طلبت الطلاق من زوجها يوم عيد زواجهم

السلام عليكم يا بنات
بنات تذكرون القصة اللي كتبتها عن وحدة اعرفها ومشكلتها مع زوجها واهله
http://alfrasha.maktoob.com/showthread.php?t=814516
اليوم انا عندي لكم خبر انا لما سمعته انصدمت منه
اليوم كلمتني البنت وقالتلي انها طلبت الطلاق من زوجها
لانها ما قدرت تتحمل اكثر من كذا
وقالتلي افتحي ايميلك وشوفي الرسالة اللي انا رسلتله هي
المهم فتحت الرسالة ولقيتها كاتبه كلام كثير
المهم شوفو ايش كاتبة في ايميلها له..................
واعطوني رأيكم في الموضوع........
الله يسامحك
كسرت فرحتي
في كل شي
انت انسان غريب
لا دخلة زي العالم والناس
كل شي انت شايف انه ماله داعي في الحياة
بس
الله يهني اللي تبغاها وتبغاك فيك
انا خلاص هنا ويكفي
يئست منك
عمرك ما راح تتغير
الا كل مالك في الاسوء مع فلان وفلان الثاني
لكن اتذكر شي واحد
انه كل ذول اللي فاضين لك اليوم وجالسين يدوروا عليك
مصيرهم يوم من الايام ربنا راح يسخرلهم و كل واحد فيهم
حيروح بطريقه ويعيش حياته
اما انت وقتها حتجلس لحالك
ولا تعتقد انه زي ما انت الآن حاططهم التوب عندك
هما راح يحطوك التوب عندهم لما يتزوجو والله ما راح يطالعو في خلقتك وقتها
وحتتذكر كلامي
لكن وقتها يالغالي للاسف حتعرف قيمتي
وقيمة الحياة اللي كانت عندك بس انت ضيعتها بيدك
على شباب و استراحة وكورة و انك كل شي شايفه مالو اي داعي متعلق فيا اوفي بنتك اوفي البيت
اصلا حتى في حملي
منت متحمس لاي شي
متعلق ببنتك
لا غرفة ولا ملابس ولا شي
خلاص ملابس ومعتمد على امي انها حتجيبها
انا بس اللي مبسوطة بدا الشي
اللي جي في الطريق اما انت لا
بالعكس تماما
ليش مدري
منجد حسستني اني حامل انا ببنت الجيران
موببنتك انت
اي واحد في مكانك
في بيبي جي في الطريق يكون هو اللي متحمس
هو اللي يروح يجيب ملابس بسيطة للطفل وخاصة انه اول طفل له ويفاجئ بيها مرته
يكون من زما ان مجهز غرفة البيبي
واقرب مثال اهو روح اسأل زوجة اخوك عن زوج بنت اختها ايش سوا لما عرف انه مرته حامل
من الشهر الخامس وهو خلاص جايبلها كل شي يخص البيبي من ملابس ومن اغراض ومن غرفة
مو انت اللي الي الان ما سويت شي ليش لانك شايف اساسا انه ماله اي داعي!!!!!!!!!!!
لا وازيدك من الشعر بيت لا كمان مقرر انك يسافر مع الشباب
وقت النفاس
بس عشانك مرة متحمس لفكرة انه هاذي
بنتك مو بنت احد ثاني تخيل !!!
يعني اي واحد تاني فترة النفاس دي كل يوم وهو لاصق لمرته عشان
بيى يشوف بنته ولا ولده
مو انت !!!!
بس نفسي اسألك هاذي اول طفلة ليك وكدا بتسوي
اجل لو كانت الطفلة الثالثه او الرابعة ايش كنت حتسوي
كنت حتهاجر ؟؟؟؟!
للاسف انك حرفياً قسماً بالله
خسرتني
من تصرفات مالها اي داعي
كل ما احاول الاقي اي عذر لك
عشان اسامحك
خلاص خلصت كل الاعذار اللي عندي
وانا تعبت بصراحة
غير كذا شكرا
مرة ما تقصر على عيد الزواج هاذا عمري ما راح انساه زي الدخلة بالضبط
منجد الآن انا اقتنعت
انه اكبر غلطة انا سويتها
واكبر غلطة انت سويتها في حياتك
اننا اتزوجنا
لانه فعلا زواجنا كان اكبر غلطة ما كان المفروض اننا سويناها
واحنا عارفين انه الوضع ما حيمشي وكان واضح من ايام الملكة
ومن بعدها المشاكل اللي صارت اللي مو طبيعية والوقفة والحماية والدفاع
اللي انت دافعته عني كان والله شي واضح انك تحبني
انا ما باقولك اني نازلة من السما
بس برضه ولا انت الملاك الطاهر
اي وحدة مرت باللي انا مرت فيه كان من زمان قالتلك مع السلامة
ما عاد ابغى هاذي مهي عيشة تنعاش
مو انا اللي اسمع كلام زي السم
واسكت
محد يهون عليك
لكن انا الوحيدة اللي هنت عليك
وانا دحين باقولك هي انت هنت عليا
ما عاد احبك
منجد ما اكنلك اي مشاعر
غير الاحترام
فقط لا غير
كافي اللي انت قلته ( سود الله وجهك ، على فكرة انتي منتي متربية ، ودحين الله لا يردك )
فهنا خلاص حدك
مين انت عشان تقوللي انا دا الكلام
لكن انا حاقولك حسبي الله في اللي كان السبب
في تغيرك
واشوف فيه يوم اسود كل واحد ظلمني يا رب آمين
ولو صارلي شي يوم ولادتي اعرف انك انت السبب
بسبب النفسية الحلوة اللي انت عيشتني هي
كل الفترة دي
وخلي هي.... و ن..... وغيرهم من البنات اللي انت تكلمهم ينفعوك
طيب
انت اساسا ما ترتاح غير لما تكسر فرحتي
لكن ارتاح كسرتها وكسرت كل شي فيا
انبسط الحين
واذا يعني يهمك الكلام اللي انا حاقولك هو
ولا عادي سوي زي دايما طنش وسوي اللي براسك
انا من رأي مالها داعي اروح عند اهلي او عند اهلك الحين
لانه بس يدخل اطراف كتير في المشكلة
ولا حتنحل نهائياً فليش نتعبهم اساسا
خلاص طلع ورقة الطلاق
ومن غير ما تصير مشكلة كبيرة
وانا اول ما اخلص عدتي حاطلع من سكات
وورقتي معايا
لانه بصراحة انت عارف وانا عارفة انه خلاص هنا ويكفي
مافي نصيب
الله يوفقك مع مين ما يكون نصيبك معاها
سواءا البنت اللي انت الحين بتكلمها ولا ... ولا .... ولا مين ما تكون
عادي انا ما يهمني
مع السلامة ومشكور على كل شي ما تقصر
ولا تخاف انا الغلطانة وانا الزبالة وانت الملاك الطاهر اللي مافي زيك
في الكون
طيب
وما عندي شي تاني اقولك هو غير في النهاية الله يسامحك ويهديك ويسعدك دنيا وآخرة
مع مين ما تكون
لانه انا للأسف ما قدرت اسعدك .................. وهاذا الواضح
وانتهت الرسالة على كذا
وايش رايكم في الكلام اللي هي كاتبته
بكل صراحة
وهل اللي هي سوته صح ولا لأ..........
في انتظار ردكم