معصب ويرفع الضغط ويجيب الهم وبارد وما عنده احساس وما يسولف اقول ادخلواخلونا نلاقي حل

1. وتلاقونه قبل الزواج الله المستعان ما كأنه يعرفهم


2. وبعد الزواج مسوي فيها الرجل اللي ميت عليهم


3. يا عالم صرت اسمع قصص كثير ان سبب الطلاق مو مشكله شخصيه بين الزوجين


4. الفئه الخامسه فئة الازواج الباردين


5. قبل لا اختم يا حريم


6. قريت قصه قصيره في مطويه

بسم الله الرحمن الرحيم
السلام عليكم ورحمة الله وبركاته
(ملاحظه جدا مهمه للجميع)قبل لا تقرون الموضوع
في بداية الموضوع
علشان لاحد يقول ام البتول تظلم الرجل
انا نزلت كم موضوع يخص الرجال وظلم الحريم لهم وشفت انتقادات من العضوات يحسبوني واقفه مع الرجال ضدهم
اليوم حبيت انزل لكم الصفات الشينه فيهم
يعني المواضيع الاولى تخص الرجل المظلوم والمرأه المقصره
والموضوع هذا يخص الرجل المقصر والمرأه المظلومه
وفي بعض الحالات يكون الرجل ظالم يعني مو مجرد رجل مقصر يالله نبدأ
هذي هي المواضيع اللي كتبتها مع الرجل وضد المرأه في تصرفاتها تفضلوا
http://alfrasha.maktoob.com/alfrasha12/thread1631140/
وهذا برضو حكيت لكم صفات شينه وما تنبلع في كثير من الحريم وكنت مع الرجل
http://alfrasha.maktoob.com/alfrasha16/thread1625551/
وهذا الموضوع الثالث برضو
http://alfrasha.maktoob.com/alfrasha12/thread1463525/
حياكم
...
عدلت في موضوعي لأني ما عرفت لكم ان نزلت موضوع ضده زعلتوا وان نزلت موضوع معاه برضو زعلتوا
ايه ده ياربي اعمل إيه ههه
من زمان عن هذا القسم الاعجوبه
والمعجزه
بقولكم ليه اعجوبه و معجزه بس مو اللحين
في نهاية الموضوع
ادري ادري
سامعه الزفرات والآهات من هالصدور التعبانه
كل وحده شايله هالقد من زوجها
ازواج معصبين
ازواج يزهقون
ازواج ما عندهم احساس
ازواج يرفعون الضغط
ازواج باردين
اغراضها كلها جاهزه وبرضو معصب بدون اي سبب وتلاقونه يا من المدخنين او المشيشين طيب حنا وش ذنبنا ؟؟
يا زوجي العزيز الاكل جاهز
يا زوجي الحبيب الثوب جاهز
والشماغ مكوي ومعلق
وش ناقصك ؟؟
ليه يدورون الزله علينا وكأننا الاعب بيدهم ؟؟
يعني مشكلجي من الهواء !!
طيب الزوج الثاني يزهق
بيتوتي يجيب الهم ما يحب يطلع ولا يروح ولا يجي
وان طلع ما غير لفلفه بالسياره واكل ويالله على البيت انتهت الرحله السعيده
الزوج الثالث ما عنده ذرة احساس الزوجه تلبس وتتأنتك وتزين خشتها وتتعطر وتمر من جنبه ولا حتى يفكر يتغزل فيها والا يقولها كلمه حلوه ترفع من معنويتها شوي ويشجعها تسوي احسن من اللي سوته في كل مره
الزوج الرابع يرفع الضغط
تلاقونه على كل سالفه صغيره والا كبيره يحقق فيها وليه ما سويتي كذا وليه انتي مع اهلك كذا ومع اهلي كذا ؟
طيب ياخي برضو شوف نفسك لا يكونك تحب اهلي اكثر من اهلك ؟؟
لا وتلاقون الزوجه تحب اهله وتقدرهم لكن وربي اغلب الازواج هم اللي يكرهون الزوجه في اهله ليه
قلتو لي ليه ؟؟
بسبب كل سالفه والثانيه يجيب طاري اهله وكأنه ما يعرف في الدنيا هذي الا اهله

وتلاقونه قبل الزواج الله المستعان ما كأنه يعرفهم

وبعد الزواج مسوي فيها الرجل اللي ميت عليهم

مافي احد في هذي الدنيا ما يحب اهله معروفه ومن غير كلام ولكن مو لدرجه كل طلعه تاخذهم معك والا كل سالفه ما تجيب الا طاريهم وكأن مافي احد غيرهم بهالدنيا !! خذهم جيبهم وودهم لكن مو على حساب راحتنا والا حياتنا الشخصيه
والله بعض الرجال هم اللي يخربون ويحوسون الدنيا
الحين ما نسمع الا طاري ام فلان تسببت في طلاق ولدها من فلانه طيب ليه
ليه الواحد يسمح للظروف الخارجيه تأثر على بيته لدرجه توصل للطلاق والا خراب البيوت؟؟
سبحان الله والله اتعجب من بعض القصص من كثير من اللي حوالينا ونعرفهم واكيد انتو تعرفون ناس كثير من هالنوعيه

يا عالم صرت اسمع قصص كثير ان سبب الطلاق مو مشكله شخصيه بين الزوجين

لا بسبب الام مثلا او اخت الزوج يزنون على راس هالأفتش اللي ما عنده شخصيه ويخلونه يبعد عن زوجته ويتشتتون عيالهم طيب ليه من جد شي يرفع الضغط لما تسمعون قصه انو سبب المشاكل بين الازواج نفسهم تهون عن لو تسمعون ان سببها ام الزوجه او ام الزوج او اي طرف في العايله المصونه !!

