مرايم للكاتبة ضوء القمر رومانسيه درجه اولى

1. نتكلم شوي عن عايلتها واحد واحد ..


2. ¤؛° الجزء الثاني °؛¤


3. وعطوه هديته وكانت عبارة عن قلم حلو انيق معاه سبحة فضية


4. وضحكوا كلهم و كل راح لحاله


5. ¤؛° الجزء ارابع °؛¤

صباح / مساء الخير جبتلكم قصه ان شاء الله تكون جديد وممتعه لكم انا قريتها وعند كامله بنزلكم بجزاء اذا لقيت منكم تفاعل بكمل للنهايه
ولى اوله شرط اخره نور اوكي
اتركم مع البدايه
البداية
كانت مريم قاعدة على التواليت تسحي شعرها والفرحة مالية قلبها.. شلون ما تفرح واليوم هو عيد ميلاد أخوها وحبيب قلبها مبارك.. وهي محظرة له مفاجأة وحفلة معتبرة بهالمناسبة.
مريم عمرها 18 سنة وآخر سنة لها بالمدرسة.. وهي بنت ذكية وشاطرة لكنها ما تهتم كثير بالمذاكرة والله جان تطلع الأولى عليهم.. هي من أسرة بسيطة وحشيم.. عايشى مع ابوها ومرته لأن أمها متوفية من سنين..

نتكلم شوي عن عايلتها واحد واحد ..

