صديقتي وسلسلة مشاكل من شهر العسل أشبه بالخيال لا تبخلن عليهابرأي حكيم يامتزوجات

1. وبدأت تسرد معاناتها :-


2. <<< تخيلوا الوضع يابنات


3. وإلا تتجرع مرارة تفاهته وقلة دينه .......


4. والناس اللي تشهد له ما تخافون الله يبليكم في بناتكم

السلام عليكم ورحمة الله وبركاته
أكتب لكم كلماتي بمداد ألم عايشته لصديقة حبيبة غالية إلى قلبي أملا ً في مشورة حكيمة أودعوة لعل بها فرجها فلاتخيبوني لا خاب لكم رجاء
مثل أي فتاة تحلم بأن تكون عروس تزف لعريسها ويظلل عشهم الزوجي السعاده وتنعم بالهدوء والإستقرار خطبت صديقتي
من شاب من أحدى الأسر خارج قبيلتها وبعد السؤال عنه شهد له الكل بأنه شاب أخلاق ويصلي فروضه ووسيم جدا....الخ <<< هذي للبنات اللي تهمهم الوسامه في المقام الأول طبعا صديقتي ما كان أول همها بس سبحان الله النصيب
<<< يعني الكل مدحه
المهم تمت مراسم الخطوبه ثم الزفاف وزفت له عروسه مرت حوالي 3 أشهر في كل مره أتحرج في الإتصال عليها خلال هذه الفتره
لعلمي بإنشغالها في حياتها الجديده ووجودها بقرب زوجها لا سيما كنافي فتره صيفيه كنت أواصالها بالرسائل (مره بالسؤال ومره بالتهنئه ومره بالدعاء ............ )
لكن لا مجيب فوجئت صراحة ً لعلمي بالعهود التي قطعناها بيننا منذ بدء صداقتنا بأن نكون على قلب واحد حزن أوفرح ....
لذا بدأ القلق يتسرب داخل نفسي يا ترى هل هي سعيده يا ترى هل تواجهها مشاكل ؟؟؟؟
وهي من كانت تسبقني في تواصلها معي قبل زواجها وبعد فترة ارسلت لها طمنني عليك يا بنت وش هالقطاعه !!!!!
وما لبثت إلا واتصلت مباشرة علي وطمنتني عليها وإنها بخير والحمد لله فرحت كثير وقلت لها والله ما نسيتك من دعائي يوم أخذت عمره برمضان وأنا جنب بيت الله قالت إيه وأنا أقول تمر فيني ضيقات وربي يفرجها وأقول أكيد فرجت بدعوة أخت صادقة طبعا ً أرتسمت علاماات التعجب والتساؤل علي !!!!!
و لمست في نبرة صوتها إنها غير محقه بأنها بخير كأن فيها عبره مخنوقه
لكن لم أبين لها وقلت لهاا ربي ييسر كل أمورك وأغلقت السماعه وأنا أدعوا الله أن يفرج همها ويملئ حياتها سعاده ويجنبها كل سوء
وفي يوم جمعت صديقاتي وكانت من ضمنهن وكانت المفاجأه بدت لي نحيله الجسم بشكل ملحوظ مسحة حزن لم أعهدها على وجهها
قلت لها نحفتي مرره يا بنت مو بالعاده اكتفت بإبتسامه ما تتصورون يا بنات بلعت غصه بحلقي مو هذي صديقتي اللي أعرفها
عادة لو أقول لها كذا ترد تقول أي شيء بضحكه ووناسه
المهم كانت الجمعه قهوه وشاي بعدها طلعوا باقي صديقاتي وانفردت فيها قلت لازم تتكلم ذي قلقتني
قلت لها بشريني عنك عسى عريسك كفؤ ردت علي قالت آآآآآآآآآآه يا سعاده ما تصدقون يا بنات إنهمرت مع هالآآآآآه دموع مثل الشلال تفتت الصخر الجامد
قلت لييه عسى ما شر وأنا أختك وش صاير قالت هذا صدمة عمري هذا ما يستحق حتى كلمة رجل كثيره عليه رديت عليها اللهم يا كافي لها الدرجه قالت وأكثر

