واخيرا الجزء الاخير من يا عيونه بس يكفيني عذاب

1. مها:صدق يا خالد؟؟؟...


2. خالد يبتسم بحنيه:إيه والله يا مهاوي...يكفي إنها اختك وبنت عمي...


3. أبوبندر بعصبيته ويرفع صوته:إنتي مالك دخل فاهمه...


4. بالليل الساعة(8)...

الجزء الثامن عشر
عايشه:وشلون؟؟؟....يعني ماعاد راح يطلقها؟؟؟...
فاطمه تفرك يدها بغيض:شكله لأ....
عايشه:سلمى بتصيح من أخوك ما يصير...
فاطمه:وشو اللي مايصير...يعني بيدي شي أسويه وماسويته...
عايشه:فيه...
فاطمه تقاطعها:لأ ما فيه...لأني ألحين أنا وهو ما نكلم بعض...
عايشه:إنتي وتركي؟؟...
فاطمه:إيه...وهي السبب الله ياخذها...
كانت فاطمه مقهوره من اخوها ومن زوجته...ومقهوره اكثر لمن تشوف تمسك تركي بشذى يزيد ويزيد...
فاطمه بعد فترة صمت:عايشه الحل عندك مو عندي أنا...
عايشه وهي تنزل فنجان القهوه من يدها:أنا؟؟؟...
فاطمه:إيه....
عايشه:طيب يله تكلمي بسرعه...
وقعدت فاطمه تقول لعايشه...اللي كانت تستمع...بكل حواسها...
بشاير اللي كانت سهرانه مع سارا......
بشاير اللي كانت تتكلم بكل أريحيه مع سارا اللي تعتبرها من أقرب المقربين لها..
بشاير وهي لامه ركبها بين ذراعينها وحاطه ذقنها على ركبها:سارا الكل انحلت مشاكله شذى وتركي...أمي وشذى...سلمى وتركي...إلا أنا.. مشكلتي مع سعود ما انحلت...
سارا:بصراحه خالي أبوبندر ومتعب واخوانك ما ضغطوا عليه يطلقك...
بشاير:ما يبون يطلع كلام أكثر من اللي طلع علينا..يبون الأمر ينتهي ودي..
سارا:ماراح ينتهي ودي وهو ألحين يبي يرجعك له...
بشاير:مستحيل ارجع له...هو حطمني عشان مشاكل تركي مع أخته وفي النهايه هم تصالحوا ومحد اكلها إلا انا وهو...
سارا بغيض:الرجال كلهم كذا..مافيهم خير..بس يحبون يلعبون الحريم خصوصا اللي تحبهم كل شوي ودهم يغيرون بحريمهم مثل السيارات..
بشاير تبتسم:إنتي ليش هالقد متحامله على الرجال كلهم؟؟؟...
:هي دايم كذا مدري وش مسوين لها؟؟؟؟...
لفوا على جهة متعب اللي كان توه داخل....
سارا تناظر تركي بعتب:وش فيك داخل كذا من دون احم ولا غيره خرعتنا..
متعب يناظرها:خرعتكم؟؟؟...اقول سارا لا تغيرين الموضوع جاوبي على سؤال بشاير...
بشاير بضحك:هلا متعب..شخبارك؟؟؟...
متعب:تمام...
سارا تكلم متعب:والله عاد الجواب عندك تعرف ليش...
متعب يكلم بشاير بمزح:وش اللي خلا سارا تتكلم عن الرجال كذا؟؟؟... وش الموضوع اللي خلاها تتكلم عننا كذا؟؟؟...
بشاير تصرف الموضوع بابتسامه:اسألها...
سارا بتلقائيه:عمايلكم السودا....الله يستر منك يا متعب...
متعب بإستغراب:أفا ليش؟؟؟...
سارا تقول اللي بخاطرها:اخاف تاخذ علي وحده مثل اخوك تركي لمن تزوج سلمى على شذى...
متعب قعد يضحك:من جدك سويره تتكلمين؟؟؟...
سارا:إيه والله من صدقي أتكلم...عاد أنتوا يا الرجال مامنكم أمان...
متعب قام وقعد جنبها:حتى أنا يا سارا؟؟؟...
سارا:والله كل الرجال نفس الشي...
