نصاايح للزوجات الجافات

1. ادري انه لازم وربي..

مرحبا
هذي نصايح للزوجات الجافات..اعوذ بالله من الجفاف والقحط والفقر
فيه كثير من الزوجات تعاني وتشتكتي من نفور زوجها منها..والا عدم اهتمامه بها..وبمشاعرها..
يعني معطيها اشكل..
وقلة وجوده فالبيت وكثرة طلعاته وهروبه من الجلوس فالبيت..
ف هنا تقول وش الحل؟؟ ووش السوات مع ذا الرجل؟؟
هنا..هنا وبس تلقين الحل عزيزتي الزوجه الجافّة..مع احترامي..
أولا..ناظري نفسك وتأملي في شكلك الخارجي وكيف تهتمين فيه عند زوجك..
يعني بعض الحريم الله يهديهن..بعد ما تتروش تطلع من الحمام تلط مزيل العرق <<مم حدها..
وتعبط شعرها فوق راسها ..تقل جعصن يابس له سنين..وتلبس لها ستيانه فيها ورود والكلوت ازرق.<اقطع ابو التطقيم
وتنصالك ذالك القميص المحلي وتدحدره فوق جسمها وتمشي..
طيب طيب تعالي يامره..
الحين يوم انس تروشتي وش يظرس اذا حطيتي مزيل عرق ابو ريحه حلوه ..وتدهنتي بكريم يسقي بشرتس الشاقصه..
ويوم انس تلبسين الستيانه الملونه والكلوت الازرق..وش يظرس اذا شريتي ستيانه وكلوت طقم..؟؟ هاه؟؟
ويوم انس تعبطين شعرس فوق راسس كنه صعرور ..وش يظرس اذا كديتيه وفليتيه ونفختي لس نفخه صغيره ورا الغره ونزلتي شوي من الغره ..واذا مالقيتي لس غره روحي ياملا العافيه وقصي لس كم خصله لين الحواجب ونزليها على جبهتس هالي كنها ساحة تفحيط من كثر التمعيط.. وصدقيني بتعطيس نعومه فائقه ماتتخيلينها..
واذا حسيتي انه حر والشعر ماينطاق ارفعيه برفق لكن لاتوخرين النفخه واربطيه ذيل حصان والا سويه زي الرول ..عالأقل يفتح نفس زوجس اذا شافس..
طيب ..اذا زينتي شعرس وصرتي مزبوطه وش رايس تاخذين لس قلوس شفاف والا لونه خفيف وتملطينه على شفايفس ..وتاخذين ذاك الكحل وتملين به عينس الفاظيه..صدقيني اذا خليتي هالشي موالس يوميا..بتتعودين عليه ولارح ياخذ منس وقت..صحيح بتجيك ايام كثير تملين من التزين..بس تذكري انك تؤجرين على هالشي ان شاء الله..
طيب الحين الجسم الداخلي زين..نجي للقميص المحلي..الحين وش بلاه هالقميص المشجر كارفته من سنة زواجس الى الحين؟؟؟
المشكله الدولاب مليان قمايص ولالقيتي الا ذا؟؟؟ لاتقولين لي مريح..
طيب وش يضرس اذا شريتي درزن قمايص ملونه ؟؟
عاد موب كل يوم قميص قميص ..تعالي ذاك اليوم واكشخي ببرمودا جنز مع بدي محترم..
وتطلعين وش حليلس..
طيب..الحين خلصنا من الشكل الخارجي بس باقي نقطه..
بعض الحريم الله يهديهن ..مايهمها ان رجلها يشوف ساقها مشعر والا يدها مشعره..عيب يختي عيب..
خصوصا ان بعض الحريم شعرهم ثقيل..وتتعيجز تشيله..مايصير ياحلوه..لا عمرك زوجك يشوفك مشعره ..انتبهي..والا ترا يمكسها عليك في خاطره..
خلي جسمك بدون شعر دايم مدامنك عنده..لايشوف منك اشياء زي كذا..صدقيني حتى لوقليتيلي عادي مايهتم..صدقيني بيتراكم هالشي جوا قلبه..ومتى بتحسين بهالشي..اذا طارت عيونه على حرمة طالع ساقها ووش زينه فالسوق..ذيك الساعه بتعقلين وتتأدبين..وتمشين زي الألف..
طيب..نجي الحين للشغل والكرف..
الحين الحرمه يوم انها تشتكي من نفور زوجها منها وعدم حبه الشديد لها وعدم احترامه لها..وشوله تجيب شغاله؟؟؟
بالله عليكم..الحين الزوج اذا دخل البيت ..وقام دور على زوجته ولقاها في غرفة الغسيل تطلع صرواله من المغسله والا فنيلته والا طاقيته..مرح يأثر هالشي فيه؟؟؟
والا لقاها تكوي صرواله والا شماغه مرح يأثر هالشي فيه؟؟
طيب حتى لو كان عندس شغاله..تعالي ذاك اليوم وكوي ثوبه <<واذا كان يغسله برا..قوليله لا حبيبي اليوم انا بغسله وبكويه وبتشوفه كنه جديد..
ثمن اذا كويتيه وزبطتيه روحي لمه وساعديه فالتلبيس ..وقوليله ها وش رايك في الثوب؟؟
يعني أسألك بالله تخيلي لو زوجك دايم يودي ملابسه للمغسله..ودايم يجي والبيت زي ماهو..ماتغير فيه شي..وانت زي ما أنت شعرس مبعوط فوق والقميص هو هو ..والوجه هو هو..والغدا يالله فالسنه حسنه تظبطينه..والا مطااعم مطااعن..والا الشغاله هي الي تسويه..وشلون تبغينه يتذكر حسناتس عليه ويحترمس لانس احترمتيه وحشمتيه؟؟؟
والا كل ما دخل البيت شم الريحة الحلوه ..وشاف البيت يلق ويلمع..وانت تستقبلينه..صدقيني بيكبر هالشي فيك..(وبيفقدك لو رحتي بيت اهلك)..يعني خلي لك وجود..خليه يفقد آثارك الحلوه..ولمساتك الي تعود عليها..
يختي عالأقل..اذا بغا يهزأس والا يتمسخر فيس والا يمسك عليس شي..مرح يلقى..بالعكس..ذيك الساعه كل الي بيتذكره..شكلك وانت تكوين ملابسه والا شكلك وانت تنظفين المطبخ..والا شكلك وانت تكوين..وبكذا بينحرج ..لأنه بيقول جوا قلبه..الله يجزاس خير قايمه فيني ومدبرتني ومالقيت شي فيس ..صح والا لا؟؟هاه؟
طيب ..نجي الحين للأخلاق وما أدراك مالأخلاق..!!
انت انت يالزوجه الجافه..ليه ماتدورين العيب في كلامك في طريقتك..في اسلوبك..ليه دايم عينك على أخطاءه هو؟
مايصلح كذا..
يعني.. بعض الحريم من النوع الي ينشب لك بكثرة برابيره..وكثرة هذرتها..
ليه ماتحاولين تغيرين من طريقة كلامك..مثلا..تتغاظين عن ذكر التفاصيل الي مالها داعي..
وتقللين من بربرتك اللي مالها داعي..
يعني باختصار لاتصيرين كتاب مفتوح..
المرأة سبحان الله فيها جاذبية..لكن اذا كان زوجها كل ماقالها كلمة خرت عليه مادونها ووراها وش يبقى يجذبه لها؟؟؟
يعني مثلا..ذاك اليوم سويتي غدا مضبوط..وسألك ماشاء الله كيف سويتي هالغدا اللذيذ؟؟
وانت الي ماصدقيت خبر تجين وتخرخرين عليه..ذاك اليوم فتحت النت وقريت عن اسم اكتاب رهيب..وشريت هالكتاب..ولقيت فيه الطبخه وان بنت خالتي قالت لي زيدي عليه كذا..ولاتحطين كذا..وانه لق لق لق لق..يعني وش استفدتي يوم قلتي كذا؟؟
ردي عليه رد راقي ودبلوماسي..قوليله يكفي انه عجبك ياعيوني..والا مثلا..يسلم لي ذوقك ..يكفي انه عجبك..
مهوب لازم تكبين العفش..خليه يدري انك طباخه وبس..من وين؟؟وكيف؟؟ومن علمك..؟؟ موب لازم هالتفاصيل..
وبعدين أيتها الزوجة الشاكية الباكية ..أتمنى تتذكرين كيف كان يعاملك في بداية زواجكم..أكيد كان محترم<<ومالي دخل فالحالات الشاذة لكن هذا الطبيعي..
أكيد كان محترمك وكريم معك..يعني باختصار ليه كان تغيرت معاملته معك.؟؟؟الا يوم عرفك انت وبربرتك..
خلاص عرف شخصيتك..
يعني مثلا ..بس يدق جواله وتطلعين انت..يقول في نفسه اكيد اول سؤال بتسألني عنه..وينك فيه؟؟
ف أنت أيتها الزوجة اللطيفة خالفي توقعاته وقوليله بس بغيت اتطمن عليك..والا وحشتني..
مهوب على طول ..وينك فيه؟؟ الله يعافيك جب لنا عالطريق حفايظ وحليب لمحمد..ياعزيزتي وش هالكلام؟؟ووش هالاسلوب..
أنا أدري انك تقولين في نفسك..اجل وش تبغيني اسوي..هذا شي لازم..