وبدأت تسرد معاناتها :-

تقول أول صدمه لي معه يوم سافرنا بثاني أسبوع بعد الزواج طبعا في ربوع بلادي تقول وأول ما وصلنا قال بنروح لناس أقارب وبأحطك عندهم وأروح مشوارشوي وأرجع قالت شلون تتركني عند ناس ما أعرفهم قال عاادي تعرفي عليهم وهم أهل زوجة أخوه وهي من قبيله أخرى غير قبيلتها وغير قبيلة زوجهاا <<<<< يعني قرابه من آآخر الدنيا
المهم تقول تحملت ونزلني ودخل طبعا شوي دق علي جوال وقال تعالي أبيك في المجلس شوي تقول استأذنت من بنت راعية البيت ووصلتني للمجلس تقول إلا وأدخل والاقي حرمة أخوه جالسه وأمها وزوجي بدون لا حجاب ولا غطاء ولا شيء فري ........
<<< صديقتي من أسره محافظه يعني يتغطون وما عندهم إختلاط مع الحمو يعني أخو الزوج لقول الرسول صلى الله عليه وسلم { الحمو الموت }
والمصيبه تقول فارشين سفره وعليها ورق أخضرقاعدين يمضغونه أعتقد إنه ماده مخدره <<< الله العالم وش هوهي ارتعبت منهم وش تتوقعونه يا بنات ؟؟؟؟
تقول أول ما دخلت عليهم صررخت بدون وعي وش تسون لانها إنفجعت إنهم مختلطين وبعد يأكلون بهالشي الغريب
وخصت زوجها قالت أنت وش تسوي بنفسك ؟؟
رد عليها زوجهاا بكل برودعادي وش فيك خلاص بأطلعه وقال لها اسمعي ألحين أنا بأطلع وأنت أجلسي عندهم لين ارجع ما بأطول تقول وجلست وأنا نار داخلي تغلي
<<<< غربه زواج وبعد عن أهلي وبعد تركني عند ناس أغرااب أجواء بيتهم مرييبه ولك عليهم
تقول جلسوني بمجلس له بابين وراحوا راعية البيت وبناتها وتركوني انتظر أحد يطل علي أحد يجلس معاي تقول أعتقد راحوا ناموا لان البيت صاير هدووء موحش

