موضوع خاص للمتزوجين يتضمن كيفية ترتيب غرفة النوم او السويت

مرحبا صبايا كيف الحال
حبيت ان اطرح هذا الموضوع الخاص بل المتزوجين وكيفية التعامل مع غرفة النوم او السويت وتزيينها
واتمنى من كل قلبي ان يعجبكم هذا الموضوع وينال رضكم
مني لكم اجمل تحية
افكار كثيره وطرق متعدده لتزيين السويت وكل وحده لها حرية الاختيار والتنسيق بذوقها الخاص
العناصر الرئيسيه اللي يعتمد عليها تزيين السويت او غرفة العروسين
الالوان
الاضاءه
الورد
الاكسسوارات
العطور
وبنتكلم عن كل نقطه بالتفصيل
الالوان
الالوان الشائعه اللي تستخدمها العروس للتزيين
الابيض
الاوف وايت(السكري) بتدرجاته الى البيج والذهبي
الاحمر وتدرجاته.. الماروني والعنابي
والفضي والذهبي اللي ممكن ندخلهم على لون التزيين الاساسي مثلا فضي وابيض او ذهبي واحمر
فالبدايه يجب على العروس اختيار لون معين او تدرجات لون مثلا (الاحمر والماروني والعنابي)
وتتبع كل شي حسب هاللون من اختيار لون المفرش ولون الورد والخ..
الاضاءه
لها تأثير كبير يغفل عنه الكثيرين
اضاءه الغرفه لازم تكون هاديه وخافته تعتمد بالدرجه الاولى على الاباجورات والشموع
بحيث تتوزع الاباجورات في السويت في اماكن مختلفه ومتباعده شوي(الاباجورات بتكون موجوده فالسويت من الاساس)
الشموع
لها تأثير رومنسي وتضفي جو حالم وشاعري على المكان وانا شخصيا احب اخلط بين تدرجات لون معين في الشموع وماشتري لون واحد
نوزع الشموع في اماكن مختلفه ويفضل تكون من احجام مختلفه لكن توزع بطريقه فنيه حلوه
ممكن نوزعها عند الكوميدينو والتسريحه والطاولات وانسب شي للطاولات الشموع الطافيه
الورد
بلمسه بسيطه من الورد نقدر نخلق جو ثاني فالمكان
ناخذ ورد طبيعي وننثر اوراق الورد على الكوميدينو قدام الشموع
وممكن على السرير على شكل قلب
او ننثره بشكل خفيف على ارضية الغرفه[/COLOR
وماننسى نوزعه على الطاولات الموجوده
ولو حبت العروس توزع باقات ورد في المكان بشكل منسق وجميل او ممكن تستعين ب فازات
(مزهريات) وتوزعها في السويت وتحط داخل كل فازا كذا ورده بيعطون شكل حلو للمكان
الاكسسوارات
الفازات
سبق وتكلمنا عنها
الثرو
يعطي شكل جميل جدا وراقي ويوحي بالفخامه تلقونهم في محلات الاثاث
والاكسسوارات مثل لايف ستايل هوم سنتر ودبنهامز
ناخذ الثرو ونحطه بشكل عشوائي شوي على طرف السرير او الصوفا او الطاوله
ونلقى الثرو بخامات متعدده ومختلفه ولو مالقيتوا بكل بساطه ناخذ قطعة اورجانزا شيفون او مخمل او القماش اللي تشوفينه مرتب ونرميه على طرف السرير مثلا (وممكن نخلي الخياط يخيط اطرافه)
ولو هذا كله ماتوفر ممكن نشتري كميه من قماش التور مثلا 6 امتار ونقطعه مثلا متر لكل كوميدينو
ونعفسه بطريقه حلوه كأن فيه تعرجات ونحط فوقه الشموع وبعدين ننثر اوراق الورد
المخدات..الكوشنز..الخداديات
وجودها مو ضروري بس مش غلط ممكن نوزعها بشكل مرتب على الصوفا مع الثرو
اللماع او الترتر اوالكريستالات
تلقونهم في محلات الخياطه واللماع موجود في المكتبات ناخذه ونرش منه على اوراق الورد او الشموع بشكل خفيف جدا
وممكن ننثر منه شوي على التور او نوزع الكريستالات بشكل خفيف بتعطي لمعه حلوه
الستاره
واقصد فيها اللي تتعلق على السرير وتكون نازله بهالشكل (طبعا مو شرط بس مجرد اقتراح)
المفرش
في عرايس يحبون ياخذون طقمهم الخاص ويحطونه في الفندق وهالنقطه برايي تغني عن التزيين الزايد لان المفرش بروحه بيعطي فخامه للغرفه وبعض العرايس يستغنون عنه ويكتفون بمفرش الفندق
واللي مو حابه تاخذ مفرشها الخاص افضل انها تركز على تزيين السرير بس بشكل ناعم وانيق عشان يعطي شكل حلو ويغني عن المفرش الخاص
العطور
من اهم واشهر العطور لغرفة العروسين (الخله)
عباره عن مشموم وماي ورد اضافه الى عطور عربيه اخرى تخلط وتوضع في سله ونتركها فالغرفه تقريبا يوم
ونسكر الباب عليها ونشغل المكيف عشان الريحه الحلوه تنتشر والخله معروفه عندنا الحريم الكبار يسوونها
بالاضافه للخله معطر الفراش شي اساسي ومهم لازم لازم العروس تعطر الفراش والغرفه كامله بنوع
من عطور الفراش والبخور او العود وطبعا بيكون من النوع الفاخر وايضا ممكن نمسح على المفرش
والمخدات بشكل خفيف من دهن العود او المسك(فكره اختياريه)
وفي انواع خاصه للعرايس اغلبها يسوونها الحريم وعندنا الانواع العاديه اللي تنباع في المحلات
مثل ليلة خميس من اجمل واكوا كوثر و اكوا زينة الفراش من الرصاصي ورهيف ودانتيل من الشايع
هذي بعض الانواع اللي انا جربتها وعجبتني وحبيت اذكرها لكم على سبيل المثال لا الحصر
تزيين الحمام بشكل بسيط وناعم
وزعي شموع على اطراف البانيو وانثري اوراق الورد
وطبعا عطري طقم الفوط بدهن العود وبخريهم بالبخور وخليهم على جنب في سله
تحياتي
منقول لعيونكم