قصتي من تخرجي من الثانويه الى الآن

1. و كل الثلاث كأن احد كان حاطط عليهم اكس احمر بالخط العريض ..

السلام عليكم و رحمة الله و بركاته ..
كيفكم حبايبي و حياكم الله في موضوعي المتواضع اللي اتمنى من كل قلبي ان كل وحده فيكم تلاقي فيه ولو شي يسير من الفائدة ..
طبعا انا من النوعيه اللي ما احب استفيد من شي الا لازم اعلم العالم كلهم بيه
ببدأكم بقصتي من يوم تخرجت من الثانوية العامه تقريبا قبل 7 سنين ..
تخرجت و بنسبة حلوه كان حلمي اني اكمل جامعه و ادخل دورات حاسب و انقلش اول ما تخرجت وضع اهلي انعفس فوق تحت .. :(
و صار صعب انهم يدخلوني جامعه لان الرسوم صعبه و الدورات كمان كانت شي خيال و انا كنت ابغى شي له شهاده معتمده فمالقيت
طبعا بعدها بديت ارتب احلامي .. جامعه ادا ما في معليش بس ابغى وظيفه ادا مافي كمان معليش بس ابغى اعرس

و كل الثلاث كأن احد كان حاطط عليهم اكس احمر بالخط العريض ..

