مخطوبة وحايسة ساعدوني خاصة بنات جدة

a7lad0nya

11-10-2022 - 12:44 am

هاي حبيباتي انا قلت خليني افضفضلكم اكيد راح الاقي الحل عندكم
اول شي خلوني اقولكم شي مرة مهم واللي هوا
اني اكبر اخواتي وغير كدة انا اكبر البنات من جهة اهل امي وكمان انا اول عروسة عند اهل بابا
يعني من جد الانظار حتكون عليا بما اني اول عروسة
وانا محتاسة ومو عارفه ايش اسوي
أول شي انا انخطبت اوكي واهل الخاطب قالو لبابا انهم بعد اسبوعين او 3 اسابيع راح يجيبو المملك
انا ابغى افهم ايش قصدهم بدا الكلام هل انو راح تصير ملكة بس بدون حفله وبعدين تتعمل الحفلة
ولا راح تكون الملكة علطول
اظن انو الخيار الاول
ابغى اعرف اذا نبغى نسوي حفله ملكة متى احجز القاعة واي قاعة تشوفوها حلوة وسعرها مو مرة غالي ؟
متى احجز الكوافيرة واي كوافيرة تشوفو احسن ريما ولا شيخة ولا ...؟
ابغى فستان ملكة يكون لونه حلو ومقاسه يلبس سمول وميديم اللي عندها ياريت تحط صورته هنا
او ترسله ليا مع السعر اللي تبغاه فيه ؟
او مشاغل او محلات او مصممات علشان اصمم عندها الفستان بس ماتكون اسعارها غالية؟
والمصورة ايش احسن مصورة ممكن اجيبها تصويرها حلو مو يطلع كأنه فيه قصاصات قلوب وحركات اطفال لا ابغى مصورة عدلة.
وكمان ابغى اعرف في الملكة ايش على اهل العريس وايش على اهل العروسة ؟
ساعدوني الله يخليكم والله اكتشفت اني ما اعرف شي وما احب اسأل اللي حواليا علشان لا يقولو فين عايشة دي
ولا يقولو عني مستعجلة ولا ما صدقت اني انخطبت ومن دا الكلام .
وكمان ابغى افكار للزفة وللشبكة ولو في شي ناقص ياريت تفكروني فيه
الله يوفق ويسعد كل من تساعدني في موضوعي حتى لو بحاجة بسيطة
مشكورين مسبقاً

التعليقات (9)

انثىآ المطر

11-10-2022 - 03:36 am

هدي بالك اول شي
وثاني شي الف الف الف مبروك الله يتمم لك على خير يارب
وثالث شي ابوكي لازم يسال ايش يعني يجيبو المملك؟؟
يمكن تكتبو كتابكم وبعدها تعملو شبكة دا الواضح من كلامك!!! بس استفسري من اهل عريسك افضل عشان لا تتفاجأي بشي
بالنسبة للقاعة على حسب موعد ملكتك بس على كلامك انو قريب فلازم تحجزي من اللحين عشان تشوفي القاعة وتعملي بروفة الزفة و يعني على الكثير قبل الموعد بشهر
كوفيرات والله مااعرف بس البنات بيمدحو منه سنتر افضل انك تروحي وتشوفي بنفسك الشي دا يعتمد على الذوق وكل وحده لها ذوق خاص بها
فساتين والله لسى مابدأت ادور فأسلي البنات اللي دورو
والمصورة انا عن نفسي راح اجيب سهام 6984914دا رقمهم
وايش عليكم في الملكو وايش على اهل العريس الملكة عندنا من الى كلها على اهل العروسة وأهل العريس مالهم اي دعوة فيهم بس اللهم ترسلي لام عريسك عدد الكروت اللي تبغاها وغالبا مايتعدى 70 كرت
ولا تخافي ياقلبي كلنا مو عارفين شي انا زيك برضو الكبيرة بس لسى مابدأت حوستي عشان كدا ماراح اقدر افيدك كثير
ام الزفة مااعرف عنها شي بس ممكن ندور معاكي اذا حبيتي بس افكار ماعندي صراحة ابدا
اسمعي ياقمر عشان لا تتكركبي
1 اتأكدي من موعد شبكتك
2 احجزي القاعة واتفقي معهم على البوفية وكل شي سجليه بالفاتوة لان مالهم امان
3دوري على فستان وعدلي فيه واشتري الاكسسوارت وكل شي خاصة فيه
4 شوفي الكوشة والمسكة ومدخل للقاعة ودفتر ذكريات اذا حبيتي وطبعا لازم اللون يكون نفس لون فستانك
5 اتفقي مع المصورة
6 اتفقي مع المطربة
7اعملي بروفة لزفتك
8 اعملي حمام مغربي اوتنظيف عروسة وبروفة للمكياج وكمان اتأكدي من انك تحجزي
والله دا اللي في بالي دحين
وانتي دوري بالقسم هنا اكيد راح تلاقي تجارب كثيرة
http://alfrasha.maktoob.com/showthread.php?t=742832
http://alfrasha.maktoob.com/showthread.php?t=727810
http://alfrasha.maktoob.com/showthread.php?t=782819
وحياك بموضوع مخطوبات جدة
http://alfrasha.maktoob.com/showthread.php?t=783345

