نصيحة لوجه الله احذرو احذرو من المشاغل والاسواق

1. طبعا انا اروح لحالي اغلب الاوقات لأني ماالقى احد فاضي يروح معي ..


2. 2) اذا رحتي مع خواتك او امك انتبهوا لبعض ولا تتفارقون .

السلام عليكم
كيفكم ان شاء الله طيبين ..
معليش انا بالمقدمات فاشلة فبدخل بالموضوع مباشره
انا دائما متعودة اروح لمشغل في الرياض طبعا وهالمشغل اروح له كثير عشان اشقر حواجبي
المهم كانت عندي حفله يوم الخميس ومضطره اشقر الاربعاء في هذاك اليوم حجزت عندهم الظهر وجيتهم الساعه تقريبا 9 او 9 ونص في الليل ..
وطبعا هالمشغل يفتح 10 الصباح والناس تجي من 9 ماشاء الله يعني زحمه عالمشغل مو طبيعيه ولازم تقعدين تقريبا 3 ساعات عشان التشقير في ايام الاسبوع فما بالك في الويك اند ..
المهم نرجع للسالفة ..
هذي وحده تحكي لي وتحذرني من هالمشغل وانا طنشت الموضوع على اساس انها اشاعه وتعرفون حكي الحريم يكثرون البهارات بعضهم الله يهديهم فقلت ايه اللي كاتبه الله بيصير

طبعا انا اروح لحالي اغلب الاوقات لأني ماالقى احد فاضي يروح معي ..

وفي هذاك اليوم اللي هو الاربعاء رحت عشان اشقر وكنت مستعجله مره خايفه انهم الغوا فاتورتي لأني تأخرت المهم نزلت من السيارة الا الرجال متجمعين عند الباب وتطلع حرمه كبيره بالسن وماسكتها وحده يالله تقدر تمشي وتصرخ وتدعي طبعا انا تروعت مدري وش السالفه وبنفس الوقت مستعجله مااقدر ااجل التشقير الا القى وحده برا واقفه بالشارع سألتها : لو سمحتي وشفيها هذي وش صاير قالت ان بنتها انخطفت عمرها 19 مدري 20 انا تروعت :( ومسكت اعصابي قلت ياربي داخله داخله اول مادخلت مع الباب الا وحده كبيره بالسن ومعها بناتها تدفني وتقولي بصوت عالي اطلعي اطلعي هذولى ماعندهم الا البلا انا طبعا قلبي مدري وين راح هل هو برجولي ببطني المهم اني كنت ارجف كملت دخولي الا العالم زحمه والحريم كلهم واقفين والعاملات كلهم موقفين الشغل وساكيتين وحوسه انا من الروعة صرخت بوحده من الكوافيرات اظنها سورية وقلت لها وش صاير وشفيكم ساكتين مايردون والحمد لله لقيت وحده من قريباتي اللي معزومه معي ليوم الخميس جايه مثلي واجلس معها واقولها قسم بالله اني ارجف وشكل الضغط ارتفع بس مضطره قالت لي السالفة تقول ان البنت مع اختها جالسه قالت لها بروح للحمام وراحت هذا الكلام العصر المهم البنت تأخرت فقدتها اختها لأنه جاء المغرب ماشافتها وتدورها مالقتها ويدقون على الام ويدورن البنت مالقوها جلست الأم تصرخ وين بنتي وهي منهارة ويدقون على الشرطة والهيئه ويوقفون عند الباب ويدخلون حريم تبع الهيئه يدورون مالقوها واعتقد وحده من المشرفات في المشغل قالت يمكن بنتك طالعه وتنهبل الأم قالت بنتي مخلقنه لابسه قميص مثل هذا تأشر على لبسها ويقولون ان الأم والخوات كانو ملتزمين يعني مو حقين هالحركات ..
عاد على كلامهم يقولون ان البنت دقت العشاء على الأم ويقولون لقوها بمركز بعيد حق ملابس وانها ماتدري وش صار لها .. يعني البنت مخدرة او وحده مسويتلها هذاك وش اسمه القمره اللي تخليها تمشي وراها ..:(
الله العالم البنت وش صار فيها ..
الله يستر على المسلمين
المهم انا مابغيت اقول اسم المشغل مع ان كثير يحذروني منه ..
الشئ اللي لازم تنتبهين له هو
انك ماتروحين لحالك لأي مشغل حتى لو انك واثقه فيه لأني انا كنت واثقه فيه بس عقب المشكلة خلاص مااروح الا معي احد
نصايح :
1) لاتروحين لحالك مهما كان سواء متزوجه او مو متزوجه
2) لاتقولين معي بنتي الصغيره او ولدي لا خذي معك احد كبير ويوقف فوق راسك لحد ماتخلصين .
3) انتبهي تبعدين عن خواتك او امك اذا رحتي للمشغل احذري تبعدي عنهم .
4)اذا كنتي ام لبنات كبار انتبهي تخلينهم يروحون لحالهم ترى الدنيا تخوف ..
5) لاتشربين اي شئ من المشغل حتى لو انك واثقه من الكوافيره ترى ماضيعنا الاالثقه العمياء ..
ولاتنسون تحصنون انفسكم بالاذكار
وحسبي الله ونعم الوكيل .. نصيحه ثانيه اتمنى تنتبهون لها
اللي هي في الاسواق ..
1) انتبهي تروحين لحالك سواء سوق نسائي او سوق عام .والله الدنيا تخوف واللي مايخافون الله كثار ..

2) اذا رحتي مع خواتك او امك انتبهوا لبعض ولا تتفارقون .

3) اذا معك بنتك او ولدك انتب بهي عيونك لاتفارقهم ولا لحظه اعتقد الكل عارف قصه الباكستانيه اللي خطفت البنت من العربه حقت السوبر ماركت تخيلو الام مشغوله تاخذ الاغراض وفجأه تلتفت للعربه ماتلقى بنتها وبعد جهد جهيد من رجال امن السوق قبضوا عالباكستانيه اللي كانت بالحمام مخدره البنت الصغيره وجالسه تحلق شعرها عشان ايقال انها بنتها وملبستها باكستاني عشان تطلع من السوق وهي معها من دون محد يشك فيها لكنهم مسكونها ((كل خينه على الله بينه .)).
والله الصغار امانه برقابكم انتبهوا لهم تراني شفت بلاوي كثيره تصير بحق الاطفال بلوتوثات يقطعون يدينهم وفيديو العربية اللي فيه الشحاذه اللي تقول انها تشحذ بولد مو ولدها وانها راحت لمكان بعيد لأنها تنام بالشارع الا تلقى جثث اطفال مرميه تحت جسر ومطلع منها الاعضاء (( تجاره الاعضاء )) وكلها تتهرب للدول الاوربية على فكره الفيديو لدولة عربية ..انتبهوا انتبهوا لاتخلون عيالكم بالسيارة لحالهم وانتبهولهم بالسوق ..
4) اخر نصيحة في السوق انتبهي تتأخرين في المحل في وقت الاذان لأن احتمال يقفل عليك المحل ومحد يدري عنك وبلاوي هالعماله كثيره ماتنعد .. يعني اول مايأذن اطلعي من المحل على طول ..
بنات احذروا احذروا احذروا ..
والله يستر عالمسلمين اجمعين
حبيت اقول اللي بخاطري .. وانصحكم ...
واتمنى تتقبلون النصيحه بصدر رحب ..
وماننحرم من دعواتكم ..
ادعولي الله يوفقكم اجمعين ..