قصتي مع الحمل قصة رائعة جدا لاتفوتكم

بسم الله الرحمن الرحيم
أهلين حبيباتي الفراشات .. إن شاء الله إنكم بخير ..
أنا اليوم بحكي لكم قصة حملي واللي تأخرت لمدة سنة وعشرة شهور..
انا بصراحة أول أيام الزواج كنت انا وزوجي مانفكر في الحمل نهائي ... ونقول الحمد لله كل ماتاخر كل ماانبسطنا أكثر ..
المهم والله عدت 10 شهور من الزواج بدون حمل.. بصراحة بدأت اشتاق للأطفال انا وزوجي ..
المهم ورحت كشفت عند الدكتورة سويت جميع أنواع التحاليل اللي طلبتها مني ... وسويت أشعة ..
والنتيجة الحمد لله كلها سليمة وقالت لي الدكتورة: ماشاء الله تحاليلك زي الفل .. وحمدت ربي
إن التحاليل كلها طلعت سليمة ..
قالت لي الدكتورة باقي تحليل لزوجك .. قلت : أوكيه ..
طبعا سوى زوجي التحليل وطلعت الحمد لله النتيجة ايجابية ..
وفرحنا كثير .. وقلنا اللهم لك الحمد ...
خلاص ارتحنا من المستشفيات.. أهم شي انا تطمنا مافينا حاجة ..
وخلصت السنة الأولى من الزواج بدون حمل ..
سنة وشهر ... سنة وشهرين ... سنة وثلاثة شهور... سنة وأربعة شهور.... سنة
وخمس شهور....
كلها مافي حمل ...
صراحة بدأنا نقلق ونتوتر ... خفنا المدة تطول أكثر من كذا ..
وجات في بالي فكرة إني أروح لوحده مسّادة ( ممرخة ) يمدحونها كثير .. وأعرف كم وحده حملوا على يدها (بمشيئة ربي طبعا )
وتوكلت على الله ورحت .. قالت لي بس ثلاثة أيام أمرخك .. واليوم الواحد ب200 قلت طيب .. غير العلاج طبعا..
المهم مسدتني اليوم الأول .. وبصراحة نعبت شوية يدها قوية على البطن ... وقالت لي ..
الرحم لاصق وفيكي عين وما ادري اش كمان ( لازم تطلع أي مرض )..
مشيت معاها وقالت لي الدوا كله (عسل + موية زمزم مقري عليها + سدر + بخور ..) ب850 ريال ..
صراحة انصدمت من السعر لكن مشيتها يعني أخذت حدود 1500 بس 3 أيام ..
وقال لي : إذا ماحملتي الشهر هذا
الشهر الجاي تعالي وأصرف لك دوا لزوجك برضو ب850 ..
قلت في نفسي .. وربي ماعاد أروح عندها لو ايش .. حسيت إنها استغلالية ..
وانتظرت الشهر اللي بعده ..
سنة وست شهور ( إلا الدورة الله يكرمكم مشرفة بصراحة تضايقت ) .. سنة وسبعة شهور..
سنة وثمانية شهور.. سنة وتسعة شهور... والله ماحملت ..
فكرت إني بصراحة أروح لشيخ يقرا.. قلت علشان ارتاح نفسيا .. ويمكن ربي يكتب لي الحمل ...
ورحت عند شيخ الله لايوريكم بصراحة بغيت أنجن .. تعرفوا ايش يعني أنجن ...
من اللي شفتو من الحريم الله لايبتلينا ( الحمد لله الذي عافاني مما ابتلاهم به وفضلني على كثير ممن خلق تفضيلا )
تخيلوا أنا جالسة وحوالي 200 حرمة كلهم جالسين .. بس بدأ الشيخ يقرأ إلا وكلهم يصيحوا
بصوت عالي ..
ثلاثة أرباعهم يصيحوا اللي جنبي واللي قدامي .. القلة القليلة اللي مايصيحوا ... وانا بصراحة
أول مرة بحياتي أشوف موقف زي كدا .. وجلست ابكي من الخوف..
ماصدقت عدت ساعتين لما خلص الشيخ واتصلت على زوجي وجا أخدني من يوم ماركبت في
السيارة جلست ابكي من قلبي وهو جلس يطمني ويريحني .. وكل ماسكت شوية اتذكراللي
شفته وارجع ابكي وبصراحة مرة حزن علي ..
وقال لو ادري انك بتتعبين زي كذا ماوديتك .. يمكن كان في أمل انك تحملين بس أظنك من بعد
ما انفجعتي مارح تحملين ..
واشترالي عشا ومشاني على الكورنيش ..
حتى ارتاحت نفسيتي..
المهم خلصنا سنة وتسعة شهور و جا الشهر العاشر بعدين بصراحة فكرت بفكرة مرة حلوة ..
وطبعا إحنا بصراحة طول هذي المدة مو بس معتمدينا على الأشياء هدي لا بالعكس متوكلين
على الله ..
مع الدعاء .. مع الاستغفار .. مع الالتجاء إلى الله .. مع قراءة سورة البقرة ..
لكن قلنا نعمل بالأسباب اللي نقدر عليها..
فكرنا انا وزوجي في حاجة من زمان ماجت على بالنا فكرنا .............
7
7
7
7
7
7
7
7
7
7
7
7
7
7 يتبع باقي القصة في الجزء الثاني من القصة بإذن الله ..