للمصممات المبتدئآت نصائحي لكم

السلام عليكم و رحمة الله و بركاته
يسعد مساكم بنآت
وصباحكم بعد
طبعاً آنا مو مصممه محترفة لحد اللحين ولا عندي إسم مشهور أو عالمي
آنا مصممه مبتدئة من حالكم وخبرتي على قدي
بس نظراً لأسئلة البنآت اللي جتني على الخآص أكثر من مره
حبيت أقولكم بعض النقاط وأتمنى إنها تفيدكم فمشواركم وتقودكم للنجاح
ويشهد عليّ الله ما قلت هالكلام إلا لأنكم مثل خوآتي و كاتم العلم يلجم به
فنبتدي بسم الله
أولاً التصميم هوآيه و شغف داخلي نابع من القلب
مو شي نجبر روحنآ عليه لسبب مآ
التصميم هوآيتي المفضله من زمآن على طول أرسم و أسوي أشيآء و إكسسوارات بس توني سنحت لي الفرصة إني أتعلمه بالجامعه والحمدلله الله يسر لي هالشي
قبل لا تصممين وتتعبين نفسج
إسئلي زبونج
تحب الشغل النآعم
ولا الشي الثقيل
تحب الألوان الفاقعه ولا شي هآدي
عشآن لا تسوين شي ويطلع عقب بعييد عن طلبهآ
طريقة رسمج للموديل :
كل شخص وله إسلوبه فالرسم أو التعبير
لا تقلدين أحد ، حآولي توجدين لنفسج إسلوب وخط خاص فيج و يعبر عنج عشآن يكون لج حضورج بين المصممين
بس أهم شي يكون الموديل وآضح من خلال الرسم
وهذي أمثله لعدة طرق و ستايلات للمصممين و بتستغربين مو بعضهم لأن أشكالهم غريبه و ساعات تكون تضحك بعد
لكن أكرر و أقول أهم شي المودييل يكون بارز ..
طبعاً الغالبية من المبتدئين يحتارون بالنسبة للأسعار ..
جم أخلي الأسعار ؟ و شلون أحط سعر كل رسمه أو قطعة ؟؟
الشي الأول من عقب تكاليف التصميم
..( تقييم الشغل )..
شفت بنآت حاطين تصاميم للبيع بعشره ريال بس تخيلو
طبعاً الشغل كآن بالنسبه لي رسم جداً عآآديي و مافيه أي نوع من التصميم أو الفن
وفي نآس ب500 ريال وفي وفي ..
لكن أهم شي إنتي تعرفين شغلج شكثر يستآهل
وحلو الوآحد يبتدي بعد بالتدريج إلين النآس تعرفه و تثق فيه بعدين يرفع أسعاره للشي اللي يرضيه و يرضي زباينه بعد
شي مهم جداً جداً جداً
لازم كل مصممه تكون منتبه له
ولازم كل زبونه تسأل عنه
التصميم اللي ترسمينه لازم تكونين عآرفه أنواع القماش اللي تنآسبه و اللي تعطي الشكل الصحيح للموديل
الرسم سهل وما يبيله ، أي فنآن بيرسم لج موديل
بس الشطآره هل تعرفين تضبطينه مثل ما رسمتيه
أكيد بيكون الجواب لآ إذا ما كان عندك خبره و إطلاع على أنواع القمآش و طبيعة كل نوع فيهم
مثلاً عندج الشيفون
الخلق مآله طآيح وينفع لشي فيه كسرآت
ما يصلح تحطينه وتبينه يوقف فمحله
الجاكار :
هذا القمآش سميك نوعاً مآ و يصلح للقصآت البسيطه اللي ما يكون فيهآ حركآت وآآيد / غالباً يكون مشجر ( منقش )
مستحيل تحطينه وتبين تسوين فيه كسرآت أو شالات و حركآت لأن بيطلع مو حلو
عآلم وآسع من الأشكال والأنواع لازم تعرفين كل نوع عشآن تكونين محترفه و متمكنه من شغلج و عارفته
يعني لما تعطين الزبونه الموديل بس مرسوم هذا ثلاث أرباع الشغل
يبقى شي نآقص ألا وهو نوع القمآش المستخدم
ولازم الزبونه بعد ما تغفل عن السؤال عنه أو المطالبه به لأن من حقهآ تلاقي كل شي جآهز و واضح
وهذا مثال على كلامي :
مادري إذا شفتو موضوعي الثآني اللي فيه إكسسوارات و أشياء
ما تصدقون لو قلت لكم هذولي كلهم
وزعتهم ببلاش
لما تبتدين لازم يكون في ضريبة عشآن النآس تعرفج
لازم تراوينهم شغلج و تعطينهم منه إذا مو بسعر رمزي تكون ببلاش أول مره
