شوفوا عطارين اوروبا شلون محلات lush العالميه تابع لموضوع دمعة عمري

مرحبا بنات
انا شفت موضوع دمعة عمري واعجبني حيل وقلت اكمل عليه عشان تستفيدون اكثر
وهي ماقصرت نزلت لكم صور روعه
بس ترى هذا سر خطير للي مايعرفونه
تدرون وين اول ماكتشفته
تخيلون وين ههه
في مطار هثرو ببريطانيا ههه
ادري بتستغربون وش جاب العطار بهثرو
بس هذا اللي صار كنت فيه ترانزيت
ولقيت شي مهوب شي
العجب والعجاب دخلتني ريحة المحل كأنه محل حلويات وعطورات وكلشي ريحه جنان مو عطارينا الحمدالله والشكر تقولون داخلين مقبره ههه ريحته تطيح الطير من السما
المهم دخلت وشريت كلشي هو محل للعنايه بالبشره بالمنتجات الطبيعيه كله من الطبيعه
ورود وفل وياسمين ولافندر وربي ادمان
واحلى شي رغوة البانيو تدرون ماكنت اعرف شي اسمه بانيو ماعلمني الا هم ههه
اشتريت منهم صابونه خطيره باللوز واشتريت حنا لشعر مع طحالب البحر وزبدة الكاكاو علشان ماتقصف الشعر تجي مثل المكعبات وتحطينها بماي حار وتوضع على الشعر ساخنه
فيه الوان كثير من الحنا تصبغين اللون اللي تبين
بس انا طبيعة شعري فاتح ودي اصبغ اسود على الموضه بس الصبغه السودا اعدام لشعر مايسوى علينا صابغه وقرعا ههه
المهم وخذيت صابونة العسل ريحتها روعه تخيلوا احيانا تجيني حاله امسك الصابونه ودي اكلها
مكذبيني ادري بس اشترو منه وتشوفون يمكن تاكلون عادكم بالمحل ههه
وعندهم شامبوان طبيعي وبلسم طبيعي وحمامات زيت مو اي كلام تخيلوا حتى بفينا بالمستشفى فيه فرع من المحل هذا
دكاترة الجلديه والعلاج الطبيعي كلهم ينصحون فيها
وعندهم زيوت عطريه للاسترخاء
واشتريت منهم كريمات مرطبه
واحلى شي انا من النوع اللي ماحب اخلي جسمي بدون ترطيب وماحب الكريمات الثقيله اللي تدبل الكبد
لقيت عندهم شي عجيب مكعب مثل الصابونه بالافندر اللي هو الخزامي
تحطينه على الجسم وهو مبلل بعد الشاور وتطلعين تمسحين عليه فقط لاغير بالمكعب
ولا تغسلينه شوفي الريحه والانتعاش وعلى فكره تراه يعالج الجسم بعد اثنين بواحد
وفيه بعد صابونة لحب الشباب كل اللي استخدموها عجبتهم وفوق هذا كله كلشي طبيعي وعندهم صابونة سودا كأنها فحم بالسوس ومدري وش باقي مكوناتها
هذي استخدمتها تصلح لكل البشرات هي توحد اللون وتشيل الارهاق عجبتني حيل واللوز كنت استخدمها لجسمي ريحه روعه مسك في مسك
وعلى فكره الصابون هذا كله تاخذونه بالميزان بالغرام يعني يقطع لك بسكين بالحجم اللي تبينه
المهم رجعت لقطر وانا مقهوره لان كان فيه عندهم اقنعه للبشره بس لازم تنحط بالثلاجه لانها طبيعيه ميه بالميه بس ماكنت اقدر اخذها لانها تخرب
المهم خلص كل اللي شريت مع انه كميات كبيره بس استهلكتها حيل لانها نتايجها روعه
ومره كنت امشي بالاند مارك فجأه ولقيت المحل
بتصدقوني اذا قلت لكم يوميا امر عليه مانتبهت ههه
وش سويت؟؟
اكيد طرت وربي كني خبله كلمت كل خواتي
والحين مرتاحه حيل
بس لاتنشدوني وين فروعه اللي اعرفه انه باوربا كلها وامريكا بكل ولايه مليون محل للمغتربين
وعلى فكره ترا منه مكياجات بعد طبيعيه بس للاسف للحين ماوصلت الخليج
وعندهم تغليف هدايا للي يبون يهدون وربي تغليف جنان شريت مره لوحده هديتي كنها جايبينها توم وجيري تجن
كنها بفلم كرتون
والحين بحط لكم الرابط حق المحل وانشالله تستفيدون واي استفسار انا فوق الخدمه ههه http://usa.lush.com/cgi-bin/lushdb/i...en_US&dlang=en