موظفات الأمن في كليتنا و من أمن العقوبة أساء الأدب

1. فحبيت أنبه عليها..


2. عزيزتي موظفة الأمن:

"بسم الله الرحمن الرحيم"
السلام عليكم و رحمة الله و بركاته..
كيفكم يا أحلى بنوتات؟!..عساكم بخير و صحة و سعادة؟!..
و كيف الدراسة معاكم؟!..الله يوفقنا و ياكم يا رب..
موضووعي واضح من عنوانه..موظفات الأمن عندنا لا أخلاق و لا أسلوب راقي في التعامل خصوصاً الطاقم القديم..ما فيهم إلا وحدة أو اثنين اللي تعاملهم كويس و الباقيين ما شفت أسوأ من تعاملهم في حياتي..
كل فترة لازم أطق لي خصمة و مضاربة مع وحدة أو اثنين فيهم بسبب أسلوبهم السئ في التعامل..
إلى درجة إني مرة وصلت الموضووع لأستاذة/ إلهام اللي موجودة في مكتب د/ أنهار و هي اللي وقفت الموظفة عند حدها..
و كان أسلوبها جداً راقي في التعامل معانا كطالبات الله يسعدها..
و اليوم تكرر معايا نفس الأسلووب الاستفزازي حقهم-حسبي الله عليهم- و ما كنت فاضية لهم فعديت المووضووع..
بس لو تكرر بكرا-لا قدر الله- ما راح يصير لهم طيب أبداً..
خلاصة المووضووع اللي أنا ابغى أوصل لها..بنات أنا زي زيكم طالبة في هذي الجامعة..أحب أجي الصباح راايقة و مبتسمة و ما أحب أحد يعكر لي مزااجي بس لو أحد عكره ما راح أسكت له..
و اللي يقهرني أشوف التعامل السئ من موظفات الأمن مع بعض البنات و البنات-الله يهديهم- يخلوها في نفسهم و يسكتوا..
يا حيااتي..ليش تاكليها و تسكتي؟!..أنا ما أقول لك تخاصمي مع خلق الله ع الصباح..بس أنا كإنسانة أولاً و كطالبة جامعية ثانياً ليا حقوق زي ما عليا واجبات و من أبسط حقوقي إنهم يعاملووني باحترام زي ما أتعامل معاهم باحترام..
و و الله ما خلى هالموظفات يتمادوا و كل وحدة فيهم تتجاوز حدها إلا لأننا سكتنا لهم..
و المثل يقول: من أمن العقوبة أساء الأدب..
ليش نكون أقل من الطالبات الجامعيات في باقي الجامعات و الدول اللي تعامل موظفات الأمن معاهم راقي؟
لييش كل وحدة فينا تسكت عن حقها و تعطي مجال لمثل هؤلاء إنه كل وحدة تتمادى و تتجاوز حدودها؟
يا بنات..هيا شغلتها تنحصر في إنها تشوف البطاقة الجامعية و إذا ما جبتيها توقعي..و توقعي إذا دخلتي لاب توب و تكلمك بأسلووب راقي لو خالفتي في اللبس و لو كررتيها تسحب البطاقة بأسلووب راقي و ترجعها نهاية اليووم و تستناك إذا تأخرتي في الخرووج..
بس مو من حقها أبداً إنها تعطيكي ملاحظات أخلاقية أو مواعظ دينية هيا نفسها ما تعمل بها..
و لا من حقها ترفع صوتها عليك أو تستخدم ألفاظ غير لائقة أو تحرجك قدام أحد..و لا من حقها تتأفف لو تأخرتي لأنه واجبها إنها تنتظرك و هي مبتسمة كمان لأنه من متطلبات وظيفتها إنها تنتظر آخر طالبة تطلع إلى الساعة 5 مساءًبس حاولي ما تتأخري لأنهم عندهم مسؤوليات في بيوتهم كمان لكن لو حصل و تأخرتي و ما كان المووضووع في يدك فواجبها تستناكِ..
و لو إنها تجاوزت حدوودها معاك أو كان تعاملها مو تمام من حقك كطالبة جامعية إنك ترفعي ضدها شكوى بس لا تسمحي لأحد أبداً يتجاوز حدووده معاك..
لا تصرخي و لا تعصبي و لا ترفعي صووتك و خليكي رايقة عشان يصير الحق عليها..
كل هذا الكلام لا يعني إنه موظفات الأمن كلهم سيئات..بالعكس..الطاقم الجديد فيه بعضهم موظفات أمن ذوق و تعاملهم راقي و بعضهم الآخر نفس الأسلووب السئ القديم..
أنا و الله مو متحاملة على موظفات الأمن و في كم وحدة منهم داقة معاهم صحبة لكن كم موقف حصلت لي و حصلت لبنات ثانيين كان في تجاوز من موظفات الأمن لحدودهم..

فحبيت أنبه عليها..

عزيزتي موظفة الأمن:

رجاءً..تعاملي معي باحترام كما أتعامل معك باحترام و خلينا حبايب و خلي لي ذكرى حلوة عندي عشاآاآان أقول الله يذكرهم بالخير موظفات الأمن اللي كانوا في كلية كانوا قمة في الذوق و حسن التعامل و الأخلاق الراقية..خليني أتذكرك بدعووة حلووة يمكن تكوني محتاجتها ذاك الوقت أحسن ما أتذكرك بموقف سئ و تفوتك الدعوة الحلوة و الذكرى الطيبة..
أختكم في الله:

• بسمة الجوري*