طبعا في خلال ال 7 سنوات كانت حياتي ملل و طفش و كل شي مو حلو كنت دايم طفشانه انام النهار و اصحى الليل .. امي نادرا اساعدها من زود الملل طول النهار و انا نايمه و الليل سهر و على اليوتيوب و الالعاب و و و و النت يلهي الواحد
كنت في ذيك الفتره قيام الليل مستحيل اسيبه اصلي اللي اقدر عليه و ادعي و اسجد و اصيح و اطلب اطلب اطلب بشغف بس سبحان الله ما كان يستجاب لدعائي
بعدها طفشت من الدنيا محد مهتم فيني كلن بحاله و انا بحالي ماعندي صديقاتي كثير ماحب القروبات صرت والله من الطفش ادعي على نفسي بالموت ادعي من قلب و انا اصلي ادعي و ابكي اني اموت ..
بعد ما مر على تخرجي 5 سنين تقريبا صحيت يوم كالعاده و جلست ع النت قلت يا بنت دوري شي ينفعك ليش ما تدخلين تحفيظ قران كنت احاول اسجل بتحفيظ قران بنفس المدينه اللي انا فيها بس كان العذر انو ما في مواصلات .. قلت ادور بالنت رحت لعمنا قوقل قلت تكفى ابي تحفيظ قران بس بالصوت مو كتابه ..
و لقيت منتدى و سجلت فيه و دخلت حلقة سورة البقرة لاني حافظة منها 4 صفحات تقريبا و نففسي احفظها كامله ..
دخلت الحلقة و قبلوني و بديت معاهم كانوا سابقيني ب 6 أوجه الاستاذه كانت تقولي حتقدري تمشي معانا قلت ان شاء الله مع ان حفظي مره صعب بس توكلت على الله و تعرفت على بنوته عسل الله يسعدها و كنا نشجع بعض و الله يا بنات ما صرت احس بالوقت طول وقتي اقرا سورة البقره و بالليل اراجع انا و البنت اللي تعرفت عليها .. و مرت ست شهور و انا في التحفيظ بالنت و كانت نيتي سورة البقره ربي كتب لي حفظ سورة البقرة و أل عمران و النساء و كنا ببداية المائدة ... في هذي الفتره انا فقدت الامل في الثلاث احلام اللي بحياتي اللي هي جامعه .. وظيفه .. زواج ..
و انا بسورة المائدة فاقده الامل اني اكمل دراستي و اني اشتغل و اني اتزوج .. جاني اتصال من وحده انها بتساعدني بدخولي للجامعه طبعا انا ما كان ببالي الا تحفيظ مره ما اهتميت بموضوع الجامعه قلت كله عشم حتعشم ع الفاضي و رحت سجلت بالجامعه بعد شهرين من التسجيل انقبلت بالجامعه و بديت اول ترم ... و تحقق لي اول حلم بدون لا اجري وراه ..
طبعا مع الجامعه و للاسف صار صعب علي احفظ كل يومين صفحتين و غير كتب الجامعه انسحبت من التحفيظ .. بس استمريت اراجع سورة البقرة بسس ..
اقراها كل يوم بعد صلاة الفجر لين يوم ع الفيس بوك جاني مقطع من اخويا للشيخ المغامسي امام و خطيب مسجد قباء ..
و الله يا بنات دا الشيخ كنت لما اسمع له شي اتضايق لان صوته مبحوح احس اني اسمع المحاضره و انا بالي مع صوته و انو يتكلم ببحه المهم سمعت المقطع و طبعا اللقافه لها دور رحت على اليوتيوب و فتحت مقاطع تانيه له و شفت له مقطع كان يتكلم عن قيام الليل طبعا وقتها انا كنت مره ناسيه قيام الليل نادرا اصليها .. الله يغفرلنا و يرحمنا ... المهم شفت المقطع طبعا زمان كنت ايش اسوي لما وحده تقولي و الله دعيت و الا صليت و الحمدلله ربي يسر لي .. كنت اقول فلانه قالت انها سوت و سوت خليني اجرب ..؟؟
اجرب ..؟؟!!
قويه اجرب مع الله مافي شي اسمه اجرب يا تكوني مقتنعه يا لا تشتكين حالك للناس ..
المهم شفت المقطع و انا خلاص وقته كنت بنت عاقله شوي << ولت ايام الهبال ..
وصرت اطبق اللي يقوله بالحرف طبعا حسب مقدرتي و كنت اقرا سورة البقرة ..
و الله يا بنات و بسم الله علي انو من تاني اسبوع من تطبيقي لقيام الليل جاتني وظيفة
اهلي كان عندهم وظيفة لو اموت ممنوع جاتني الوظيفة و كل شي تيسر سبحان الله ..
طبعا كنت اترك فتره و ارجع بعد الوظيفة يمكن بشهر جاني عريص
مع اني فقدة الامل في الشيئين قلت يكفيني الجامعه ..
جاتني الثلاث احلام ورى بعض سبحان الله و ما شاء الله ..
و الحين و لله الحمد انا مملكة لي شهرين دعواتكم الله يتمم لي على خير و يجعله قرة عين لي و يجعلني قرة عين له ..
المهم يا حلوات اانا ما حطيت الموضوع للتسليه بس ببالي اشياء ودي اني افضفضها لكم ..
اول شي انا من عايله محافظة ع الصلاة بس الخطأ اللي كنت ارتكبه هو الذنوب كنت ادعي دايم بس كنت اطبق القميص و اروح اسمع اغاني او اسوي شي يرد لي الدعوه اللي دعيتها قبل شوي .. الله يغفرلي و يسامحني ..
الشي التاني .. كنت لما ادعي من اول دعوه لاخرها و انا اقول عاجلا غير اجل و دا غلط ليش نستعجل مو كل واحد بياخذ رزقه و نصيبه طيب ليش نطلب العجله في الامور يمكن مالنا خير فيها ..
و اللي بعده اني كنت ابدا الدعوه بطلب اللهم اعطني اللهم ارزقني اللهم وفقني .. ما احمد الله و اثني عليه قبل و دي غلطه كبيره لازم نبدأ بالحمد و الثناء على الله ..
و غيره .. كنت لما ادعي اقول دعيت بس ربي ما استجاب .. كانوا يقولولي تفائلي اقول تفائلت و ما جاني شي ما كان عندي ثقه ان ربي بيعطيني .. الحين الحمدلله لما ادعي خلاص كلي ثقه اني دعيت الكريم الرحيم اللي معاي وين ما كنت .. ادعي و انزل كل ما بخاطري و كلي ثقه ان ربي ما حيردني و انه حيعطيني و من لما اقوم من دعائي معد افكر في الهموم اللي دعيت الله فيها خلاص انا فوضت امري لله ليش افكر توكلت عليك يارب و ادري انك ما راح تخيبني .. دعوتك يارب و كلي ثقه انك انت بتكون معاي و بتدلني كدا كنت ادعي ..
..
انا طرحت هالموضوع لان قلت يمكن في بنات غافلات زي ما كنت انا غافله .. حبيت انبه بالاشياء اللي انتبهت لها .. و ان شاء الله اني اكون افتدكم ..
كل بنوته تتمنى تنجح و تكمل دراستها اقولها زيدي ثقتك بالله و اخلصي نيتك في الدعاء و راح تلاقين مبتغاك ..
كل بنوته تأخر عليها قطار الزواج اقولها زيدي ثقتك بالله و ادعي من قلب و حطي ببالك انو ما اتاخر عليك عبث ورى هالتأخير حكمه ربي يعلمها .. وحده اعرفها كبيره يمكن عمرها باخر الثلاثين ما اجاها النصيب و كان يجيها و ترفض سبحان الله باسباب تافهه و لما كبرت معد احد جاها .. و الكل يهرج هذي فيها و هذي و هذي .. و سبحان الله تأخيرها ما كان لشي مرضت اختها اللي اكبر منها و ما تدري عن اولادها شي مين بيهتم فيهم ادا امهم مو بصحتها اكيد خالتهم .. قدر الله و ماتت الام و قبل لا تموت وصت اختها تتزوج زوجها عشان عيالها لا يتشتتون .. طيب لو هي تزوجت قبل وش كان مصير عيال اختها ؟؟..!!
سبحان الله كل شي يتأخر فيه حكمه من ورى التأخير شيلي كلام الناس من راسك خلي ببالك انو في حكمة ربي وحده يعلمها ..
بنات انا اتكلم كأني اكلم كل وحده فيكم لاني مريت بشي ضيق خاطري و يوم صرت افكر صح لقيت انو ما في شي يستاهل نصيبي بيجيني بيجيني سواء رضي العالم كله او رفض ..
اتمنى ان كلامي يكوون خفيف عليكم و يكون وصل لقلب كل مهمومه و كل بنوته و سامحوني لو كنت اخطيت بكلمة او سهيت ..
و هذا رابط المحاضرة تبع الشيخ للي حابه تسمعها .. و اتمنى ان تعم بالنفع ع الجميع ..
https://www.youtube.com/watch?v=LmC6ZWb7qm0
.. لا تنسوني بدعوة في ظهر الغيب ..
دمتم بود ..
محبتكم ../ /
~.. A..dMaNtaK