يعني مثلاً تنزلين صور موديلات من تصميمج أو تسوين أشيا وتعطينهآ هدآيا للنآس
آنا عطيت دفاتر جامعه من تصميمي لرفيجآتي
وعطيت خالاتي إكسسوارات من تصميمي و شغلي
ووزعت تيجآن للشعر على بنآت خالاتي ووبنآت عمومي
مع إنهم مو قاصرهم شي ماشالله بس الهدية حلوة و إنتي لما تحسبينهآ صح بتطلعين إنتي الربحآنه
هم لما يلبسونهآ وتعجب النآس بيسألون عنهآ من اللي مصممهآ أو من وين مشترينهآ و بينتشر إسمج حزتها
في مره سويت عبايات وعطيتهم لوحده تبيعهم لكن نصبت عليّ ولا حصلت من وراها شي ، يعني لازم تنتبهين و توعين لطريقة تصريف البضاعه
يا يكون الشي عن طريقج مبآشره أو من خلال شخص تثقين فيه و تعرفينه عدل
النآس أغلبهآ تدور الشي الرخيص والعآدي
لكن في نآس تبي الشي المميز و تحبه
هذولي عآد قليلين وذوقهم صعب فالغالب
فبتلاقين صعوبة ببداية الأمر إنج تحصلين زباين
تلاقين اللي يسألونج ويقلون لج سوي لنآ شكثر بس لما تصير الصجيه يتهربون " يعورون رآسج ع الفاضي " طبعاً مو الكل جذي بس قاعده أقول لكم عن النماذج اللي بتصادفينهآ
في نآس قمة فأخلاقها وتعاملهآ ينحطون عالجرح وفي العكس
إنتي لازم تتحملين النوعين و تحاولين قد ما تقدرين تسايرينهم وتمشين معاهم
طريقة التعامل الصحيحه مع الزبون سبب رئيسي في نجاح أي مشروع
خلي معآملتج رآقيه و حلوه تشوفين زبآين أكثرر و أكثر
وطبعاً بالنهآية المسآلة قسمة وأرزاق محد يدري شلون بتكون
البنآت اللي يعرفوني من أهلنا ولا ربعنآ يبوني أصمم لهم نفانيف أو عبايات ..
تستحين تطلبين منهم فلوس عليهآ و هم ما خذينهآ من باب الميآنه والقربه فيقولون عآدي ما يحتاج ندفع
عشآن تتفادين هالشي
قوليلهم يطلبون منج هالشي في محلج >> إذا كآن عندج محل
أو عن طريق رسالة في موقعج أو مكآن إنتي مخليته للتواصل معآج
حسسيهم إن الشغل شغل بس بطريقه لبقة ..
قوليلهم إنج رآح تنشغلين وتنسين إذا كان بس جذي بالكلام
فالأحسن يكون الشي رسمي عشآن تلاقي طلبهآ حالها حال الزباين وبهالطريقة تتفادين الإحراج و بنفس الوقت
بأخذ كل ذي حق حقه
شي ثآني بعد ..
إذا بديتي بهالشي تركزين عليه اهو بس
و ما تنشغلين بشي ثآني عشآن تقدرين تنجزين
إذا ماكان عندج محل أو موقع للعرض .... تسوين لج مجموعه حلوة كبدآيه عباره عن جمن قطعه وتشتركين بمعرض معرضين اللي تقدرين عليه ..
و تشوفين إذا الله أكرمج و مشاا إبتدي بشي أكبر
أما إذا ما حسيتي نفسج ما قاعده تنجزين ولا في إقبال ما أقولج وقفي لا ،
لكن حآسبي لا تزيدين خسايرج أكثر
حاولي تنشرين إسمج و شغلج بمكآن
تحسين بتلاقين فيه قبول و إقبال
يعني ما تحطين تصاميمج بمنتديآت مليآنه مصممآت
دوري على الأماكن اللي تحسين بتكونين إنتي الوحيده أو المميزه
فيه عشآن الإهتمام ينصب عليج
إلا إذا كنتي وآثقه جداً من شغلج وتحسين نفسج بتكونين منآفسه قويه للبقيه
وشي ثآني وهو الأهم
وبقولكم آنا ليش للحين مواصله رغم إني ما جآني منه ذاك الشي اللي يذكر .. أصمم بالدرجة الأولى لأني أحب التصميم مو عشآن الربح
هذي تقريباً أهم النقاط اللي حبيت إنكم تعرفونهآ و أي أحد عنده إضافه لا يبخل علينآ فيها عشآن الفايده تعم ع الجميع
آنا قلت لكم تجربتي بإختصار وأتمنى أكون فدتكم بشي
واللي حآب يسأل لا يستحي
بالتوفيق للكل
إختكم رويدا