مبارك: أخو مريم وهم اكثر من خوان وتربطهم الصراحة والصداقة لأنه أخوها الكبير والوحيد من أمها وابوها ..يدرس بالجامعة برمجة كمبيوتر.. عمره 21 سنة.. وسيم حنطاوي بعيون عسلية تذبح والرموش كبار >>> هذي اللي يسمونها العيون الناعسة
ناصر .. ابو مبارك .. يشتغل في الاتصالات وقريبا بيتقاعد
شما: حرمة ناصر ،، مرة حشيم متوسطة بالعمر في نهاية الثلاثينات .. ربة منزل شاطرة ومعاملتها زينة مع اعيال زوجها
عيالها:
أحمد: ولد شما الكبير و عمره 15 سنة .. شاطر ودايما من المتفوقين. مرح.. و يحب الغشمرة والمقالب و يمووت في اخته مرايم .
فطيم: دلوعة عمرها 13 سنة .. متكبرة وشايفة نفسها ودائما مغترة بجمالها .. مع انها الصراحة حلوة بس غرورها يخرب عليها ..
رباب: طيبة ومرحة وتاخذ وايد من ملامح أبوها و اخوها أحمد .. ما تحب شي أسمه مدرسة .. تنجح دايما بس يالله تييب تقدير جيد جداً.. مع انها مو بجمال فطيم بس طباعها تحليها.
الجد سالم: بوفهد، عايش مع ولده ناصر مع انه مو الكبير لكن ولده فهد ساكن في بوظبي بسبب شغله وما طاع يسير وياه لأن هله و جماعته كلهم في العين
الجدة حصة: أم فهد .. مرّة طيبة وغشمرجية من النوع اللي يعجبكم و أحمد طالع عليها.
ناصر عنده 3 اخوان: فهد وراشد وسعد.. بس ما عنده خوات
سعد: آخر العنقود و مسافر المانيا يدرس طب وللحين ما خلص.
راشد (بوسيف): مدير شركة كبيرة وعايش في العين ..عنده بنتين سارة و زينة وهم توم وولد واحد وهو سيف طالب بالجامعة ومن سن مبارك
فهد(بو بدر): عنده بنتين بس شمس 18 و بدرية 15 سنة وحرمته حمدة دومها مريضة
هذي كانت نبذه عن بعض شخصيات القصة وبعدها ندخل في احداث القصة
¤؛° الجزء الاول °؛¤
نزلت مرايم تحت تشوف البشكارة جان سوّت اللي قالت لها عليه
مريم: (مينا) أمحق اسم ,, وينك؟
البشكارة مينا: يس ميس مرايم
مريم: سويتي الكيك والحلاو واللي قلت لك عليه؟؟
البشكارة: ايوا انا سويت شوية .. بعد صلاة المغرب انا يكمل كل شي انتي مافي خوف
مريم: زين .. انا وصيت السايق يجيب معه شوية اغراض إذا جابهم خبريني.
البشكارة: اوكي .. هو يجي انا يقول
وراحت مريم وقعدت تحت بالصالة .. وشوية وتجي شما حرمة ابوها من برا وتقعد معها ..
هم الثنتين علاقتهم طيبة مع بعض و شما كانت تتقرب منهم عشان تكسب زوجها بس هم الحين استووا شراة عيالها.. و هي مب كبيرة ومتعلمة وعشان كذا هم يندمجون معاها.
شما: سلام عليهم
مريم: وعليكم السلاام .. مرحبا الساع شمامي
شما: عنلاتج زادٍ.. شو شايفتني أصغر خواتج
مريم: ههه .. جزاتي ادلعج يام احلى احمد
شما: اي ضحكي عليّ بكم كلمة .. من قدك اليوم عيدميلاد الغالي
ودشت عليهم رباب
رباب: ما أقدر انا على لمة الحلوين .. افا عليكم ما تقولون عندكم وحدة سمها ربوبة تنادوها حتى تشارككم و تحلي قعدتكم والله ما نسواكم، بعد كل شي جايز
مريم: ههه.. مادرينا أن الشيخة رباب واعية
رباب: تسلمين الشيخة مرايم .. الحين بيأذن المغرب وين أرقد
شما: عدّال لا أحد يسمعج .. لا انتي حمارة نوم ولا شي بعد ..
رباب: افا يا اماية .. انا حمارة نوم .. الله يسامحج بس .. مقبولة منج بس لا تعيدينها هههااي
مريم: هههاها.. ياللا بلا كثر الكلام امشي ساعديني ورانا شغل وايد ..
رباب: برايج .. يالله عشان اشوف وش سويتو واحط عليه لمستي الفنية ..
مرايم: خسج الله يالخام.. انا اتعب نفسي وانتي تجين عالاخر و تسوين نفسك عاملة كل شي
رباب: هاهااها .. والله انا اليوم قاعدة واتهزأ .. يالله ما عليه عشان برووك كل شي يهون
وراحوا المطبخ رباعة و خلصوا تجهيز الأكل و رتبوا الزينة و البالونات و ساعدهم أحمد في تعليقها و عمل الزينة .. و بعد صلاة العشا بتستوي حفلة عيد ميلاد مبارك..
مبارك كان طالع ويا ربعه علي و جاسم يتحوطون .. وفجأة يرن جوال مبارك على نغمة بابا فين ..واول ما سمع النغمة ابتسم و ضحكوا ربعه مستغربين من هذي النغمة ماعدا علي اللي كان فاهم ..
المتصل : الو انت فين
مبارك : انا هنا عايزة ايه
المتصل: ههه وينك انت للحين ما رجعت البيت ؟
مبارك: مو انتي حبيبتي قلتي ما ابيك تجي البيت اليوم إلا لما اسمح لك !
مرايم: ههه خلاص افراج يالله تعال ولا تتأخر
جاسم: ايالخاين تكلم منو من ورانا ؟؟
علي: ههه اسكت يكلم اخته شفيك انت
جاسم: وانت شدرراك يعني؟
علي: مو نغمة بابا فين هو حاطها نغمة مخصصة لأخته
جاسم : اها .. هههاي
تكلم علي بصوت مسموع عشان تسمع مرايم وقعد يقول: نبي كيكة ونبي حلاو حقت عيد ميلاد بروك وجان زين بعد تعطونا هدية لأننا مرابعينه ومستحملين ثقل دمه
مرايم: انت ربعك شراتك ما همهم إلا بطنهم.. وقول للي تكلم تراك تسواه وتسوى عشرة شراته ومافي اخف من دمك بالدنيا كلها
مبارك:ههه ايوا ايواا.. حبيبة قلبي انتي والله ماحد عارف قيمتي غيرج.. (وغمز لعلي بعينه وهو يضحك) ههه
مرايم: تسلم لي والله .. واذا ربعك يبون صج يسلم راسهم ربع الغالي
مبارك: لالالا ما بعطيهم شي خلهم يولون .. كله لي بروحي
مرايم: ههه
علي وجاسم ضربوه على كتفه
مبارك: آآآآآي لا بس شّلي لهم شوي .. بس شوي مو وايد
مرايم: اوكي .. يالله لا تتأخر ننتظرك
مبارك: ياي بالطريق في امان الله
وسكر مبارك عن مرايم والتفت للشباب وقال لهم انه بيروح وهم بقوة عين قالوا بيسيرون معاه وبياخذون الكيك لأنهم ربع من زمان وشرات الاخوان

