أهلي يزورونهم دايم .. يعني كلها دقيقتين لا مرّوا ع أخواتي نزلوا وسلموا !
يكلمونهم يعزمونهم يلزمون عليهم !!
وأنا يا حظي أول مرة الناس بتجيني ببيتي وصارت مشكلة !
لا والموقف اللي صار توّ بجد نرفزني .. هوّ اتصل أبوي ع زوجي وباركله ع شغلة صارت له .. المهم قالله ابوي مشتاقين ومانشوفك ومدري إيش ..
بعد ما أنهى المكالمة من ابوي اتصل عليّ قال إنتي عزمتي أهلك بكره !! إن أبوك قاللي إنّو نبغى نشوفكم ومدري إيش !
أبغى من خبرتكم يا بنات ..
كيف أتصرف أنا والله ماعندي خبرة !
أصارحه بإني حاشمة أهلك ف اعمل زيي ما أعمل ؟ بس أحس إني بكون إنسانة منّانة : (
ما أعرف ما أعرف والله إيش أسوي :(
كل اللي ابغاه زوج يقدر أهلي ,, وهو مو مقصر أخلاقه كويس ولا قصر علي بشيء بس مرة هذا التصرف مضايقني منه . جداً :"(
وأبغى أفاتحه بموضوع الزيارة الأسبوعية لأهله ! أحس مالها داعي بس مادري شلون اقولها !
أشوف أغلب البنات تزور أهل زوجها متى ما فضوا وكذا يعني مرة يالشهر مثلاً أريح لهم والزوج يروح باستمرار بشكل شبه يومي !
لأن صراحة مرة متعب كذا : (