متعب:أضمن لك نفسي إني مستحيل أناظر غيرك...
سارا:وشو الضمان؟؟؟...
متعب يقرب منها يبي يبوسها كضمان لها..
عرفت بشاير بنيته...فتكلمت بسرعه:متعب....نحن هنا...
لف عليها متعب وكأنه يتذكر وهو يضحك:نسيت إنتي موجوده...
تركي اللي كان قاعد مع شذى...
تركي اللي كان حبه لشذى...كأنه حب جديد كأنها امرأه غير اللي تزوجها اول مره...يمكن لمن فقدها حس بمكانتها...
شذى:أقول تركي فيه موعد بكره لفيصل..توديني ولا أروح مع السواق...
تركي:لا طبعا(بابتسامه)أنا اللي بوديك...بس سلامات وش فيه؟؟؟...
شذى:لا الحمدلله مافيه شي...بس فيه تطعيمات لازم ياخذها...
تركي:مشالله الحين كم عمره؟؟؟....
شذى:شهر ونص...مشالله عليك ولدك ولا تعرف كم عمره؟؟؟...
تركي:لا...أعرف عمره بس أبي اعرفه بالضبط...
شذى:احسب بعد ناسيه...
تركي:شذى أبي أقولك حاجه خطيره مره...
شذى انتبهت له:وش هي...
تركي بعبط:إني احبك...
شذى ضحكت وهي مستحيه...وكأنها باقي بشهر العسل...
شذى:أتمنى ذلك يا تركي...
تركي:ماذا تتمنين يا عزيزتي؟؟؟...
شذى بعباطه:أتمنى أن تكون محقا في حبك لي...
تركي:ألا تفهمين إنني احبك جدا..وعاشقا لك يا حبيتي..
شذى:أنا اعلم أنك تريد ارضائي فقط بكلامك هذا...
تركي:وعشاني بعد أحبك(يضحك)بصراحه مااعرف اتكلم فصحى ومااقدر أجاريك بكلامك فصحى....
شذى تضحك:ياحليلك وانت تتكلم فصحى أبد مو لايق عليك...
وبعدها قامت...
تركي:وين رايحه؟؟؟....لا تقولين لمحرابك بعد؟؟؟...
شذى بابتسامه تبي تقهره:على قولتك لمحراابي...
كانت علاقة تركي بشذى في تحسن مستمر..بس باقي نظام الفندقه عايشين فيه...على حسب شرط شذى...او يقضي الله أمرا كان مفعولا؟؟؟...
محمد:ما أقدر أتدخل يا سعود...
سعود: داري بس وش الدبره ياخوي؟؟؟؟...
محمد وهو يحط يده على كتف سعود:اصبر وانا اخوك...إن الله كان مع الصابرين...
يوخر سعود يد محمد بعصبيه:اصبر؟؟؟...لا تقعد تلعب بأعصابي كذا...
محمد يضحك من أخوه:والله ما بيدي شي...
سعود بعصبيه:والله مايحس بالنار إلا واطيها...
محمد يستهبل:واللي يده بالنار مو مثل اللي يده بالمويه...
سعود:محمد انا اتكلم معك من جد وانت تتطنز...
محمد:لا والله ما أتطنز...بس اقولك ما بيدي شي تقولي وش اسوي أقولك يا سعود ما بيدي شي تقول وش اسوي اقلقتني يا خوي...
سعود وهو قام من العصبيه:الشرهه على اللي يستشيرك...
محمد:لا تكون بس زعلت مني يا سعود؟؟؟...
سعود:ما زعلت بس قاعد ترفع ضغطي...وانا اللي فيني مكفيني...
محمد:ليه وش فيك يا بعدي؟؟؟...لا يكون وراك بيت ومره وعيال؟؟؟...
سعود:يعني بس هذا هو الهم عندك انا اقصد بشاير بس انا الغلطان اللي كلمتك...
وطلع من عنده معصب....محمد صدق شوي متحسف على سالفة سعود وبشاير بس من صدق ماعنده حل لهالموضوع؟؟؟....
بعدها بيومين...
سلمى وهي قاعده بالبلكونه على الساعه10 بالليل وتكلم عادل...
سلمى:عادل حبيبي...مدري وش أقولك...
عادل::والله العظيم احبك وودي أشوفك قريب يا سلمى...