¤؛° الجزء الثاني °؛¤

وصلوا البيت، مبارك في سيارة ابوه لأنه ما عنده سيارة وعلي وجاسم في سيارة جاسم وكانت مرايم تنتظر عند الباب الداخلي ..دخل مبارك ولقى اخته مجهزة الكيك ومغلفته لهم اخذه من عندها وراح عطاهم الحلاوة وسلم عليهم و رجع البيت ..
لقى البيت ظلام ومن صوب المطبخ تتحرك طاولة متحركة صغيرة عليها كيكة من طابقين مزينة بالشموع متجهة لوسط الصالة ومن الظلام كان بس يشوف حركة الشموع لحد ما انحطت الكيك على الطاولة وبدأ التصفيق واشتغلت اضواء الزينة مع موسيقى عيد الميلاد
الجميع: happy Birthday to you وسنة حلوة يا جميل .......الخ
تقربت ايادي صغيرة سحبت مبارك للطاوله وكانو فطيم ورباب واطفؤا الشموع واضيأت الانوار والكلٍ كان يبارك لمبارك بعيده
بو مبارك وكان ملبسينه شراة اليهال كاب وهو يضحك: ابوي كل سنة وانت طيب.. شيبتني وانا للحين صغير..
وعمل حاله زعلان.. وعطا ولده علبة صغيرة ما تنعرف ايش اهي وعلى طول فتحها مبارك.. لقى داخلها مفتاح (سويج) فرح مبارك من الخاطر وحب ابوه على راسه
قال بو مبارك: هذي لك يا ولدي وتستاهل اكثر ودومك رافع راسي عسى الله لا يحرمني منك.
مبارك: الله يخليك لي و يقدرني وابرّك ان شاء الله .
شما: وانا بعد عندي لك هدية واتمنى تعجبك ..
اخذ من عندها الهدية وفتحها ولقاها ميدالة ذهبيه روعة .. واستانس مبارك من الخاطر و شكر حرمة ابوه و حبها على راسها ..
فطيم: وانا بعد شريت لك هدية على ذوقي ومتأكدة انها بتعجبك
رباب: طالع هذي.. ما عليك منها انا وهي شريناها مع بعض وانا اخترت اللون ....

