همي مايعلم فيه الا ربي

السلام عليكم ورحمه الله وبركاته
انا عندي مشكله اتمنى الكل يساعدني فيها حتى لو بدعوه صادقه
لاني بأمس الحاجه لدعواتكم لي وربي يعلم
بنات الي لي شهر واسبوعين من تزوجت توني عروس وياليتني ماتزوجت
عشت حياه جحيم آآآآآآه بس والله تعذبت تعذبت كثير يابنات
زوجي خاين اي خاين واعترف لي وقلت له ليش تخون وتكلم غيري ترضى
انا اخونك قال لا مارضى اقوله طيب ليش تخوني ليش تكلم بنات يقول هذا انتصار لرجال
آآآآه يابنات وربي قلبي منحرق على الي سواه فيني مو بس كذا يابنات حتى الضرب ضربني
اهانه واهاني وذل وذلني اكتب لكم وقلبي يتقطع وربي مقهوره
تعبت معه ورحت وعلمت اهلي على كل الي سواه فيني قالوا ليش توك تتكلمين ليش توك
تقولين وينك ليش ماقلتي اول مامد ايده عليك يابنات عطيته فرصه يمكن يتعدل
قالوا لي مالك روحه له الا لمن نتفاهم معه او مع اهله المهم جاو اهله وخذوني معهم
هو ماجاه جات خذتني امه 3 اسابيع وهو هاجرني ينام لحاله وانا انام لحالي حاولت استرجعه
رحت وكلمته اكثر من مره وقلت له خلاص خل ننسى الي راح ونفتح مع بعض صفحه جديده
تونا ببدايه زواجنا وصار كذا اجل بكره لو جبنا عيال وش نسوي .. مو راضي ينام معي مه اني مو مقصره
اغرائات واغريته ولبس ولبست وزينه وتزينت وكل شي سويته له وربي يعلم ماجاه مني اي قصور
بعض الاحيان اموت من الجوع والعطش يقولي نزلي تحت سوي لك الي تبينه ( بيت اهله ) اقوله
وربي استحي ادخل مطبخهم وسوي الي ابغاه هو معند زوجي عنيد وربي عنيد
مرت علي ايام عذاب مايدري عني ولايصرف علي وكله يهاوشني ويصارخ علي لااله الا الله
المهم جا يوم وقالي انا نسيت الموضوع بس ماراح اسامحك الا لمن تقولين لي من الي حرضك
وشلتي الشبكه وديتها بيت اهلك قلت له محد حرضني ياولد الحلال انا بالغلط شلتها لانه
بالكيس الي فيه صوري عشان يبغون يشفونها جيرانه ( صور زواجي ) قالي شلون ماتجي بالعقل
وليش تودين صورك بدون اذني يابنات محد حرضني ولا احد قالي شي رجعت الشبكه ورجعت الصور
بس هو مازال هاجرني ولايدري عني .. قالي اختاري حل من 3

• اما انك تقولين لي من حرضك
• او نتم طول عمرنا كذا انا بمكان وهو بمكان
• اطلقك

يابنات مابي اتطلق انا وربي الطلاق صعب وربي صعب وانا لي بس شهر واسبوعين
يابنات يوم الاربعاء زيارتي بيت اهلي وقلت له يجبني بيت اهلي وجابني من نفسه
يعني ماعصب علي ولا حتى عارض قالي جهزي نفسك اوديك وتجهزت وجابني بيت اهلي
الحين يابنات من يوم الاربعاء ولليوم ماجا خذني من بيت اهلي ادق عليه ومايرد علي
خلاص ذليت نفسي له بما فيه الكفايه تعبت وربي من كثر التفكير
هو ينام وياكل ويطلع اوانا الي افكر واحاتي
ظلمني يابنات ظلمني كثير وربي ماتمنى احد يعيش العيشه الي انا عشتها
الله هو الوحيد الي يدري بكل شي تعذبت باهالزواج عذاب لااله الا الله
امه دقت علي وقالت لي خلي اهلك يجوبونك البيت مابي انا اروح له انا مازعلته
ولا سبيته ولاغلطت عليه اذا حاط بباله اني طلعت اسراره وعلمت اهلي على الي سواه فيني
ترى هذولي اهلي اذا ماقلت لاهلي على خاينه لي وذله لي وضربه لي اقول لمين ؟
انتو ماقدرتوا تدافعون عني تدرون وش يصير فيني فوق تدرون اني اكل او اشرب تدرون اني
مريضه او لا محد يدري ماراح اجي هو جابني من نفسه وماتهاوشنا ولا شي مع بعض نزلت من السياره
وهو مافي شي ابد ليش وش الي قلبه وماجا خذني لايجي ياخذني انا جالسه بيت اهلي معززه
مرفوعه الراس والحمد الله اهلي مو مقصرين معي والله يابنات صابره صابره صابره صابره صابره
يارب عطني على قد نيتي يارب اذا زوجي ظلمني خذ حقي منه عاجلا غير اجلا
يارب لك الحمد على كل شي .. انا فوضت امري كله لك يارب .. يارب ارزقني من حيت لا احتسب
بنات انصحوني وش اسوي انا تعبت وربي من كل شي
انصحوني انصحوني وخففوا عني وادعوا لي يابنات محتاجه لدعواتكم
انا مابي اتطلق وربي الطلاق صعب صعب يارب
يارب رحمتك وسعت كل شي .. يارب انت تعلم مابداخلي فيسره لي عاجلا غير اجلا