<<< تخيلوا الوضع يابنات

على إعتبار إنهم ضيفوني أول وخلاص وتموا واجبهم تقول مرت الساعه الأولى والثانيه والثالثه وجلست طول هالفتره من 5 العصر إلى 12 ونص الليل وأنا لوحدي بهالمجلس وفي أثناء هالفتره صار لي حدث أشبه بمسلسل رعب راعي البيت كان غير موجود بالبيت ورجع لبيته تقول أول ما دخل اسمعه يصارخ بصوت عالي يخوف ويضرب بالأبواب تقول صرت أرجف من الخوف وقمت وقفلت واحد من الأبواب اللي جهة باب المدخل لان مفتاحه فيه إلا شوي يدق علي الباب بشكل هستيري ويقول افتحي تقول زاد رعبي وصرت ابكي ورحت للباب الثاني ما لقيت له مفتاح سحبت كنبه كبييره وحطيتها على الباب وجلست عليها شوي إلا وجا للباب الثاني وصار يضرب عليه ويصرخ شكله ( سكران )
وصديقتي بتموت من الرعب بس تدعي وتستغفرإن الله يفرج عليها هالمصيبه اللي حطها فيها زوجها اللي مدري وش ينقال له
إلا شوي وحده من بناته قامت من النوم وسحبت أبوهاا ودخلته غرفته شوي وجا زوجهاا وقال إنه كان يستأجر لهم شقه وأعذريني ومن هالحكي تقول سكت وقتها لين وصلنا الشقه
وانفلت عليه واهزأته أنت ما تستحي تخليني هالوقت كله عند ناس أغراب قال أنا أثق فيهم قالت تثق فيهم أنت نفسك ما ينوثق فيك وما أنت قد مسؤلية أنك تحافظ علي كيف الأغراب تقول وتهورت وحكيت له اللي صار من راعي البيت طبعا سب ولعن وقال هالنذل اللي وثقت فيه
وكلام لا يودي ولا يجيب ومره ثانيه موال الإعتذارات والمسامحات تقول وبلعتها ومشينا تقول طوال هالفتره ما يعطيني وجه لا يسولف معاي ولا يقول لي كلام زين ولا يمدح لبسي ولا شيء يعني كأنا أخوان
<<< تعامل سطحي يعني
غير كذا العلاقه الخاصة تقول والله مثل الحيوان وأنتم بكرامه يسحبني ويخلص ويدفني ويروح ينام وأنا بأموت قهروتقول أحياناا ً يجيني حالة تشنج غرييبه وأصير أرجف ويتركني ولا يهمه أمري
<<<< أنا قلت لها تمنعي طيب لا تعطينه على طول واجهيه قولي له أنا إنسانه مو حيوان
ردت علي تقول قلت له قال يعني وش تبغين أبوسك مثل المراهقين قالت ما استاهل يعني المفروض طول اليوم أحس إنك تمدحني تحظني تلاطفني..... الخ
عشان أكون مشتاقه لك تقول يرد علي فكينا من شغل المراهقين
تقول مره لبست قميص حلوجديد ووقفت قدام الباب ودي لو يطالع ويمدحني و و و و
تخيلوا وش قال لها يوم شافها أشر بيده وهو جالس على السرير قال تعالي تقول تمنعت قلت مو جايه رد عليها بكيفك أجل أنا بأنام وحط راسه وناام فعلا ......!!!!!
تقول ولو قربت منه سلمت عليه أو جلست جنبه تقول يدفني ويبعدني عنه ويقول ترى مو فاضي لك ترى جبتي لي القرف
<<<< تقول أنواع الذل حسيتها معه في فتره بسيطه من كان يصدق أعيش هالعيشه ويكون نصيبي هالرجل اللي ما يحمل من معنى الرجوله غير الأسم وكثير عليه بعد
تقول وتونا بأول شهر العسل يغازل البنات كل ما طلعنا وأنا معه لا يحشمني ولا يقدرني تقول وربي عيني عينك
<<< وما خفي كان أعظم طبعا هي قالت هالكلام وما حبيت اسأل عن شي غير اللي تقوله هي فقط إحتراما لمشاعرها
خلصت التمشيات اللي مثل وجهه على قولها اللي مجرد ما نركب السياره يسب ويتسخط على حظه بالدنيا وإنه فقير ومو قادر يعيش مثل الناس تقول والله لو مرينا من جنب ناس سيارتهم فخمه أو بيوت فخمه يلعن ويسب فيهم بألفاظ بذيئه وإنهم حراميه وإن عيشتنا عيشة نكد
علما إن راتبه زين يمشي الحال وعنده وظيفه ثابته أحسن من كثيير غيره
<<<< بس من سخط فله السخط الله يعينها عليه
تقول ولو نصحته أوكلمته بكلمه يقول مالك شغل انطمي أنت بعد......
تقول رجعنا لعش الزوجيه وياافرحه ما تمت بعد كم يوم جا أخوه أعزب وجلس عندنا نوم وأكل وشرب وأطبخي وحطي وشيلي ويجلس أكثر وقته مع أخوه تقول لا أقدر أسوي شي بالبيت ولا أزينه ولا أستقبل زوجي لا جا من العمل
والمصيبه الثانيه إنه يروح العمل ويتركني مع أخوه لوحدنا بالبيت رجل لا فيه شيمه ولا ذرة غيره متحر من كل قيم الدين والعادات
وبعدها بفتره انتقلوا أهله للسكن معنا من مدينه أخرى على إعتبار إن هالشقه لهم حتى ينهي إبنهم
<<< اللي هوزوجهاا
بناء الطابق العلوي وينتقلون فيه ويتركون لهم هالشقه إذا ً السالفه يبغالها كم سنه لان زوجها مديون وراتبه مستحيل يغطي ديون وبناء
طبعا معها بنفس البيت أمه وأخوه وأخت غير متزوجه وغير كذا الأم فاتحه بيتها على مصراعيه لبناتهاا وعيالها وزوجاتهم
والمستقبل والمودع صديقتي
طبخ وكنس وتنظيف وفوقها ذل ومهانه من أم زوجها ومعامله سيئه وتحكم في كل صغيره وكبيره وزوجها يقول ما بيدنا حيله تحملي
تقول أحسه قدام أمه ماله أي شخصيه تمشيه يمين شمال تقول والله أحاول أتحمل لعل وعسى شيء يتغير بس المصيبه لا ألقى موده منه ولا من أمه
طبعا تقول أخواته ولا وحده تحرك شي ولا تشيل على قولها فنجان قهوه معتبرين نفسهم ضيوف عندي ويجون بعيالهم طوال شهر رمضان
وإن عمتي تتأمر علي سوي حطي شيلي وأنا ودي أكسب ودها وود زوجي وأتحمل واسكت