وعطوه هديته وكانت عبارة عن قلم حلو انيق معاه سبحة فضية

وقال أحمد وهو يتمسكن: انا خبرك ياخوي فقير وما اقدر اشتري لك ذهب والماس يليق بمستواك.. بس شريت لك احدث مجموعة برامج كمبيوتر توها نازلة السوق وانت كنت تدورهم وما حصلتهم بس انا وصيتهم لك يجيبوهم من دبي (مد الهدية له وقال له) اخذهم وادعي لي ههه
مبارك: تسسلم الغالي مشكور وما تقصر احلى هدية من احلى احمد
احمد: ههه مشكور مشكور ادري اني حلو ما يحتاج تمدحني زود
مبارك: هههاا والله ماخذ في نفسك مقلب ... والشيخة مرايم وين هديتي يالله عطيني (ومد يده لها)
مريم: الله يعطيك.. وش تبي بعد عندك أنا اغلى هدية كفاية الحفلة اللي من اعدادي واخراجي
مبارك: افا يعني ماشي هدية؟؟ مايصير ابا هدية انا من عندج الحين الحين
مريم: هههاي.. اوكي غمض عينك اول وبعدين اعطيك
مبارك:اوكي يالله..
وصك عينه بيدينه .. وبعدها قالت له افتح عينك وفتحها
لقى قدامه شي مغطى، شال الغطا من عليه وشاف الهدية وحب اخته على راسها و حضنته هي ودمعت عينها ..
الهدية كانت عبارة عن قرآن بغلاف مذهب وصاير شكله فنان.. وكانت ام مبارك الله يرحمها عندها واحد نفسه ولكنهم ما يدرون وين راح عقب وفاة امهم اختفى ومبارك كان يحبه يقرا فيه
عقب الأكل والوناسة والربشة بالسيارة الجديدة وبعد ما وعدهم مبارك ان يحوطهم فيها بكرة تعبوا كلهم وراحوا يرقدون وما وعوا إلا الصبح متأخرين لأن ثاني يوم كان خميس وما وراهم مدارس..
ما يبنا طاري الجد والجدة لأنهم سايرين بوظبي يطمنون على حرمة ولدهم فهد لأنها مريضة وطايحة بالمستشفى.
¤؛° الجزء الثالث °؛¤
اول واحد صحى الصبح كان مبارك.. نزل تحت وشاف البشكارة شاله وياها باقة ورد كبيرة ودبدوب ابيض حلو ماسك بيدينه حلاو..
مبارك: مينا منو ياب هذا كله
البشكارة: هذا واحد يجي يقول هزا هدية لمبارك بس ما يقول منو
مبارك: اوكي خليهم هني انتي و روحي
اخذ مبارك يطالع الورود المنسقة بشكل رائع وذوق رفيع وشاف بطاقة عليه (صباح خاص للغالين معطر بالفل نرسله بس للحلوين ونقولهم من العايدين وعقبال مليون سنة).. والتوقيع (خالتك سعاد وبنتها الجازي)
فرح مبارك كثير وتفاءل باليوم من الصبح وورد وفل وياسمين وتنهد تنهيدة رضا وراح يزقر البشكارة ويقول لها تجهز له الفطور لأنه بيطلع.. وقال لها بعد ما تجهزه تودي الهدية فوق لغرفته
وهو قاعد يفطر اجت رباب وشافت الورد والدب الحلو وما سمع إلا بشهقة
رباب: WooOw شو هيدا .. شو هالزين .. بروك من ياب لك هذا.. ماني ابي الدبدوب
مبارك: بسم الله الرحمن الرحيم.. شو ما شفتي خير انتي.. سلمي علي قولي مرحبا على الاقل.. كيف اول مرة تشوفين دبدوب في حياتك؟ وبعدين انا مو اصغر عيالج تقولين بروك
رباب: مرحبا الساع.. اهلين.. شخبارك.. و عليكم السلام .. طيب من وين هذيلا؟؟
مبارك: ههه مراحب .. هذا من عندي خالتي
حاست رباب بوزها: خالتك ؟ من عند خالتك لو بنتها ؟
ورد عليها مبارك وهو واقف بيطلع حجرته: من خالتي وبنتها.. نعم الشيخة رباب تبين تقولين او تسألين شي بعد؟
رباب: ها؟ لا سلامتك .. انزين انت قلت بتحوطبنا اليوم بالسيارة اليديدة لو نسيت؟!
مبارك: ههه ذبحتك الهياتة.. لا ما نسيت بس بمر الربع شوي وبعد صلاة العصر يصير خير نتفق وين تبون تروحون اتفقي انتي بس مع مرايم وفطيم وانا حاظر لكم.
رباب: تسلم لي اخووي حبيبي انت والله
مبارك: اي اكيد حبيبش مو تبين شي.. اما وقت اللي ما لش حاية عندي حتى السلام يصير بفلوس
وضحكت رباب وهو بعد وطلع حجرته بدل ملابسة وتسفر وطلع يكشخ بسيارته اليديدة
وعت مرايم وشافت البشكارة شايلة الدبدوب ومو عارفة تحمل معاه باقة الورد وشالته معاها .. وشافت البطاقة وابتسمت ابتسامة باهتة سرعان ما اختفت..
