لك ولمنزلك

بسم الله الرحمن الرحيم
السلام عليكم ورحمة الله وبركاته
هلا خواتي ...
كيف حالكم .....
هذا الموضوع رائع لاحدى الأخوات في منتدى ثاني
جزاهاالله كل خير
نبتدي من المطبخ ....
علشان يسهل عليك تنظيف المطبخ بقول لكم على سر الكل من جيراني أحتار
من رائحة النظافه بالبيت وخاصة المطبخ والسبب خلطه اسويها وما استغني عنها ابدا
أول شي ....
خصصت لي درج داخل الكبت خاص بأدوات التنظيف لأن اكيد ادوات التنظيف
المفروض ما يكون ظاهر للجميع علشان ما يخترب ديكور المطبخ
ولا سيما الاطفال ما يلمسونه ويكون بعيد دائما وابدا عن عيونهم
بقول لكم شنو الاشياء الأساسيه الي أوفرها دائما
مثل ... الديتول
وايضا كلوركس
وايضا صابون الصحون انا دائما استخدم فييري بالفراوله
الحين بعلمكم اشلون تسون الخلطه
انا عندي المغسله بالمطبخ لونها ابيض من الرخام
وانتو يا ربات البيوت اكيد تعرفون ان اللون الابيض مصيبه لما يجي عليها اي نوع من ألوان
الأكل وانا كنت اعاني بالدعك بشكل يومي
خذيت مرش الي استخدمه لتنظيف الزجاج طبعا بعد ما خلص ما قطيته
حطيت فيه بالتساوي ديتول وكلوركس وصابون الفيري بالفراوله ونص كوب ماء
ورجيته عدل مدل وخليته بالدرج
بعد ما أخلص من الطبخ وغسل الصحون
أبتدي بالرش على كل الحوض وايضا على الرخام فوق الطاولات الي اشتغلت عليها وقت الطبخ وتوسخت
وأخليه لمدة خمس دقائق بس علشان ما ينشف كثير
وأشغل نفسي بتنظيف الفرن ب بام المزيل للدهون أقسم بالله اني ما في شي عجبني
قد ما عجبني هالمنتج مو طبيعي ارشه على الفرن وعلى طول امسح بالفوطه من غير حتى دعك
والنتيجه فرن يلمع من النظافه ولا أثر ولا بقع مبسوطه كثير من بام
أرجع بعدها للمغسله وعلى طول امسك الاسفنجه وادعك بشكل جدا سريع واحصل على النتيجه الي ترضيني
بأسرع وقت كلها خمس دقائق وما في اثر اي بقع بالمغسله وطاولاتي الرخام دايما جديده والسبب هذي الخلطه
يوم من الايام زارتني جارتي وأنا كنت مخلصه شغلي كلها
تقول لي ما شاء الله عمري ما دخلت البيت الا واشم ريحة النظافه من بيتك
ههه اول مره اعرف ان النظافه لها ريحه
سئلتني عن السبب وش ذا الريحه قلت لها عن الخلطه وانبسطت كثير لما جربته
مع ان الحوض عندها مو ابيض ولكن كانت حابه الطريقه خاصةان الديتول معقم من البكتيريا
والريحه حلوه بالمطبخ كأن مطبخك عمره ما أنطبخ فيه من قبل
ثانيا .....
عندي طريقه حلوه اسويها دايما بغرفة نومي والريحه تطلع عجيبه ومريحه .....
اني كل يوم بعد ما أنظف الغرفه
أشغل المكيف
وأجيب المبخره الكهربائيه الي فيها وصله للكهرباء
تعبت من كثر ما اخلي الفحم على النار عن طريق الكهرباء ما راح تتعبين مجرد توصلين الوصله وانتهي الموضوع
واحط فيه البخور
الحين علشان ما تتعبين انك تدورين بالغرفه كل الي عليك انك تفتحين باب كل الدواليب الي عندك
دولاب ملابس زوجك افتحيه ودولاب ثيابك بعد افتحيه
وسكري باب الغرفه بعد عشر دقايق رجعي الغرفه وسكري المبخره وشيلي الوصله من الكهرباء
وعلى طول سكري بيبان الدواليب وبتبقى ريحة ثيابكم كلها بخور وعود وعطور
الكثير منا عنده عطورات ويزهق من عطوراته قبل ما تخلص ونشتري عطورات جديده نازله بالسوق
انا استخدم العطورات برشه على ستائر البيت وتبقى الريحه حلوه دائما ببيتك
ثالثا ....
عنايتي ببشرتي ...
أنا كنت أزهق اني اهتم بوجهي بالكريمات
واني اهتم بأيدي ورجولي بشكل مستمر
وعلشان أجبر نفسي على كل هالكريمات والعنايه
خليت درج مخصص عند السرير يعني الكوميدوينو
وقت ما ابي انام اكون طبعا غاسله وجهي بالصابون
ووجهي نظيف من المكياج وغيره ..
قبل النوم علشان انا اكون تعبانه واكيد لو كانت هالسوالف بعيده عني
ما راح اقوم على رجولي واسوي كل هالشغلات ههه بنات انا كسوله
وعلشان كذا أجبر نفسي وأتحدى نفسي بأمور كثيره اني استمر عليها
وفعلا جابت معاي نتيجه
حطيت لي كريم لوجهي ترطيب ليلي
وحطيت كريم صغير للعنايه باليدين
وكريم خاص بالقدم
والحين بعد شهر اشوف نفسي تعودت على هالشي وصار الموضوع عندي عاده مو اجباري
احس بالراحه وانا ادلع نفسي واعطي نفسي حقها بعد تعب اليوم
منقول