قصتي مع الحمل

1. شو اخباركم ان شاء الله بخير؟


2. بقولكم قصتي...


3. وبعدين رجعنا البيت وصلينا انا وزوجي شكرنا ربنا

السلام عليكم يافراشات ولهت عليكم وا ايد

شو اخباركم ان شاء الله بخير؟

بقولكم قصتي...

قبل العيد ب3 أيام كنا رايحين نفطر برع أنا وزوجي وعقب ماطلعنا من المطعم قلت لزوجي خذ لي تست الحمل وعقب مارديت البيت سويت التست وخليته في الحمام وطلعت وبعدين رجعت اشوفه في علامه+ بس مب واضحه بالمره وقعت اشوف وادقق وقلت في خط بس مب واضح وقالي زوجي بنسوي تحليل دم وبنتأكد وعقب بنسير انصلي القيام في المسجد لين ماتطلع النتيجه المهم رحنا وصلينا وانا ادعي من كل قلبي اكون حامل وعقب ماطلعنا كانوا داقين علينا المستشفى بس زوجي مارد لان كان يصلي اتصل زوجي وكلمته الدكتوره وقالت ان فيه حمل وانا ماصدقت من الفرح مب امصدقه اقول لزوجي اسالها مره ثانيه انا حامل؟
يقولي حامل وظليت اصيح من الفرح وشكرت ربي وانا بهالشهر كثرت من الدعاء والاستغفار والصدقه...والله يابنات ان الاستغفار والدعاء من القلب الله يستجيب دعائك لااتقولين دواء والا خرابيط
المهم وبعدين رحنا المستشفى وعطتني الدكتوره دواء وقالت لاتتحركين وريحي نفسك

وبعدين رجعنا البيت وصلينا انا وزوجي شكرنا ربنا

وطول ماانا نايمه ماانام على بطني مع اني احب انام على بطني قلت يمكن البيبي يستوي فيه شي وطول الليل مب نايمه من الفرحه المهم اليوم الثاني قلت بعد بسير اصلي قيام الليل وكان اخر يوم المهم وفي ليله العيد رحت بيت اهلي عشان يجون اللي يحنونا مال الصالون وكنت اصارخ وامعصبه وبسرعه اتنرفز لان تاخروا علينا البنات اللي يسوون الحناء وانا طول ماهم يحنوني قاعده ومااقدر اتحرك اخاف تخترب الحناء المهم بعدين رحنا انا وزوجي نجيب ملابسنا مال العيد ورحنا بيتنا عشان اجهز اغراضي لان بنروح عند اهل زوجي نعيد أول يوم وقبل مانطلع من البيت رحت الحمام وانتو بكرامه والا اشوف بقعده دم ......تخبلت وماعرفت شو اسوي وزوجي انصدم بس سوى نفسه عادي عشان مااكتأب وسرنا بسرعه عالمستشفى لانها قريبه من بيتي وانتظرت الدكتوره ساعه ونص لان كانت قاعده اتولد وحده وبعدين شافتني وقالت بعطيج ابره مثبت ولاتتحركين في البيت بس اتروحين الحمام طبعا رحنا لاهل زوجي وطول الطريق وانا امرجعه الكرسي مال السياره ونايمه ووصلنا عالساعه 6 الفجر ورحت غرفتنا اللي في بيت اهله وزوجي من فرحته خبر اهله وقال اني حامل ومابعيد معاهم لاني تعبانه واستانسوا وطبعا ملابس العيد والحناء عالفاضي لا كشخت ولا استانست وقلت ماعليه عشان اللي في بطني بتحمل كل شي
وعالظهر وانا قاعده اتغدى وزوجي كان نايم نزل مني دم اشويه بعد وبعدين قال بوديج عند امج تهتم فيج احسن ورحت بيتنا في نفس اليوم وعرفوا اني حامل وماكانوا يصدقون لان زوجي كان قبل كل مايسألون حامل يقول حامل
وماقصروا معاي اهلي غداء وعشاء في الغرفه وكان ظهري يعورني وايد وبعدها بكم يوم رحنا عند دكتوره عشان اتشوف الكيس مال الحمل وقالت مايبين تعالي بعد 10 ايام
وانا كنت مستانسه واقراء عن الحامل وشو تاكل وكل شي واختار زوجي اسم الولد ونتظارب انا ماابي هالاسم مب عاجبني واليوم اللي عقبه وانا رايحه الحمام وانتوا بكرامه عقب مامسحت بالكلينكس شفت دم وكان زوجي دوامه ليل وانا كنت في بيت اهلي وبعدين رحت عند الدكتوره وقالت سوي تحليل دم شوفي كم نسبه الحمل سويت وبعد ساعتين راح زوجي يجيب النتيجه وانا كنت انتظره في السياره جاب الورقه وكانت النسبه4.98 انصدمت وظليت اصيح ومالي نفس لحد وبعدها بأربع ايام نزل دم وانا الحين في اليوم الخامس بس في اول 3ايام كان ينزل وايد مع قطع بس اللي بعده ماينزل الا اشويه ليش؟
بس الحمد الله على كل شي الله يعوضني يارب
بنات شو اللي ينظف الرحم ؟
وهل انا احتاج لتنظيف مع اني ماكملت 3اسابيع حامل؟
ومتى اقدر احمل لان في خاطري احمل؟
وهل الجماع مب زين بعد مايخلص النزيف؟