مرايم تحب خالتها لأنها اخت امها الوحيدة والجازي بنتها بنت حلوة بيضا وعيونه سود وساع.. الجازي من سن مرايم وتحب مبارك بس عمرها ما بينت له هذا الشي ولكن لأن الجازي اسرارها كلها عند مرايم فهي تدري باللي في قلبها .. لكن مبارك عمره ما وضح ان كان يحبها او شي بقلبه ناحيتها ويعاملها شراة اخته.
وعلى الغدى توه واصل مبارك من برا وغسل يدينه وجلس يتغدى معاهم..
فطيم: اقول مبارك وين بتودينا
مبارك: انا قلت لرباب تقول لكم وين تبيون تروحون وانا بوديكم
شما: ما عليك منهم امتحاناتهم قريبة لا يقعدون يتدلعون عليك
رباب: يمه امتحاناتنا باقي عليها شهر وين قريبة! وبعدين هي إلا ساعة ما بتفرق
ناصر السالم: صاجة بنتج وبعدين اليوم اجازة خليهم يرفهون عن نفسهم شوي مع اخوهم قبل الامتحانات والصكّة
رباب: تسلم لي والله .. (وقامت وحبته على راسه).. هذا الكلام وإلا بلا.. انا ما قلت شي ابوي اللي قال هالدرر
شما: اي مو انتي أم لسانيين من يقدر عليج ..
مرايم: ما عليه خالتي صدقها احنا نبي نروح نستانس لنا شوي واصلا ما بنتأخر إلا ساعتين او ثلاث ساعات او اربع ساعات واحنا رادين
شما: اقول بنت ناصر شرايج بعد تتحوطون لباجر الصبح ولا تردون البيت
مرايم وتكلم ابوها بحماس مصطنع: يصير يبه يصيرر؟؟؟؟؟
بومبارك: صج ما تنعطون ويه انتو .. ترى اغير رايي وماشي سيرة
رباب: سكتي انتي سكتي لا اتخربين طلعتنا .. فديتك ابويه ما عليك منها هي إلا تمزح بس
مبارك: ههه .. الحمد لله والشكر تقولون مطلعينكم من سجن .. انا ساير انام اذا اتفقتوا على مكان خبروني
فطيم: Ok .. اخويه انا بخبرك عشان ما تخترع من دق الباب اذا جت لك رباب..
واطالعت رباب بغرور
رباب: ولا تردو على السفيه جوابا... اقول اسكتي بنت ناصر
فطيم بدلع: هي فديتني بنت ناصر والنعم
انقهرت رباب منها ولكن مرايم طالعتها بنظره هدتها شوي لأنهم يعرفون حركات فطيم
وهالوقت دخل الجد سالم والجدة حصة : مرحبا الساع عيالي
الكل: مرحبا مليون ولا يسدن في ذمتيه (وتوايهو)
شما: هلا والله البيت نوّر بردتكم .. شحالكم وشحال حمدة؟
الجدة حصة: الحمد لله صارت زوينة الحين.. وعليا ولا هم عارفين وش فيها كل يوم حطوا لها مرض يديد مسكينة
بومبارك: الله يقومها بالسلامة ان شاء الله.. والعيال و فهد شحالهم؟
الجد سالم: الحمد لله يا ولدي و يسلم عليك ويقول لمبارك كل سنة وهو سالم وغانم وعقبال مليون سنة
الجدة حصة: سويتو له عيدميلاد ؟
رباب: هي سوينا له .. فاتج يدوه
الجدة حصة: ما خليتوا لي كيك ؟ تراني اسوي له اليوم مرة ثانية والله إن ما خليتوا لي (وضحك الكل من هالرمسة)
فطيم: يدوه انا شلت لك قطعة كبيرة عشانك يالغالية
الجدة حصة: الله! فطيم ما غيرج .. ليش في شي صار بغيابي؟
احمد: ليه يدوه اشصاير؟
ويغمز لرباب بعينه لأنه يدري جدته وش تقصد
الجدة حصة: سلامتك يا ولديه.. اقول حبيبتي فطيم تعالي يمي.. (وجت جنبها وحطت يدها على يبهة فطيم تشوف حرارتها) ... اقول يمه فطيم شخبارك؟
فطيم فهمت على يدتها وانقهرت وراحت فوق حجرتها زعلانة
الجد سالم: عدال عالبنية يا حصة جزاتها يعني
الجدة حصة: وه يعني انا وش سويت؟؟ .. وش عليك الحين بتيي ولا كأن شي صاير
شما وحزت في خاطرها بنتها: هي لو ما تحبج واجد عمووه ما زعلت منج..
الجدة حصة: وأنا بعد احبها يا شما بس بنتج وايد شايفة حالها ولازم تتواضع شوي.. من تواضع لله رفعه
شما: صاجة عموه .. الله كريم
الجدة حصة : ويرخص الحريم ههه
احمد: اي والله يدوه ادعي انهم يرخصون ابي اعرس قبل لا اعنس
بومبارك: عنلاتك .. توك صغير شالكلام هذا بعد
قفط احمد من ابوه : برايكم انا ساير ارقد لي شوي .. تبون شي الشواب
الجدة حصة: شاب راسك .. ليش تكبرني انا للحين صغيرة
الجد سالم: صغيرة بعيوني يام فهد
رباب: احم احم نحن هنا
الجدة حصة: وانتي شعليج بعد خليه يتغزل .. ما يطلع منه الحجي إلا في السنة حسنة