<<< طبعا أنا قلت لها وليه ساكته ترى للصبر حدود يعني حطي لهم حد مو معقول كل ما سكتي بيعتبرونك راضيه لكن لو أعترضتي بأسلوب كلمتي زوجك كلمتي عمتك إنك تتعبين من كثر المسؤليات
قالت كل ما كلمت زوجي قال تحملي ترى هذي أمي وبرها واجب <<< أخس ياللي يعرف الواجب
<<< مدري رأي أوكي أمك بس مو فرقة حسب الله كلها أنت مو خدامه وسكتت كأنها تقلب الفكره براسها
غير كذا إختلاط يعني ضحك وسوالف مع بعض العيال وزوجات أخوانهم والأمر عادي عندهم تقول وأنا رفضت هالشي وقلت لزوجي قال براحتك فصرت وحيده بغرفتي ومعتبريني منبوذه هو يروح يجلس معهم وأنا أتجرع ألم الوحده والمهانه والذل اللي عشته مع هالزوج وانا بأول شهور حياتي الزوجيه وحالته الماديه صعبه جدا تقول وما أقدر أطلب شي اشتهيه
بالنسبه للأكل تقول تمر على أيام أشتهي بسكوت أو شبس وأنا اللي ببيت أهلي لو أطلب أبوي شي جابه لي بأسرع وقت رغم حالة أهلي الماديه اللي على قدها
تجي أخته وزوجة واحد من أخوانه عندي بالشقه طبعا الباب مفتوح لانها عمارتهم وأوامر أمه إن بابها يبقى مفتوح للي يبغى يدخل
تقول ويجيبون معهم البساكيت والشيبسات ويضحكون ويسولفون عندي بالشقه اللي محسوبه علي بيتي ولا وحده منهم تكلف خاطرها تعزمني لو بالكذب
<<< يا عمري عليها يابنات وربي إني بكيت وهي تحكي لي وألحين وأنا أكتب لكم القصه وأنا أبكي معقول فيه ناس بهالشكل
تقول ومره جاب أخوه متزوج عشاء دجاجه وحده تقول وتعشوا وخلصوا وأرسلوا لي مع ولد أخوه قطعة دجاج شايلها بيده
تقول حسيتها فضله يرمونه لي مثل الحيوانات
<<< الله يكرم السامعين
ورديته وقلت ما أبيه ما أحس بجوع تقول وأنا بالحقيقه بأموت من الجوع بس والله الجوع ولا المذله
تقول إلا شوي الشايب أبو زوجها جايبه لها مره ثانيه يقول لها كلي يا بنتي وبعد هو شايله بيده تقول رديته بس يوم ألح أستحيت رجال كبير
وأخذته حطيته على منديل شوي دخل علي زوجي وقلت له رجعه مالي نفس فيه قال نادي ولد أخوي وأعطيه وارسلته
<<< طبعا لاحظوا زوجها بأغلب المواقف سلبي يعني مو معتبرها شي أبدا ً
تقول مره كان زوجي رايق وراضي علي وطلبت أروح لصديقات لي ووافق ورحت ويوم جا يأخذني أول ما ركبت السياره يسب ويلعن
أنا الحق علي اللي خليتك تروحين أمي اتصلت علي تقول أنك ما مسحتي الأرض وقالت كيف تسمح لها تروح والبيت حوسه وسبني ... وأنت ما منك فايده كأنها خدامه
وأنا بس أبكي وش هالمصيبه اللي ربي طيحني فيها مع هالرجل وأمه وأهله
الغريب من يوم تزوجها طلعوا الخدامه كأنهم مبيتين النيه حسب كلامها ...
موقف من المواقف اللي مرت فيها وفاجأتها منه إنها مرة طلبت منه تروح منتزه ملاهي المهم قال طيب بس بشرط
يروحون معاي أصحابي وإلا ما فيه روحه قلت كيف يعني يروحون معانا أنت ما تستحي تقولها بوجهي بعد
قال لاا نتمشى شوي أنا وياك وبعدين تجلسين مع أم واحد من الشباب عجوز وأكمل التمشيه مع أصحابي تقول طبعا ً هدفه هو وهالأصحاب المغازل لدرجة إنه قالها في وجهها بأروح معاهم نغازل حتى الشباب قالوا لي حط علامة أكس حمراء على زوجتك عشان ما نغازلهاا ويضحك
<<<<<< تفو على الرجوله المهدووره تفو على رجال بهالجيل ديوثيين لا دين ولا غيره حتى بالجاهليه كان عندهم غيره لكن وش نقول غيرحسبي الله وكفى.
تقول وافقت طبعا أنا استغربت من موقفهاا لو أنا مكانها ما طلعت بس هي تقول طفشت من الحبسه وشغل البيت ودي أطلع أتنفس حابسني طوول اليوم وهو مع أصحابه وأنا بس أشتغل له ولأهله ...
للمعلوميه: صديقتي هذي إنسانه متدينه جدا ً مشاء الله عليها وهي كانت سبب كبير في قربي من الله بتوجيهها ونصحها لي الله يفرج همها يارب ....
لكن تقول رمضان هذا ما استشعرت ولا عباده فيه بس أستقبل وأودع
من جهتي نصحتها أول شي بالدعاء والإستغفار والإكثار من قراة القرآن لان الواضح إنها ما عادت تملك وقتها الله يجازي اللي كان السبب..
ثانيا الصبرإذا هي مؤمله من هالرجل إنه يتغير ردت علي إنه دايم يقول لها أنا بأتغير وما ودي تزعلين مني مهما صار مني لاني والله أحبك وما أقدر أستغني عنك <<< علما ًإن كلامه مناقض لتصرفاته
أما في باقي المواقف كل ما نصحتها بشي تقول سويت وما جاب معه نتيجه حيرتني معها وطلبتني أساعدها كيف تتصرف معه
وكيف تتعامل معه قلت لها يابنت الحلال أنت قفلت علي كل باب كل ما قلت لك شيء قلتي جربته سويته
فمالك إلا الله عساه يفرج همك وأنا بأطرح موضوعك بالمنتدى اللي أنا فيه وكم موقع وأجمع لك عدة أفكار وأرآء وتجارب لعلها تساندك
بعد الله لذا اسألكم بالله اللي تمر بموضوعي وعندها مشوره أو تجربه أودعوه بظهر الغيب لأختكم المكروبه لا تبخل بها
عسى الله يفرج هم كل مهموم
والله يابناات موضوع صديقتي مأثر فيني كثير وتاعب نفسيتي ومضيق صدري بشكل ما تتصورون عشان كذا اليومين اللي فاتت قل دخولي للمنتدى فساعدوني للوقوف بجانبها ومساندتها
اللي يفقع المراره
معقول فيه أهل بهالشكل يبلون بنات الناس بعيالهم إلى متى؟؟؟ ولدكم ما فيه خيرتقومون تزوجونه عشان تعقله بنت الناس !!!!!!!!!

