طول الوقت كنت غلطانة تعالوا شوفوا شنو اكتشفت وبالصور

.بسم الله الرحمن الرحيم ،،
تدرون شنو اكتشفت إن كل مواد التجميل لها مدة معينة والقهر إن هالشي مكتوب
على العلب بس ما انتبهت ،
لأنه على بالي إن مواد التجميل مثل المواد الطبية يكتبون تاريخ الإنتاج والصلاحية ! ،
بس لاحظوا !
إن إنتهاء مواد التجميل يختلف عن إنتهاء المواد الطبية والدوائية ،
شلون ؟!!
المواد التجميلية تنتهي بمدة معينة من تاريخ فتح العلبة يعني مو من تاريخ الصنع
أما المواد الطبية والدوائية تنتهي بمدة معينة من تاريخ الصنع حتى لو كانت يديدة ،
القهر يا بنات إن البياعات لما تسإلينهم عن كريم أو منتج معين ما يكونون صريحين معاج ،
وما يقولون إن المنتجات لها تاريخ صلاحية معينة ،
طبعاً أنا صورت جم منتج من عندي ومن ماركات مختلفة حتى أوضح لكم ،،
أدري إن بتات وايدين يدورن بهالشي بس أكيد فيه بنات ما كانوا يدرون مثلي ،،
خنبدأ بمنتجات العين ،
هذا الكونسيلر من ماك ، نهايته ستة أشهر من تاريخ الفتح ، راح تلاحظون شكل علبة مفتوحة
وحاطين يعني 6m ستة أشهر من تاريخ فتح العلبة ،
وهذا الكونسيلر من فور إيفر ، ومدته 12 شهر ،
الماسكرا نهايتها 6 أشهر ، وهذه المعلومة كنت أدري عنها بدون ما أشوف العلبة وأتأكد ،
هذه ماسكرا سان لوران ،
هذا كريم العين ، مدته بعد 6 شهور ،
وساعات ما يكتبون على العلبة ، يكتبون على الكرتونة فانتبهوا بنات ! ،
حتى الشادو له نهاية تصوروا !! ،،
والغالب نهايته تكون من 12 إلى 24 شهر ،
هذا شادو نارس نهايته 24 شهر من تاريخ الفتح ،
حتى منظف العين له نهاية ! ، هذا منظف العين من كانيبو نهايته 6 شهور ! ،
حتى الغسول له صلاحية ! ، هذا غسول كلينك ( الفوم ) صلاحيته 24 شهر ،
طبعاً أنا اكتفيت بهذه المنتجات وإلا لو بحط لكم كل المنتجات راح يطول الموضوع وما راح نخلص !!! ،
لكن حبيت من خلال الصور أوضح لكم الخطأ اللي وقعت فيه وما انتبهت له بدون قصد !! ،
وأحب أنبهم خواتي مرة ثانية إن الصلاحية تبدأ من يوم الفتح والاستخدام ، لكن طالما المنتج جديد ومو
مستخدم فما راح يتأثر إن شاء الله ،،
منقول