الفئه الخامسه فئة الازواج الباردين

تلاقون الواحد برضو ما همه شي دايم ساكت ما يسولف وحده من صاحباتي تقول ان زوجها مافي ابرد منه وتحلف اننا نسافر لمدة ساعات طويله واسولف له عن حياتي كلها وهو ساكت ما يسولف لو افجر الدنيا واعصب عليه بعد ساكت ما يهمه شي ما يهمه هل انا محتاجه له
او ابيه بسالفه ضروريه
والا عندي مشكله ابيه يحلها لي
والا انا مشتاقه له
اه بس يقهرون
صحيح اننا حريم وما يرضينا شي ولكن برضو خير الأمور الوسط
ما نبيه يكون عصبي مره
ولا نبيه بارد
ولا نبيه يكون بدون احساس
ولا انسان ما عنده كيان ورأي وشخصيه بين اهله كل شخصيته يصبها على زوجته وعند اي احد يتدخل ويسبب مشكله من برا تنعدم شخصيته !!
يعني المقصود هنا ان الزوج يوقف كل واحد عند حده
مو بالمضاربه لالا
مثلا يقول يا امي هذي زوجتي ولا ارضى لا لك ولا لها بالظلم ولاني مستعد افرط في احد فيكم
بالله هذي الكلمه شفيها بالله ما تخرس لسان العدو
سواء كان الظلم من الزوجه او الام او الاخت او اي احد غيرهم
والله توقف كل وحده عند حدها مع كامل الاحترام
....
يا زين الحياه بالرحمه والموده والمعاشره الحسنه
يا زينها بالاخلاق وتبادل الاحترام
يا زينها بالنقاش حتى لو بيفرض رأيه علي ولكن بالاحترام كل شي اكيد راح يكون مقبول
يا زينها اذا صارت بالتنازل بس بكرامه
يا زين المشاكل اذا انحلت بين الزوجين بدون تدخل اي طرف لأن المشاكل سبحان الله تزيد ما تنقص
الا اذا كانت مشاكل كبيره مره ومالها حل فهنا لازم تدخل طرف ثالث يكون عنده حكمه مو يزيد الطين بله ويصب البنزين على النار
وهذي نهاية فضفضة متزوجه
فيها بعض مشاكلي مع مشاكل بعض قريباتي وصديقاتي
اسأل الله العلي القدير ان يسخر لنا ازواجنا ويجنبا الفتن ما ظهر منها وما بطن
نسيت اقولكم القسم قلت انه معجزه
لأن فيه حريم يطرحون مشاكلهم ولقيت ردود تسبب الطلاق ما تحل المشاكل
وبرضو اعجوبه لأني استحيت لما شفت حريم يعرضون قمصان نومهم والله من جد ما اقول غير عجبي من هالزمن !!
لا مانع من الافكار والصور لكن بدون عرض اغراض شخصيه جدا جدا جدا جدا شخصيه
بإختصار عيب عيب
......................

قبل لا اختم يا حريم

قريت قصه قصيره في مطويه

واحد يحكي قصته للشيخ يقول يا شيخ انا كل ما اسوي مشكله لزوجتي واطلع من البيت وانا زعلان ومعصب يقول لما اطلع احس اني ابي ارجع البيت واراضيها واتأسف منها ويقول فعلا ما ارتاح الا لما ارجع واعتذر منها يقول يوم من الايام قلت لها انا لما ازعلك اطلع من البيت واحس اني ابي ارجع علشان اعتذر منك مدري ليه ؟؟ قالت له والله انك بس تطلع من البيت اجلس استغفر ربي واتحرى جيتك وفعلا صرت متعوده على هذا الحال في كل مشاكلي بس تسوي مشكله وتطلع اجلس استغفر واعرف بعدها انك بإذن الله راح تراضيني
بعدها صرت انا اتبع نفس هالاسلوب
كنت افكر في كل مشكله تصير لي واجلس افكر فيها وما انساها لين صرت استغفر اللهم لك الحمد صار كل شي يهون علي سبحان الله وصارت المشاكل ما تطرى على بالي ..
يا حبيباتي لا تتركون الاستغفار واكثروا منه سبحان الله شوفوا كيف تنحل كثير من مشاكلكم بإذن الواحد الأحد بس اصبروا ان الله مع الصابرين ..
استغفر الله العظيم الذي لا اله الا هو الحي القيوم واتوب اليه
استغفر الله واتوب اليه
استغفر الله
اختكم في الله ام البتول 2006