وإلا تتجرع مرارة تفاهته وقلة دينه .......

والناس اللي تشهد له ما تخافون الله يبليكم في بناتكم

فيه شي نسيت أقول لكم عليه ترى طول هالفتره وكل هالمواقف وهي ما بلغت أهلها عن أي شي تقول عندي أمل يتغيروما ابى أحد يشمت فيني وما ودي أكسر قلب أمي وأبوي كبار بالسن وكل ما اتصلوا يسألون عني وعن أحوالي أقول لهم بخير الحمد لله ومبسوطه وأنا والله ما حسيت مع هالرجل ولا معنى من معاني السعاده أو الراحه والإنبساط يعني موقفها صح ؟؟

• كمان تقول جماله ووسامته مخليته مغرور وشايف نفسه ويحقرني <<< بلا من زين الأخلاق لذا انتبهوا اللي يركزون على الجمال والوسامه عسى ربي لا يريكم بأس ويفرج هم صديقتي

اللهم إني اسالك باسمك الحبيب الكافي أن تكفي صديقتي كل أمورها مع زوجها مما يشوش خاطرها ويسهر ناظريها اللهم ألف بين قلبها وقلبه كما ألفت بين قلوب عبادك اللهم سخره لها كما سخرت البحر لموسى.
اللهم كما سخرت الريح لسليمان وكما سخرت البحر لموسى وكما سخرت جبريل لسيدنا محمد سخر لصديقتي زوجها تسخير العبد لسيده اللهم كما صرفت نساء العالمين عن يوسف أصرف نساء الكون عن زوج صديقتي اللهم أقذف حبها في قلب زوجها كما قذفت حب عائشة في قلب النبي صلى الله عليه وسلم اللهم جملها في عينه واجعله سكنا ً لها واجعلها سكن له واجعل بينهم مودة ورحمة إنك على كل شيء قدير.
اللهم إن لي أخيه حبيبة إلى قلبي قريبه إلى نفسي عبدتك ابنت عبدك ابنت امتك في قبضتك ، ناصيتها بيدك ، ماضي فيّها حكمك ، عدل فيّها قضاؤك ، أسألك بكل اسم هو لك سميت به نفسك أو أنزلته في كتابك أو علمته أحد من خلقك أو استأثرت به في علم الغيب عندك أن تجعل القرآن نور صدرها و ربيع قلبها و جلاء حزنها و ذهاب همها

• * اللهم يا فارج الهم ..يا كاشف الغم.. يا مجيب دعوه المضطرين.. يا رحمن الدنيا و الآخره ورحيمهما .. ارحم أخيتي رحمه تغنيهاا بها عن رحمة من سواك .. و ارحمها بلا سبب .. ولا تقنطهاا من رحمتك ..

قولوا آآآآآآآآآآمين ربي يجعل لكل مسلم من كل ضيق فرجا ً ومن كل هم مخرجا ً
إنه ولي ذلك والقادر عليه