في غربه وبنتي بعيده عني

السلام عليكم
انا بس محتاجه احد يواسيني او يقولي كلمه كويسه او حتى يدعيلي
ومو محتاجه ابدا احد يجي يقولي انتي سويتي شي غلط وقلبك قاسي
انا مغتربه مع زوجي وجبت بنت قبل ما يبدآ الترم ب 3 اسابيع وللاسباب كتير وبعد الاستخاره قررت اني اخلي امي تاخد بنتي معاها وهي عمرها شهر وشويه
والله ما احد يعرف كيف كنت حاسه وانا اودعها واديها لامي بنفسي عشان تاخدها مني
وكل دا على امل اني اقدر اخدها في محرم وتكون ظروفي تقدر اني اخليها عندي وتكون هي كبرت شويه وتقدر اوديها حضانه
بس انا الحين مره مقهوره . انا في امريكا ولازم قبل ما ارجع اقدم طلب تذكره للملحقيه الي مسؤوله عن الطلاب هنا
فانا على حسب شروطهم اني ما يحقلي تذكره لاسباب معينه مع اني صارلي هنا سنه وكم شهر
المهم اني كلمت واحد مادري كيف لقيت رقمه من الملحقيه وماله صلاح في التذاكر وهو رجال كبير في العمر وقلتله الله يخليك انا عندي ظروف ومن جد لازم ارجع قالي ابشري وفي نفس اليوم رد عليا وقالي خلاص قبلوا طلبك
ما تتخليوا قد ايش فرحت اني حرجع عشان بنتي وقعدت ادعي للبني ادم دا
بعدد كدا زوجي كمان رفضوا يدوه تذكره فكلم واحد مسوؤل عشان يساعده وقاله ححاول
وللاسف قاله انت ما يحقلك تذكره . وتخيلوا قاله ولا زوجتك والغى تذكرتي
ولو اشترينا تذاكر انا وزوجي حيكون وضعنا مره صعب في السعوديه . اي وحده مبتعثه حتفهم كلامي دا
بس انا دجين حموت من القهر . انا كل الي ابغاه اني اشوف بنتي واحضنها وارجعها معايا
وفي ناس بالواسطات وبدون اسباب يقدروا ياخدوا الي يبوه
ولو في احد سوالي خير وساعدني عشان اشوف بنتي . ليش تيجي وتخرب كل حاجه
والله مني عارفه اش اقول بس انا مره مضايقه ومره تعبانه وخلاص في اليوم دا وبعد ما سمعت الي صار كرهت حياتي هنا
نفسي ارجع يوم عند اهلي زي ما البنات يسووا وارتاح عندهم شويه وابعد عن الدنيا الي هنا
نفسي بس اشوف بنتي واخليها تنام معايا
ومني عارفه اش اسوي بس انا من جد خلاص ما عندي قدره اتحمل اكتر احس عليا ضغط من كل ناحيه
من جد الغربه صعبه
ياريت الي عندها كلمه حلوه تقولي او تدعيلي او تنصحني . غير كدا من جد ماني محتاجه ونفسي ما تقدر تستحمل اكتر
اسفه طولت عليكم