غيرت ملابسي بعد اربع ساعات ولسه يقولون لي ريحتك حلوه

اهلين وسهلين بالمتعطرين
المهم يا بنات
انا سويت طريقه و الصراحه تجنن مع اني مسكت خط ساعتين من الخبر للاحساء و جلست بلبسي بعدين لبست بجامتي و لسه يقولون لي ريحتك حلوه
عاد قلت اكتبها لكم عشان اشوف البنات يحبون تثبت فيهم الريحه الزينه
اول حاجه خذي كرات قطن عطريها بأي معطر غرف ((يكون ريحه منعشه زي النعناع) او كولونيا و حطيها داخل الجزمه اللي بتلبسينها
الله يعزكم
الحين نجي لك انتي
لما تتحممين
راح تحتاجين 4 اشياء اساسيه انا بكل حمام استخدمهم ولا استغني لو يوم واحد عنهم
اولا الخلطه الصابونيه يمنع ذكر اسم أي منتدى آخر
معروفه و مميزه بكونها تنور البشره وتنظف لدرحة اني اتقرف من الشاور جل الحين
لو ما عندك الخلطه ولا تبين تسوينها استخدمي البابايا او الغار الطبيعي .. بس ترى مو زي الخلطه
ثانيا قفازات بودي شوب
ثالثا شامبو السدر والبابونج ((يعطر الشعر و يكثفه))
وهو من اخترااعي ..
كاس شامبو منظف كويس ((مو خفيف يعني من طقة جونسون و دوف...هذول مو شي))
كاس ماء مغلي بابونج ثقيل مذاب فيه ملعقه او ملعقتين سدر
اخلطيهم و استخدميهم كشامبو
بعد ما تحففين شعرك ريحته بتكون معطره بسبب البابونج و السدر
مع اني اكره ريحتهم بس عالشعر حلوين
رابعا واخيرا .. فرشاة الاسنان والمعجون ((لان حتى الفم راح يتعطر))
نجي للشاور:::::
اتحممي بمويه دافيه وحطي الشامبو و خليه 3 دقايق على شعرك مع التدليك باطراف الاصابع و اشطفيه ثم حطي بلسمك المفضل او فاشكول بالفواكه لتعطير الشعر
وارفعي شعرك..
بللي القفازات و قفلي المويه
خذي من الخلطه الصابونيه و دلكي جسمك بشكل خفيف بس لمسح الصابون عليه
ولا تنسين السره و خلف الاذن و المؤخره و كل الثنايا بالجسم
ثم دلكي بالقفازات زين زين زين زين
على قولة الكويتيين
عدل مدل <<<< تجنن
يعني خذي 7-10 دقايق وانتي تفركين و تنظفين بشرتك
والسر من ترك الصابون كل هالمده هو تنظيف الجلد بالفرك لفتره طويله
تجفيف الجلد عشان يتشرب الكريم بعمق
تعطير الشعر بالماسك او الكونديشنر
و اخيرا اتشطفي من البلسم و الصابون و اغسلي اسنانك و اطلعي
((في خطوه اسويها مرتين بالاسبوع وهي غسول المناطق الحميمه لتعطيرها و ازالة الافرازات))
نجي للغرفه والعطور...
ولعي الفحم و حطي دخوون بعدين شيلي الروب و ابتدي بالتضبيط.. ((الدخون انا اخلط معجون الشركه العربيه مع المسني مع عود البحرين))
اول شي حطي مسك اسود للمنطقه الحساسه ثم سبراي المنطقه الحساسه ((ديودرنت هو اصلا)) و حطي فوطه صحيه يوميه معطره من كير فري لان ريحتها حلوه
خذي لك حبة هولز عشان تعطرين فمك و ما تكون الريحه قويه على الناس لما تطلعين لان هولز قوي مره
بعدين حطي كريمات وجهك اللي متعوده عليها
بعدين حطي كريمك المعطر .. وانا ارشح الأيس كريم بالفراوله او بريما دونا من نكتار او لوشن يوكو او بودي شوب
بعدين حطي بودرتك المعطره.. بتقولون ما في بودرات العطور..
انا استخدم جونسون باللافندر و حاطه معاها فانيلا بودره
او بودرة العود من اجمل
او بودرة نكتار بريما دونا وهي اللي احبها اكثر شي
..
بعدين رشي البودي ميست ... على البودر عشان يمسك بجسمك ولا تحطين لبس .. خلي العطر يجف شويه على بشرتك
حبيب قلبي بريما دونا هو احلى بودي ميست ولو كنتي تبين مسك والا فواكه والا ورد .. انصحك تنسقين الروايح من البدايه
الحين افتحي الفوطه عن شعرك و الغرفه مليانه دخان و جففيه نص نص بالهوا و دخنيه بعدين استشوريه عادي
راح تعلق الريحه لان الغرفه اساسا كلها تتدخن
بعدين حطي عطر الشعر من كوكو شانيل يهبل حتى بين الخصل حطي
الحين حطي المدخن تحت كرسي التسريحه وانتي تتزينين و تتضبطين
و اخر شي
اقلبي ملابسك و عطريها بعطر فرنسي من داخل بعدين البسيها ((حطيت كوكو شانيل بعد))
اما الملابس الداخليه لا تعطرينها الا بنقطة دهن عود او مسك ابيض لانك اصلا عطرتي نفسك بالمسك الاسود والكير فري
الحين البسي
وتعطري بعطر عربي ((حطيت الف ليله وليله))
وجبت العاذريه رشه وحده و مسحته على مناطق النبض والباقي على شعري
بس .. لبست العبايه وطلعت و مسكت خط
كل شويه اشم نفسي من جوا العبايه او كل ما فتحت الطقطق اتأكد من مفعولها تفوح الريحه
وصلت بيت جدي وسلمت وسولفت ولسه ريحتي واو
طبعا خليت اختي تشمشمني كل شوي و تأكد لي ان الريحه حلوه و باقيه
غيرت ولبست بجاما عالفجر و لسه ريحتي حلوه و ملابسي اشمها ثاني يوم ريحتها حلوه عالقه فيها البخور و العطور
هي مو صعبه ولا طويله
بس انا احاول اشرح بالتفصيل الممل
ملطوش