ادري انه لازم وربي..

لكن لاتخلينه يعرف ردات فعلك وكلامك قبل لاتتكلمين..يعني مثلا..عادي دقي عليه وقوليله ابي حفايظ وحليب..
لكن مو كل اتصال تطلبين منه شي..يعني عوديه انك تتصلين عليه احيانا بس تتطمنين وانت لاحظي قلت (بس تتطمنين) لاتقولين وينك فيه؟؟ هذي الكلمة يكرهونها الرجاجيل..ثانيا حتى لو قال لك مرح اعلمك مايحق لك تزعلين ترا..لأن ربي ما أمره بسماع كلامك وطاعتك..وهو غير آثم لو قال لك كذا..
ف اللي اتكلم عنه..انه حلو اذا دقيتي عليه يجي في باله شيئين ..اما انها داقة علي عشان تقولي وينك فيه وابي حفايظ..والا انها داقه علي عشان تتطمن علي..
كذا مره حلو..
لكن اذا كان يجي في باله شيء واحد بس وهو انك بتسألينه عن شي والا تطلبين منه شي والا وينك فيه؟؟
كذا أبدا مو حلو..
الزبده..
زوجك عزيزتي الزوجة..
لاتقع عينه على قبيح منك..ولايرى الا مايسره..(وزياده مني..لايسمع الا مايطرب اذنه)..اما الهذره خليها عنك..
وبس
تحياتي..
1430/8/3ه
فاعلة خير..
يالله بنات انا تأدبت بقوم ارتب الصالة قبل ما يجي زوجي
بأجي والقى ملياان ردود..ترا هذا الموضوع من ايميلي