سلمى:قريب؟؟؟...
عادل:ودي هاللحظه...ودي احطك بعيني واغمضها...
سلمى بحزن نابع من القلب:عادل شكل علاقتنا ما راح تكتب لها الحياه...
عادل بخوف:ليه تقولي كدا؟؟؟...
سلمى حزينه:أبوي واعمامي يبون يذبحون حبنا يا عادل...
عادل:ليه؟؟؟...
سلمى:في موضوع خطير وحساس ودي اقولك بس ما يصلح التليفون...
عادل بتوتر:حبيبتي شوفي....أنا بعد اسبوعين بنزل الرياض...راح اشوفك بس على الاقل قولي وش الموضوع بإختصار...
سلمى والدموع تتجمع بمحاجرها:اهلي زوجوني من ولد عمي المتزوج... تخيل يا عادل...وهو شكله ما يحبني...ماخذله وحده شينه وأنا...
يقاطعها عادل بغضب:سلمى إيش تقولي من هذا الحيوان اللي خذاك مني...
سلمى بدت تصيح.......
عادل بنفس وتيرة الغضب:وكيف يصير مثل هذا ولا تقولي لي يا سلمى..
سلمى لا تزال تصيح...
عادل:آآآآخ يا سلمى لا تبكي...وقولي لي وش صار بالتفصيل...
سلمى من بين دموعها:ما اقدر أتكلم يا عادل..إنت تعال وانا بأقولك...
عادل بعصبيه:وش راح يصبرني اسبوعين؟؟؟...وكيف حبيبتي تبكي وتبيني اصكر السماعه...
سلمى:عادل إذا كان لي خاطر عندك بأصكر ألحين..وإذا جيت بأقولك...
عادل بقلة حيله:خلاص أوكيه...بس سلمى إذا شفتي نفسك احسن طمنيني عليك لو بمسج طيب؟؟؟...
سلمى بحب:إنشالله..
وصكرت سلمى..ولمن كانت تبي تدخل البيت شافت عايشه واقفه بعصبيه..
سلمى بلوعة كبد من اختها:خير وش تبين؟؟؟...
عايشه:وش قلة هالحيا اللي انتي قاعده تسوينها؟؟؟....
سلمى بقهر:الله ياخذك انتي وولد عمك ومرة ولد عمك كلكم زين وبنت عمك هالعجيز الكبيرة راس الحيه...انا مدري وش خلاني ادخل عرض بحياة تركي ومرته...لا هو اللي ظبط معي..ولا أنا اللي عشت حياتي...
ودخلت سلمى بعد ما وخرت اختها بعصبيه...
أما عايشه فكانت مستغربه و معصبه...بعدين لحقتها وقعدت تهزأ فيها وإن سلمى من جد ناقصتها تربيه...
بالعصر يوم الخميس....
أم بندر:أقول يا أبو بندر..ورى مانطلع كلنا للمزرعه مع العيال...
أبو بندر:ودي والله...بس ألحين فيها عمال قاعدين يبنون الملاحق الجديده فيها...
ام بندر:طيب متى بيخلصون؟؟؟..
أبو بندر:الله اعلم...بس بندر هو المسؤول عنها...
أم بندر:خذت حيلي بشاير....مره صايره انطوائيه وماتكلم احد...
:أحلى يا اللي تقول انطوائيه..والله الوالده مثقفه...
إلا يناظرون بندر عند الباب...
أم بندر بثقه:مثقفه غصبن عليك وعلى عمتك هالعجيز بعد...
حصه وهي داخله:ما العجيز إلا انتي يا السعف والليف..ألحين ماتقولين وش دخلني أنا؟؟؟...
أم بندر تضحك بمكر:عشان اتغدى فيك قبل لا تتعشين فيني...من شفتك داخله قمت احارشك قبل لا تتحرشين فيني...
أبو بندر يبتسم:هلا والله بالعزيزة الغاليه...حياك....
بندر:مو أنا السواق اللي جايبها هاه؟؟؟؟...
أم بندر:تعال اجلس بجنبي...ماعليك منهم....
تركي اللي راح بيت عمه أبوعبدالكريم....عشان يزور عمه...وأكيد عشان سلمى بعد...
