شريتي شادو لونه باهت و متوهقة فيه تعالي اعلمج شلون تطلعين لونه و بالصور

مرحبا حبوبات شلونكم؟؟ شمسويين ويا البرد و الامتحاناات؟؟ الله يوفق الجميع و ننجح بنسبة حلوة
اليوم طبعا بدل ما اجابل كتبي و ادرس طرا على بالي احط موضوع ((طبعا الاهتمام بالبشرة و الميك اب و المواهب كلها تطلع ايام الامتحانات))
المهم تذكرت طريقة تعلمتها من فترة و عجبتني
كنت دايم اتوهق لما اشتري شادو و يطلع فاشل و لونه باهت.. كلما حطيت مايطلع اللون و حتى لو طلع ساعة و يروح
عاد مرة كنت اشوف دروس مكياج على يوتيوب و شفت البنت تسوي هالطريقة و عجبتني
بعد ماتحطين الاساس خذي شادو ستيك ((يعني قلم شادو)) من اي ماركة حتى الماركات الرخيصة تنفع.. انا استخدمت ماركة مكياجي و NYX.. ترا هالماركة حلوة الوانها قوية و سعرها رخيص تلاقونها في لايف ستايل.. و بعد MAC تلاقون عندهم شادو ستيك بكل الالوان..
المهم الالوان الي نحتاجها... اسود .... ابيض... و اذا توفر عندج من نفس لون الشادو الي بتحطينه يكون افضل ((بس لو ماعندج الابيض و الاسود يوفون بالغرض و يصلحون لكل الالوان))
و ممكن تستخدمين كونسيلر ثقيل ((يجي مثل الاصبع)) .. و اذا تبين شي بروفيشنال اكثر في شغلة اسمها PAINT POT تلاقينها عند MAC تستخدم كاساس للشادو خذي منه الالوان الثلاثة الاساسية((ابيض و اسود و بيج))
عموما تجيبين الكونسيلر او الشادو ستيك و تحطينه على الجفن مباشرة (( اذا بتستخدمين اسود بس حطيه على الجفن المتحرك اما الابيض و الكونسيلر ينفع للجفن كامل و ممكن تحطين اسود عالمتحرك و ابيض عالثابت ))
و بعدين تجيبين الشادو الباهت الي عندج و تحطينه على الشادو ستيك باستخدام فرشاة او اسفنجه الشادو.. بس خذيها قاعدة لما توزعين الشادو البودرة وزعيه بطريقة الطبطبة او التربيت مع الضغط يعني لاتمسحين الفرشاة لان اللون ماراح يمسك..
طبعا في الصور شايفين شلون لون الشادو الاصلي يادوب يبان عالبشرة و شلون لونه يطلع لما احط تحته شادو ستيك او كونسيلر
ولا تخافون صح الشادو ستيك لونه اسود بس لما تحطين الشادو الملون فوقه ماراح يبان اسود بيطلع غامج ((خصوصا مع البيقمنت من ماك الكل ملاحظ انه مايثبت استخدمي تحته شادو ستيك اسود و شوفي اللون شلون يطلع روعة)) عاد في الصورة طالع اسود و العتب على الكاميرا و الاضاءة
و طبعا اللون الاسود يصلح كاساس للالوان الغامجة و الفاقعة مثل البنفسجي و الازرق و الاخضر و البيقمنت الي فيه لمعة
و اللون الابيض يبرز الالوان الفاتحة مثل الموف و الروز و الاصفر و يصلح للاضاءة تحت الحاجب يبرزها و يثبتها (( بس ماقدرت احط لكم النتيجة مع الالوان الفاتحة لان كاميرا تليفوني تصويرها سخيف و ماتطلع الالوان عدل))
اما الالوان الترابية و درجات البني و الذهبي نستخدم تحتها الكونسيلر
طبعا التصوير مثل مانتو ملاحظين فاشل لانه بكاميرا التلفون.. و الاضاءة تعبانة في غرفتي
بس جربو الحركة و شوفو النتيجة بنفسكم