رزان الفلة

11-10-2022 - 04:37 am

اختي
حاول تجهزي من بدري
ولالنسبة للزفة
انصحك باستديو زفات المدينة
زفاتهم بدون موسيقى لكن مميزة بالفعل
اكتبي في جوجل : زفات المدينة بيطلع لك الموقع

طمطم81

11-10-2022 - 05:38 am

لومحتاجة أحد يسويلك الكوشة وضيافة المعازيم
أنا wedding planer
راسليني عالخاص لو مهتمة
باي الله يوفقك

حلاتي بكل حالاتي

11-10-2022 - 06:39 am

مبروك حبيبتي الله يتمم لك على خير ..
اول شي قصدهم بالملكه اتوقع انه كتابة العقد ويمكن يبغى يشوفك اذا ماحصل نظره شرعيه فالبسي فستان نعوم وخلي الحفل بعدها بفتره...
والاشياء الباقيه بالترتيب والتفكير راح تجي ..
جيبي دفتر وقلم واكتبي اول شي ..
1-القاعه > فندقيه - عندك فندق رمادا 30.000
فندق جده اوركيد 20000 _ فندق الواحه 9000
فندق الشيراتون الكرسي ب150 او ب170 وعاد انتي احسبي على عدد ضيوفك
2 -المطربه او الدي جي > عندك ملف كامل لمطربات جدة -والدي جي أغلبه من نفس القاعه
3-الفستان > تفصيل (جده مليانه مصممين وانا عن نفسي فصلت فستان ملكتي عند أحمد البدوي)
جاهز( دميتريوس- الرهيد - بوتيك العروسه -سوق اليمامه -بوتيك aأند a)
ايجار( العماره الزرقاء-فراشات المنتدى-)
4-الكوافيرا ..عاد انا لحد الحين ماحجزت بس احجز بجي اقولك
5-المسكه والكوشه وتزيين الطاولات - من محلات الورود وكثيره( عندك شارع الاميرسلطان وغيره كثير )
6-هدايا المعازيم ... محلات كثيره مثل باتشي.مفتي .المحلات اللي تسوي الكوش. بابطين
7-شريط زفتك .. تلاقين مواقع كتير بالنت اختاري اللي بدك
8- المصوره ..بالنسبه لي حجزت ضاويه وعندك كمان استديو اللؤلوه حلو والضوء المفتوح
::: واللي اعرفه انه الملكه على اهل العروسه بكل شي اللهما اهل العريس عليهم الشبكه وعربية الملكه ويجو كانهم ضيوف :::::
::: ولاتنسين هديتك لعريسك :::::
... دعواتك لي.......

عالمي صافي

11-10-2022 - 07:40 am

الفراشات ماقصروا ،، كفوا ووفوا
ربي يتمم لك على خير ويوفقك..

شنطة مدرسة

11-10-2022 - 08:41 am

ربي يوفقك00

charming_roro

11-10-2022 - 09:42 am

ياحليلك يجيبو المملك يعني كتابه العقد سو عشا رجال وتاني يوم او تاني اسبوع ملكه الحريم_بالنسبه للكوفيرا ماأنصحك لاريما ولا الشيخه شغلهم ثقيل مره خليكي على النعومه لانه ملكه خلي الثقيل للفرح عندي كوفيرا روعه اسمها سابيه عند دينا للمكياج و وفا للشعر لا يفوتوكي وفي دار الموضه عند ندى مكياج وايسين شعر_اذا تبغي ارقامهم عندي بس راسليني على الخاص وروحي شوفي شغلهم

girl_love4ever

11-10-2022 - 10:44 am

اذا تبي مكيااج روحي رويال كير عند عفت خيال والله
بالتحليه او الكورنيش جنب قزاز
اذا تبي رقمهم ارسليلي ع الخااص روحي وماراح تندمي

anteeeka

11-10-2022 - 11:45 am

الله يوفقك انشالله
اول شي انا بقولك على الكوفيره روحي لصالون بالتحليه اسمه باتشي ولوتشي فيه وحده اسمها منى مكياجها ياخذ العقل لبنانيه وعلى فكره قد مكيجت نجوى كرم انا سويت عندها والله كل مين انهبل على مكياجي حتى زوجي قالي كنك من اللي يطلعون بتلفزيون وحقت الشعر رولا
وبالنسبه للمصوره روحي سينما شوت بطريق المدينه قبل المطلق تصويرهم يجن انا صوروني تصويرهم اكثر من رائع يطلعونك كنك اللي بال مجلات
وبس الله يوفقك

بنات المدينه الله يسعدكم تعالو←
أحلى هدية للعروس→