سوالف خاصه للمتزوجين تموت ضحك

رجعتلكم بشتياق يااحلى فراشات قلت علشان كذا ابي احط شي يونسكم
[1)
زوجين متدينين
الزوج : إني أحبك في الله
الزوجة : وانا بعد أحبك في الله استغفرالله من كل ذنب عظيم
الزوج : بكل صلاة ما أنساك من دعائي
الزوجة : بارك الله فيك وجزاك الله خير
الزوج : شكثر تحبيني ؟
الزوجة : عدد ما غرد طير وطار وتعاقب الليل والنهار ودعاء داع في الأسحار
الزوج : الله يا سلام على هالكلام ذكرتيني بليالي رمضان
الزوجة : متى نروح العمرة ؟
الزوج : قبل أسبوع كنّا في العمرة !!
الزوجة : اجل نغير نروح المدينة
الزوج : على بركة الله
قبل لا يقومون من القهوة
الزوجة : أبا عبيدة
الزوج : نعم يا أم عبيدة
الزوجة : دعاء كفارة المجلس ( كله حب شكت أم عبيدة )
الزوج : سبحانك الله وبحمدك أشهد أن لا إله إلا أنت استغفرك وأتوب إليك
(2)
زوجين صايعين
الزوج : تصدقين ما حبيت وحده كثرك
الزوجة : وانا بعد حبيت بس مثلك أبد ما حبيت
الزوج : انتي خليتي حياتي كول
الزوجة : وااي انت ستايل وتهبل تشبه توم كروز
الزوج : تذكرين أول مرة شفتك فيها وين ؟
الزوجة : اي كنت أقز مع سبيك بالمارينا
الزوج : الله كان أسعد يوم بحياتي
الزوجة : شكثر تحبني ؟
الزوج : كثر جمهور نادي القادسية
الزوجة : ترى ذبحتني بنادي القادسية يلوعون الجبد
الزوج : يا عمري انا أشجع نادي القادسية عشان لونهم يذكرني بضروسك
الزوجة : اجل تدري ليش أنا أشجع نادي العربي ؟
الزوج : ليش ؟
الزوجة : عشان ريحة البصل تذكرني فيك
الزوج : الله عسل عسل دمك شربات
الزوجة : قوم قوم قبل لا أقط الرقم على اللي كاشخ وراك
(3)
زوجين ضغاط
الزوج : تصدقين بيوم عرسنا كنت خايف حدّي !
الزوجة : انا كنت خايفه عليك بعد
الزوج : كنت خايف أبوك يفشّلنا وينشب من البوفيه حق بيتكم
الزوجة : نعم نعم ؟
الزوج : أتغشمر معاك شفيك !
الزوجة : اجل ما شفت أمك واهيا تتعلك خفت عليها يطيح حنكها
الزوج : عاد ما أرضى على أمي
الزوجة : حتى انا ما أرضى أبوي
الزوج : أخوك الكبير بأي محل برْدات مفصّل دشداشته ؟
الزوجة : يمكن بنفس المحل اللي فصلت فيه أختك مو متأكده
الزوج : تذكرين خالتك لابسه كعب ثلاث طوابق
الزوجة : اي تذكرت لما كانت واقفة يم خالتك اللي حاطه حمره تقول شاربه شاني
الزوج : تصدقين أحلى ما فيك بالعرس النفره اللي طالعه بيجبهتك
الزوجه : وااي انت تهبل بالشعر اللي طالع من أذونك
الزوج : شرايك نمشي ونكمل سوالف بالطريك ؟
الزوجة : على راحتك حبيبي
(5 )
زوجين أغنياء
الزوج : أقول حبيبتي شرايك بغدانا أمس في فينيسيا ؟
الزوجة : بصراحة القعدة حلوة بس أكلهم مو زود
الزوج : انا بصراحة عجبني أحسن من مطعمنا في روما
الزوجة : انزين انا رايحة باريس تمورو بتسوّق تبي شي من هناك ؟
الزوج : متى بترجعين ؟
الزوجة : ما أدري على حسب يمكن توو دييز وأرجع
الزوج : خذيتي مليونك من أبوك ؟
الزوجة : وييه الله يعافيك روح أخذه ما يمديني
الزوج : عياجل بأي حساب بتتسوقين ؟
الزوجة : ما عليه بصرف من حساب خلودي ولدي فيه 300 ألف
الزوج : عاد رديهم له مو تنسين حرام فلوسه يبي يستانس فيهم الولد
الزوجة : انت وين بتروح في هالويكند ماي سويت هارد ؟
الزوج : ودي أروح معاك بس مواعد الوليد بن طلال عازمني على العشا بكره
الزوجة : اوكي انا بسافر بالطياره الرمادية عبّيتها بانزين ؟
الزوج : اي فيها بانزين أكيد وانا بروح باليخت مالي ودي أحدق بطريق الرده
الزوجة : قود نايت حبيبي وسويت دريمز
الزوج : قود نايت ماي سويت هارد
(6)
زوجين صواريخ
الزوجة : ما قلت لك يوم طاحت فينا الطيارة هذيك السنة ؟
الزوج : مرة ثانية ؟
الزوجة : اي مرة ثانية يوم أمي تعلقت بجناح الطيارة وطارت عبايتها
الزوج : اوف اوف اوف صدق والله !!
