ساعدوني الله يخليكم عروسه ومره مضايقه

كيفكم اخواتي انشالله بخير انا دايما اتصفح بالمنتدى وسجلت لانكم اخواتي ومالي الا الله ثم انتم تساعدوني
مشكلتي ماعندي تلفزيون في البيت اكيد كلكم مستغربين بس اه مو بكيفي بشرحلكم القصه بالتفصيل
انا توني متزوجه مالي شهرين من ولد خالتي وهو انسان ملتزم اول يوم زواج استغربت انه مافي تلفزيون بس سكت لاني لسا مستحيه بعدها بثلاثة ايام قلتلوه ابغى تلفزيون طفشانه قلي ماراح اجيبه قلتله ليه لازم تجيب ما اقدر اعيش من دونه انا مره متعوده عليه ليل نهار قالي الا تقدري وحتتعودي مع الشغل و مع الاولاد مره ثانيه بتنسيه قلتله مو كل شي في التلفزيون مو تمام قال انا عارف بس شره اكثر من خيره وهو كان زيي مدمن عليه بس قبل خمسه سنين بطله يعني اتعود والله وقتها حسيت نفسي مقهوره وحنفجر من البكاء بس مسكت نفسي قلتله بحاول
بعدها بثلاثه اسابيع كلمته قالي احلمي يدخل بيتي وقتها زعلت مره ومانمت طول الليل بعدها رحت عند اهلي زياره واخويا اعطاني سيديهات افلام صرت اتفرج عليها لمن يروح العمل بس لمن يرجع يسكرها يقولي انا اخليكي عشانك متعوده عليها بس مع الوقت بتبطليها
وهوا يتفرج من النت الاشياء اللي يحبها وثائقيه ومصارعه وافلام كرتون مع انه المصارعه سمعت انها حرام عشن لبسهم وكذا بس هو عنادي مره مره قلي بخليكي تبطلي الافلام قلتلوه وانا بخليك تبطل مصارعه قلي عادي اقدر ابطل بعدها صرت اسكت ماابغاه يصير مشدد مره ومره كنت اتفرج باب الحاره واهل الرايه وقعد يتفرج معايا يقولي بس اشوف عشانك ولاانا ماابغى والله حيرني
اخر شي قبل اسبوعين فتحت معاه الموضوع قالي سكري الموضوع مافي يعني مافي تبغي بجيبلك اسلامي قلتله اش ابغى فيه كله رجال الاسلامي انا ابغى اشوف حريم قال مافي وهو يتكلم ببروده وحتى لو كلمتي امي ولا ابويا او اي احد مافي يعني مافي وقتها انفجرت بكي وعصبت انقهرت اني اتزوجته قلتله يليتني كنت عارفه من قبل ماكنت ازوجتك قلي محد بيأيدك لانه مو سبب تبطلي عشانه وهوا زعل من ذي الكلمه وربي مااكذب عليكم فكرت بالطلاق قعدت يومين زعلانه وابكي ولااعبره قلت يمكن يجيبلي وهوا عادي لامبالاه
رحت عند امي واخواتي وقلتلهم كلهم ضدي وامي تقولي احمدي ربك شوفي البنات اللي يطلقوا اكثرهم عشن ازواجهم بدون دين واخلاق وانتي تطلقي عشن تلفزيون قالولي اصبري عليه وبالاخير بيسويلك فكرت اكلم امه لانه يسمع كلامها مره بس قالولي لاتكبري المشكله بعدين بيعاند اه بس ومن وقتها ليا اسبوعين ساكته بس احمل من النت مسلسلات واتفرج بس وربي تعبت مااقدر اعيش كذا اخاف مايسويلي طول عمري حتى اجلت مسألة الحمل عشن ذا السبب ولو فكرت اروح بيت اهلي ماراح ارتاح بضايق زياده لان حريم اخواني في البيت واطفال وازعاج غير انهم يفرحو لما يعرفو اني زعلانه
اللي مصبرني انه هوا مره طيب معايا وعلى دين واخلاق ويحبني مره مره ويعتذرلي اذا غلط وكريم بس هذا الشي اللي مضايقه منه
وكمان هوا من النوع اللي ممكن يقتنع بالشي اختي تقولي اشرحيله بشويش وفهميه وبيقتنع بس انا علطول ازعل واقعد ابكي ما اقدر اكلمه بهدوء طبعي عصبيه مره وازعل بسرعه وحساسه
ساعدوني يااخواتي الحكيمات احسها مشكله كبيره كيف اتصرف ايش الحل الله يفرج همومكم ويحققلكم اللي في بالكم والله مره محتاجه نصايحكم