هو انا بأبالغ

سلام يا عسولات
بقولكم على شي و ابغى رايكم بنصحكم و تقولولي اذا انا بابالغ او لا ؟؟
الحكاية و ما فيها
ان زوجي احيانا لمن يخرج من البيت و انا ما اكون في ما يعطيني خبر
لا تفهمو قصدي غلط
ما ابغى اتحكم فيه و امنعه لا والله
بس احيانا هو ينسى يقولي انه خارج المكان الفلاني او مع الشخص الفلاني
و لمن اعرف انه ما قالي اقوم الدنيا ما اقعدها مو عشان شي بس عالاقل اعطيني خبر
غير كدا وضعنا الان ماساوي و فوق ما تتخيلو
لاني دوبي والدة و ما اتهنينا ببنتنا بسبب عيوبها الخلقية
و بسبب توقعنا انها ممكن تموت باي لحظة
الله يرحمها برحمته و يفرجها علينا يا قادر يا كريم
يشفيها ان كان في شفائها خير و يتوفاها ان كان في وفاتها خير
المهم الان طالعلي بشي جديد
حكاية الاصحاب
يبغى يخصصله اسبوعيا يوم يخرج فيه مع اصحابه يروحو يلعبو كورة او بلاي ستايشن
و انا بصراحة متخوفة جدا من حكاية الاصحاب
بسبب اللي بقرؤه و اللي بشوفه
اخاف يوم ياثرو عليه و يغيروه
انا واثقة من زوجي و من اخلاقه
لكن الشيطان شاطر و الصاحب ساحب
يعني انا عارفة اني احيانا اكون خانقاه بتصرفاتي
و انا ما ابغى الشي دا
بس والله اخاف من اللي ممكن يحصل من ورى الاصحاب و بلاويهم
هو يقولي انتي مرة متاثرة من القصص اللي بتقريها و من تجارب غيرك
بس انا انسانة اخاف على بيتي اكثر مما اخاف على نفسي
يعني ما ابغى اي شي يصير ممكن يهدد بيتي و استقراري
انا حتى صحباتي فين و فين اروحلهم
لانه الاغلب مو متزوج و ما اعرف ايش في النفوس
لاني سبق و انضريت من صحباتي قبل لا اتزوج
فصرت احذر من كل اللي حولي عشان لا يصير شي لا يحمد عقباه
اللي ابغاه منكم قولولي ايش اسوي و كيف اتصرف؟؟
هو خرج الان مع واحد من اصحابه يغير جو و ما علقت لاني عارفة وضعه و عارفة قد ايش هو محتاج التغيير
و صاحبه دا اعرفه كويس
بس الخوف من الثانيين اللي يبغى يروح يلعب معاهم
و هو قبل لا يخرج اتفاهمت معاه بكل هدوء على موضوع اصحابه دول
و كل واحد فينا مقتنع برايه و خرج و انا متضايقة هو حاول يراضيني بس خلاص
الضيقة اللي فيا اخدت مجراها
انصحوني يا فراشات و قولولي ايش اعمل؟؟!!