مشغل معالي حسبي الله عليهم

والله ماكتبت هذا الكلام إلا من القهر اللي فيني والله يشهد على كل كلمه اكتبها
الموضوع وما فيها أنه كنا حاجزين في المشغل هذا من فتره لإختي العروس على اساس انها تروح للمشغل تعمل تسريحه ومكياج
ولكن قبل الموعد بيوم تقريباً كلمنا مديره المشغل واتفقنا معها انه الكوافيره تطلع على انه نزيدها ألف ريال على طلعتها للعروس ولكنها ما وافقت إلا لما قالت لها امي بيكون معها خمس بنات
المهم انه خواتي طنشو حجزهم عند دار نور علشانها
اتفاقنا معهم انه تجينا على 12 الظهر وتنتهي من العروس على الساعه 6 بالضبط
لإنه متفقين مع المصوره بالقاعه انها بتكون جاهزه على 7 علشان تبدأ التصوير معها
تخيلو في نفس اليوم تدق علينا مديره المشغل بإسلوب تافه وزباله تنافخ علينا وتقول الكوافيره تعطونها الحساب وهي عند الباب ولا راح تدخل إلا لما تأخذ الفلوس كامله ولما جلست اناقشها واقول افرضي ما خلصت على الموعد او انها تمشينا اي كلام
قعدت تصرخ وتقول خلاص ماعاد هي جايه لكم العروس تجي عندنا تسوي وبس ومع السلامه
لو ان امي اخذت السماعه وقعدت تترجها كان توهقنا
كانت امي تتحسب عليها وتقول
( لو كانت حاجتك عند الكلب قول له يا سيدي)
جات الكوافيره متأخره وحده ونص وزياده ومعها ثنتين والله مثل الديكور
تخيلو وحده بس تعمل مكياج وتسريحه واللي معها شغلتهم بس استشوار
جات الساعه 8ونص وهي مابدأت بالعروسه
كل الترتيبات خربت بسبب التأخير
التصوير والزفه وشكل اختي والله كان يفشل
جات الساعه 10ونص والعروس توها تخلص
المكياج ولا كأنها عروس عادي جداً والتسريحه اقسم بالله فضيحه فضيحه فضيحه لآبعد درجه
عملته لها بس اي كلام علشان تخلصها
الزواجات عندنا تنتهي بدري دخلت وفيه ناس طالعين
تخيلو شكل العروس كيف بيكون
المصوره عملت لنا سالفه بسبب التأخير وقالت حقي راح آخذه ولا علي منك
المصيبه انه اليوم كلمت المشغل وطلبت المديره اكلمها
اقسم بالله اسلوبها زباله
قلت لها انه اللي حصل مو زين بحق مشغلكم وسمعته وانه هالمفروض تمشون على الاتفاق اللي بيننا
وهي بس تصرخ علي وما عندها ابداً تفاهم وتتكلم من طرف خشمها
قاعده اقول لها عن اتفاقنا وتقول مو ذنبي والغلط منكم
الحقيره تكذبني لما اقول لها انه عاملتكم جايه متأخره ومعها ثنتين وتقول لا معها وحده ومصره انها اللي معها وحده
اقول لها انه اللي معها بس قاعدين يستشورون والكوافيره هي اللي تسوي الشعر والمكياج وتكذبني وتقول انه هي ماتعرف تسوي شعر أصلاً وشغلتها مكياج بس
أقول لها اتفاقنا معكم انه 6 تخلصون العروس وتقول لي والله مو ذنبي
قلت اسألي عاملتكم ليه كل ما قلنا لها اعملي للعروس تقولين خلوها آخر شي واسأليها من اللي كان يسوي الشعر
قلت ليه مرسلين معها ناس اي كلام ما يعرفون يشتغلون
وبكل وقاحه تقول وش تبغين انتي الحين
تخيلو لو تكلمكم وحده من طرف خشمها وتذلك على شي من حقك
اقسم بالله إلى الآن مقهوره من اللي حصل امس
لا وقبلها انا كلمتهم اسألهم عن حشوه الشعر والرموش قالو من عندنا بخمسين الحشوه وخمسين الرموش ورحنا اشترينا الحشوه ب12 ريال من السوق والرموش اخذناها ب15 ريال
ولما بدأو بالعروس قالو ما تصلح واجبرونا ندفع لهم 50 على كل حشوه و50 على الرموش
مشغل استغلالي مع انه كل المشاغل يسوون هالأشياء من عندهم ومجاناً
وهالمشغل والله لو ما يبقى إلا هو ما حجزت عنده الله لا يعيده ولا اللي فيه
في المرفقات بتشوفون الفاتوره ومسجل فيه الموعد المتفق عليه بس انا غيرت رقم الفاتوره لإسباب خاصه
ما أقول إلا حسبي الله ونعم الوكيل فيهم وانتبهو مو كل شي يمدحونه زين
انا حرمت الحين أني أمشي على كلام أحد