زيت رهيب لمن تعاني من تساقط الشعر

مرحبا يا أحلى فراشات
عندي لكم زيت رهيب يقلل تساقط الشعر وبشكل ملحوظ من أول استعمال...
نبدا القصة من البداية
زمان لما كنت صغيرة كان الكل يحسدني على كثافة شعري
ما شاء الله...... ما شاء الله.... ما شاء الله....
كنت لما امشط شعري أتعب لأني ما أقدر ألمه بسهولة
وما كنت أحصل ربلة أو شباصة عدلة لشعري
المهم... كبرت ملوكة الصغيرة... وبدأ شعرها يتساقط
وأقول لكم شي بعد... انا أعتقد أن الصلع وراثي في عائلتنا... شي فضيع ما أقدر أفكر فيه
أذكر أني يوم من الأيام كنت في الكوافير مع أختي والكوافيرة وهي تسرح شعر أختي لاحظت أن شعرها
يتساقط بشكل فضيع... فقالت لها ان إذا تم شعرها يتساقط بهذا المعدل رايحة تصللع عن قريب....
بصراحة أختي خافت... وأنا عصبت على الكوافيرة.....
ومن يومها ما رحت لها مرة ثانية
على الأقل كان بامكانها تتكلم بطريقة أفضل وتقلها انها محتاجة مثلاً لزيوت أو كريمات تخفف من تساقط الشعر
مليتوا يا بنات..... ما عليه تحملوني.... تراني يوم أكون مستانسة ألعي كثير
من كم أسبوع شفت خلطة لفراشة من الفراشات بهذا المنتدى الله يجزاها الف خير
وحسيت ان شكل الخطة رهيبة
ما كذبت ملوكة خبر... كتبت الوصفة بورقة وعطتها للدريول علشان يشتري المكونات...
طالعني الدريول وقالي وهو يضحك.... شو ناوية تطبخين..(كانه يعني ما يعرف اني غشيمة بالطبخ... والله فشلة)
قلت له ايوه ناوية اسوي طبخة في شعري
دريولنا هذا معنا من يوم كان عمري شهرين... فلا تستغربون اني اتسولف معه عادي
المهم سألني شو تسوي هذي الخلطة... فقلت له انها تغذي الشعر وتمنع تساقطه
فخبرني الرجال عن زيت تستخدمه زوجته وصارلها مده ... وخفف عندها التساقط وصار يطلع لها شعر جديد
بتستغربون ... هندية وشعرها يتساقط... هم دائما يزيتون شعورهن فكيف يتساقط؟؟؟؟
لا تستغربوا... المسكينة من سنين تعاني من مرض في الكبد... وتاخذ علاج ينظملها عمل الكبد والمفروض انها تستخدمه مدى الحياه ما تقدر تستغني عنه... الله يعينها ويشفيها
قولوا آآآآآآآآآآآآآآآمين
وهذا الدوا له مضاعفات كثيرة منها ضعف وهشاشة العظام.... وتساقط الشعر.... وشغلات ثانية ما أعرفها
المهم قالي انها صارت تستخدم زيت موصيين حد يجيبلهم من الهند وصالها مده تستخدمه وشعرها في تحسن كبير
عاد ملوكة افتر راسها... كيف تجيب هذا الزيت من الهند... عاد ما استحيت وقلت له اي حد من طرفكم جاي من الهند خلي يجيبلي معه درزن من هذا الزيت....(شو بفتح دكان زيوت؟؟؟؟)
قالي بجيبلك شوي من عند زوجتي تجربينه أول ... بعدين يصير خير في الدرزن... لأنك يمكن ما تحبي ريحته
عاد هذي المرة استحيت... وشلون أخذ من الحرمة زيت هي تحتاجة أكثر مني
فقلت له لا لا خلاص ما في داعي بجرب اي شي ثاني
المهم شكله الريال عرف اني مستحية آخذ الزيت من عند حرمته
فقالي انه بدور عليه في المحلات الي تبيع أغراض الهنود
شكلي طولت عليكم وايد... ليما الحين ما قلت لكم اسم الزيت
وسكت شهريار ما أدري شو عن الكلام المباح.... كملوا من عندكم
شوي شوي يا بنات لا تفروني بالطماط
تراني ما بكمل
خلاص خلاص قربنا نخلص
المسكين دور وتعب ليما حصله وجابلي الزيت
اسمه بالإنجليزي
Dhathri
ما أدري اذا كنتوا سمعتوا عنه من قبل؟؟؟؟؟
لون العلبة أخضر وفيها صورة وحدة هندية شعرها أسود يهبل....(كالعادة...)
بريال وثمانمائة بيسة (السعر بالريال العماني... كل وحدة تحسب المبلغ حسب عملة بلدها)
وهو زيت من الأعشاب للعناية بالشعر
تصدقون على كثر حماسي في البداية اني استعمله إلا إني تركته لمدة اسبوعين كل يوم أشوف عليه وأقول ان شاء الله اليوم بستخدمه وبعدين أنساه
ليما البارحه كنت أتكلم مع اختي إلي كلمتكم عنها في بداية القصة....(قصة قبل النوم... أخاف انكم نمتوا من كثر لعياني)
وكنا نشوف دعاية في التلفزيون عن زيت يمنع تساقط الشعر... وجلست تشوف على شعرها بحسرة وتقول لي شوفي كيف صار شعري ما بقى منه إلا شعرتين
عاد أنا يوم انتبهت لشعرها خفت لا يصير فيني إلي صارلها.. وقلت في نفسي احسن لي اتلاحق على عمري قبل ما اندم بعدين
زيت شعري بالليل ونمت
وصحيت الصبح وغسلت شعري
والله العظيم يا بنات ما أكذب عليكم فرق كبير
كنت زمان لما أغسل شعري نصه يطيح الله يعزكم في الحمام
والنص الثاني وانا امشط شعري بعد الغسيل
تصدقون..... وأنا أغسل شعري ولا شعرة طاحت!!!!!!!!!!!!!!
تميت أطالع بشعري مو مصدقة وقلت لازم أعمل له اختبار للمتانة... تعرفون ان الشعر يكون ضعيف وهو مبلل وسهل انه يطيح...
فعصرت شعري من الماي وسحبته علشان اشوف إذا بيتساقط
تعرفون كم شعرة طاحت بعد ما سحبته
ثلاثة
3
3
3
3
والله يا بنات.... ثلاث شعرات بالعدد بس
شي رهيب فعلاً
الي تجيب الزيت بتحصل التعليمات وطريقة الاستعمال مكتوبة
واي استفسار ثاني من الفراشات الحبوبات تراني جاهزة وفي الخدمة
بس عاد يا بنات... تعرفون اليوم الجمعة... وحلات الجمعة انها تجمع الأهل والأحباب
يعني إذا تأخرت عليكم في الرد لا تعصبون... كل وحدة عندها استفسار تكتبه وان شاء الله أرد عليها في أقرب فرصة
وآسفة مرة ثانية على الإطالة
أختكم ملوكة