الزوجة : أمي مسكينة ايدها تعبت وهدت جناح الطيارة
الزوج : وبعدين ؟
الزوجة : الحمدلله ما صار فيها شي أبوي لحق عليها بالبرشوت
الزوج : الحمدلله والا بغت تروح فيها مسكينة
الزوجة : انا من الخرعة طبيت بدون برشوت وبدون ولا شي
الزوج : وبعدين ؟
الزوجة : لقيت أبوي بالسما مع أمي قلت لهم لحقوني
الزوج : سبحان الله شوف الصدفة
الزوجة : اي انا عقبها حرمت اركب طيارات
الزوج : انا مرة بغيت أموت يوم كنت أسوق سيكل وطحت فيه من الجسر
الزوجة : اسم الله عليك وبعدين ؟
الزوج : الحمدلله اني طحت على ساعتي ما تعورت
الزوجة : وليش طحت من السيكل ؟
الزوج : انا كنت دايس تقريبا 200 فيوم صعدت الجسر لف السيكل فيني
الزوجة : وبعدين ؟
الزوج : كان أتصل على الاسعاف يمكن بالطيحة أتعور لا سمح الله
الزوجة : هذا وانت طايح من السيكل وتتصل ؟
الزوج : اي وما وعيت والا أدعم الصبّة مالت الجسر وأطيح من فوق
الزوجة : وبعدين ؟
الزوج : كان أحط التلفون بمخباتي ولبست ساعتي
الزوجة : جنّه صك علي .. اي كمّل
الزوج : كان طرباخ وإلا أطيح على ساعتي وتكسرت والا الاسعاف وصلوا
الزوجة : الحمدلله على السلامه
(7)
زوجين صغار
الزوج : تصدقين خلصت المرحلة الأخيرة بهاللعبة ؟
الزوجة : يه انا من زمان خلصتها .. ألحين عندي لعبة جديدة
الزوج : أقول دقي على هارديز اطلبي لي هابي ميل
الزوجة : اي حتى انا مشتهية هابي ميل يوزعون معاها لعبة شريك
الزوج : وإذا دق علي البطّه قولي له مو موجود
الزوجة : انزين قوم خل نكمل بلاي ستيشن
الزوج : لحظة متابع حلقة سلاحف النينجا ألحين بتطلع على سبيس تون
الزوجة : شايفتها هالحلقة مو حلوة
الزوج : عاد لاتخربين علي يوم طلع البوكيمون ما خربت عليك
الزوجة : خلاص خلاص لا تزعل بعدين تروح تنادي أمك
الزوج : ترى والله أحاربك من صجي
الزوجة : عطني كبوسي مالي انا شريته
الزوج : يعني نحاسه .. انا أوريك بس يخلص البوكيمون
( 8)
زوجين شيّاب
الزوج : انا بعرف الدكتور مالي ما يفتهم مدمّغ ؟
الزوجة : هوْهوْهوْ شفيك يا بوصالح أمس تمدحه واليوم تذمّه ؟
الزوج : يا ام صالح الدختر أثولْ ما يفتهم شعرّفه ؟
الزوجة : ألحين صار كودني ما يفتهم ؟ صج منكر حسنه !!
الزوج : ما يدري إن هاللي قاعدة جدامي اهيا علاج السكري والضغط وأمراض الدنيا
الزوجة : يمّه منك عيّار ما تيوز عن سوالفك يا بوصالح
الزوج : انتي لو في منّك وايد كان سوّوهم ابرّ حق المراضى
الزوجة : ذكرتني بأيام أوّل يوم تقص علي في بيت أبوي العود وتغازلني
الزوج : آآآآه يا زينها من أيام
الزوجة : انا كنت أطلطل من الدريشه وإلا أشوف هالحافي العصل المهتمل اللي دخل قلبي من أوّل نظره
الزوج : اي هذا انا عدل عدل .. في السكة مع عيال بن نخّي نعلب تيلْ
الزوجة : شكنت تسوي ما عاد أذكر شي !
الزوج : يوم أدز اختي الصغيرة تقولك غطاوي وانتي طاقتك البوهه
الزوجة : يا علّك شقول ذكرتني " إذا تلّيت حزامه تهلهلت عظامه " !!
الزوج : وانتي تقولين الجندل شكو
الزوجة : شعرفني بالغطاوي هوْ غصب ما عرف ما افتهم
الزوج : هذا اللي علقني فيك أكثر
الزوجة : قوم قوم روح يعطونك ابرة السكر الظاهر ارتفع
الزوج : هذا يزاي أتغشمر معاك وألاغيك
الزوجة : يمه منك جمبازي
(9)
زوجين نكته
الزوج : يقولك في مدرس سأل الطلبة اللي غبي يوقف .. كان يوقف واحد سأله المدرس ليش وقفت ؟ قال ما حبيت أشوفك واقف بروحك يا استاذ :>
الزوجة : يعني دمك خفيف ؟ اسمع : في مرة واحد دخل السلك الدبلوماسي تكهرب هاهاهاها
الزوج : يخرب بيت الملاغه سمعي : كلب شوارع مر على مركز شرطة شاف كلب بوليسي قال : آآخ لو مكمل دراستي ههه
الزوجة : ترى صج صج دمك ثقيل اسمع : في واحد قاعد يطق الدجاجه مالتهم ليش ؟
الزوج : ليش ؟
الزوجة : يقولها كل يوم بيض كل يوم بيض ما في جبن .. هي هي هي
الزوج : ملاغه جذي ما شفت سمعي : في ياهل عمره ثلاث سنوات قال حق أمه الحامل شنو في بطنك ؟ قالت له : هذا أخوك الصغير ...
الزوجة : هاهاهاهاهاها
الزوج : لحظة ما خلصت يا الغبية !!
الزوجة : اوكي
الزوج : قال لها : تحبينه ؟ قالت له : اي أحبه .. قال لها : عيل ليش بلعتيه ؟
الزوجة : خلصت ؟
الزوج : يالله الحين الناس يضحكون
صدق الحياة قسمة ونصيب