صديقتي واهل الولد وحيد اهله تعالوا ياللي متزوجات من وحيد اهله

السلام عليكم ورحمة الله
كيفكم فراشاتي حبيباتي يا اغلى فراشات
الله لا يخليني منكم ومن شوركم
هذي صديقتي الغالية انخطبت (ماشاء الله تبارك الله الله يتمم لها ) عقبال البنات كلهم
وعقبالي يارب
البنت توها ماتملكت الله يتمم لها
بس محترة محتارة بشغلة وودها تشاوركم
بعطيكم امثلة عشان تفهمون
الولد اللي خاطبها وحيد اهله
ماعنده الا اربع خوات
وحده منهم فقط متزوجة وهي الكبيرة
وثنتين موظفات ماتعرف وش اعمارهم بس اكيد انهم في نهاية العشرينات او بداية الثلاثينات
والرابعة هي اخر العنقود بالجامعة
طبعا هم ساكنين في منطقة ثانية مثلا(حايل )
والبنت واهلها ساكنين في منطقة (الرياض )
والولد ناوي يسكن البنت في الرياض لان عمله في الرياض
ابو الولد شبة مطلق لزوجته اللي هي ام الولد ومتزوج وحده ثانية ومستقر معها في منطقة ثانية غير حايل وهي الرياض
والولد عنده اخوان واخوات بس من الابو وشكل علاقتهم ضعيفة
اهل الولد اللي قلنا بحايل ساكنين في بيت ماشاء الله بمبلغ وقدرة
والولد يوم جاء يخطب البنت جاء على سيارة مرة متواضعه لدرجة انصدمت البنت
ويوم جاء المرة الثانية جاء على سيارة عائلية جمس بس واضح انها لاهله
استغربت البنت من الوضع
يعني اهله حالتهم المادية زينة واهله سيارتهم زينة وهو سيارته مرة تفشل مع انه موظف وراتبة حلو ماشاء الله تبارك الله
الحين وش المشكلة
1- البنت خايفة من الزواج من ولد وحيد اهله , خصوصا في ظل هالظروف , يعني الابو شكله شايل يده ومتزوج ورايح منطقة ثانية يعني شكل الاعتماد كله ع الولد
2- خايفة يكونون مستغلينه مادياً ؟ يعني سيارته كحيانة وسيارة اهله حلوة وبيتهم ماشاء الله ؟ شي غريب كانه يدفع راتبه لاحد
3- خايفة اهل زوجها بما انهم في منطقة ثانية يصيرون يجون عندها بين فترة وفترة للرياض ويبلطون عندها بالبيت بما انه ولدهم وحيدهم
4- عنده اخت وحده بالرياض بنت ماتزوجت وموظفة بالرياض ماندري وين ساكنة واستحينا نسال حنا توقعنا انها ساكنة عند خوالها , لان الولد ساكن في سكن عزاب تبع الشغل , بس صديقتي خايفة لاتزوجته تجي اخته تسكن معها بنفس البيت وهذا شيء مستحيل تقبلة صديقتي
5- خايفة يكون ضعيف شخصية بما انه تربية حريم وخايفة يفضل اهله عليها
6- خايفة ينشبون لها بحياتها يعني سفر يسافرون معها وروحه وجية يلزقون بما انه وحيد اهله
7- هي موظفة ماشاء الله تبارك الله وخايفة يكونون طمعانين من هالناحية , وطلبت من ابوها يشرط عليهم الراتب لها بس ابوها عيى وقال استحي وما اتنماقش بالفلوس
وفيه نقطة مهمة
هو سافر اشتغل في منطقة ثانية بعيدة عن اهله تبعد حوالي الف كيلو اشتغل يجي ثلاث سنين بعدين نقل للرياض
وهالنقطة مريحتها كثير , يعني عطتها امل انهم مو معتمدين عليه
بنات عطونا رايكم
ونصايحكم البنت خايفة مرة
خصوصا للي متزوجات من وحيد اهله
هل تشرط عليه شروط معينة ؟؟
ورجاء خاص
لاحد يجي يطلع عقدة النفسية في هالموضوع
انا قتلكم البنت نيتها زينة وماتبي تحرمه من اهله ولا تحرمهم منه
تبي شيء واحد فقط
تبي تعيش باستقلالية بحياتها
ماتبي احد يسكن معها ولا ينشب لها بسفر ولا بتفاصيل حياتها
وهي كذا شخصيتها وكذا تعاملها مع حريم اخوانها
لاتنشب فيهم ولا تتدخل بحياتهم ابدا