وضحكوا كلهم و كل راح لحاله

¤؛° الجزء ارابع °؛¤

طلعوا كلهم بسيارة مبارك ..احمد قدام ويا اخوه.. ومريم وفطيم ورباب ورا.. مرايم مو متعودة تتغشى ولا خواتها بعد.. بس إذا ويا اخوها ما يرضى لازم يخليها تتغشى لأنه ما يحب احد يبصبص على خواته وما شاء الله كلهم فيهم الجمال الخليجي الأصيل
اول شي راحوا الملاهي ولعبوا لحد ما تعبوا .. بعدها وداهم مطعم وتعشوا .. وبعدها قالوا بيسيرون البحر.. ما طاع مبارك يوديهم لكنهم قدروا عليه وقنعوه.. مبارك واحمد راحوا يتمشون على البحر وفطيم ورباب تموا يلعبون في الرمل والبحر من قريب عشان ما يتلعوزن.. اما مرايم كانت تراقب البحر وشوي مبتعدة عنهم وعاقة الغشوى لأن في الليل وما في احد قريب منها .. وتراقب البحر بصمت وكأنها تكلمه ويكلمها.. لأن البحر يذكرها بأمها اللي فقدتها وهي عمرها سنة ما تفهم من الدنيا شي بس دايما يقولو لها انها كانت تحب البحر وتعتبره صديقها المخلص اللي ما يفشي بأسرارها.. والحين مرايم صارت شرات امها يوم تشوف البحر.. تختفي كل الكلمات.. ولأن من رحل وغاب.. لن يأتي بعد طول الفراق وتسقط دموعها بانهمار وتتلاشى صورة امها على صفحة الماء كالسراب ..
في الاثناء كان في جماعة شباب عالبحر بس بعيدين شوي ويلعبون كرة ويشوون.. الكرة راحت بعيد راح واحد من هالشباب عشان يجيب الكرة ولفتت نظره مرايم وهي قاعدة والدمعة نازلة من عينها.. ما حب يزعجها ولكنه ظل شوية يتأمل هالوجه الملائكي والدمعة نازلة على خدها.. وانتبه انها موب لوحدها ورجع لربعه
مبارك: مرايم يالله نشي بنروح لا نحصل لنا تهزيب من الشيبة
مسحت مرايم دموعها و قامت : كاني يالله قمنا
ركبوا السيارة وانتبه مبارك على الشباب اللي على الشاطئ ونزل يسلم عليهم ونزل معاه أحمد
مبارك: ياهلا والله How are u man? فينك ما تبين؟ (وسلم على الشباب اللي معاه)
محمد: هلا والله Fine? أنت شحالك ؟
مبارك: بخير و عافية.. اسأل عنك يالقاطع ما يوصلك سلامي
محمد: تقصد من علي؟ أبد ولا يوصلّي شي عنلاته
مبارك: افا .. اللي ما يستحي .. شوف هذي سيارتي اليديدة امس الوالد عطاني اياها هدية عيد ميلادي
طالع محمد السيارة واللي داخلها وعرف ان البنت اللي شافها هي نفسها اللي فيها
محمد: ما شااء الله مبروك تستاهل والله.. جان زين يفتكرون فيني أو يذكرون عيد ميلادي ويعطوني عسى لو قلم بدرهم والله قابل ههه
مبارك: هههاي حلوة.. (غمز له بعينه وقال له) انت اعرس والعروس كل يوم بتتيب لك هدية.. ترى البنات يموتون على هالسوالف
محمد: ههه وانت الصادق خبرك عيلتنا كلنا أولاد مو شراتك يا حظك بس
مبارك:ههه لا تعطيني عين .. بقول للعيوز تشببني
محمد: عنلاتك زادٍ الحين انا بحسدك ... رح بس رح
مبارك: اوكي انا رايح سلم لي على عليو و الأهل
محمد: يوصل وانت بعد سلم كثير السلام
وسلم أحمد ومبارك على الشباب و ركبو سيارتهم وراحوا البيت وطبعا حصلوا لهم شويه تهزيب على التأخير ولكنها عدت على خير و من التعب كلهم سارو ينامون

• *محمد أخو علي واكبر منه بسنة وحدة وهو يدرس أدب انكليزي باقي له سنة ويكمل جامعة**

////////////////////////////
عشان الافتتاحيه نزلت لكم 4 اجزاء
انتظر ردودكم