تركي:وش فيك يا سلمى مادّه البوز؟؟؟...
سلمى تناظره بإحتقار وزعل:.....................
تركي يرفع حاجب وينزل الثاني:طيب ممكن اعرف سر هالنظره؟؟؟...
سلمى شالت عينها من عليه وقعدت تطالع السقف بتملل...
تركي ارتفع ضغظه منها:سلمى حركاتك هذي ماتمشي عندي.. اعقلي وتأدبي وعن هالنظرات...
سلمى تناظره:إنت اللي حركاتك ماتمشي عندي...أصلا أنا اعرف وش سر حركاتك هذي كلها...إنت تبي تنفرني منك...تركي إذا ماتبيني ترى حتى انا ما ابيك...
تركي اللي سكت يمكن كان كلامها حقيقه بس هو قاعد يتهرب من هالحقيقه..
سلمى:كلامي صح ولا؟؟؟...
تركي بإستخفاف:اشك بعقلك...من جدك تتكلمين ولا تبين تسوين جو...
سلمى:طيب قول كلامي صح أو لأ؟؟؟...
تركي:طبعا خطأ...ولو كنت ما أبيك كان ما أخذتك من الأساس... على بالك إن الزواج بالعافيه...
سلمى اللي كانت تعرف الحقيقه كاملة وكيف إنها اخذته جد بالعافيه..
سلمى:ليش لأ؟؟؟..بعض الأحيان يكون بالعافيه...
تركي:وش عندك اليوم..شكلك تبين هوشه...
سلمى:إنت اللي تبي ولا تحاول تلصقها بغيرك...تركي أنا عارفه إن مرتك الخايسه الشينه هي السبب بكل اللي يصير...تذكر كنت وش حليلك معي لمن كانت عند اهلها...بس الحين من رجعت وولدت وهي ماخذه وقتك كله..
تركي يقاطعها بضيق:شذى مالها دخل..ومالك دخل عن كان وقتي لها كله او لأ...اتوقع هالشي مالك دخل فيه يا سلمى...
لحظتها ناظرت سلمى تركي بخنق وعصبيه...خلاص كرهته وماعادها طايقه تناظره...تنتظر قدوم الحبيب ونصفها الحقيقي عادل؟؟؟...
شذى:هلا بشاير وينك؟؟؟...
بشايرتتطنز:بالرياض...
شذى تضحك بسخافه:احلفي؟؟؟...على بالي بسكاكا..
بشايرتضحك:فال الله ولا فالك...
شذى:يالله من جد اكلمك...من زمان ماعاد شفتك...
بشاير:الجامعه الله ياخذها إنشالله...
شذى:طيب متى مافضيتي مرّي علي....
بشاير:اوكيشن...
شذى:يالله باي...
بشاير:باي...
صكت شذى على دخلة تركي البيت...
تركي:وش فيك صكيتي؟؟؟..
شذى:لا بس كنت اكلم بشاير...ولمن صكيت كنت داخل...
تركي: تدرين إني داخل أبي أنام وتعبان....
شذى:طيب روح نام...بدل ماشكلك كذا يكسر الخاطر...
تركي:شكلي يكسر الخاطر انتي وخشتك...
شذى:من جد والله يا تركي روح نام...
تركي وهو قايم:يالله تصبحين على خير...
شذى:وإنت من أهله...
قعدت شذى تناظره إلين ماطلع فوق...وهي تحس بأن حبها له مايموت او مستحيل يموت...على كل اللي صار منه...على كل اللي سواه...
لايزال حبها...
لايزال نبضها...
لا يزال حياتها...
بالشرقيه...وبالتحديد في بيت خالد ولد ابومحمد...
مها:اقول خالد...
خالد:هلا...
مها:مادريت إن اختي منال انخطبت...
خالد اللي فرح من جد لمنال:من جدك تتكلمين؟؟؟...
مها بفرح:إيه والله...
خالد:متى وكيف؟؟؟....ومين اللي خطبها؟؟؟...
مها تضحك:ههه شوي شوي علي من هالأسئلة...
خالد يضحك وضربها بخفه على كتفها:طيب يله تكلمي...
مها تبتسم:توها انخطبت الأسبوع اللي طاف...ويمكن على الأسبوع الجاي تكون شوفتها...واللي خطبها واحد من طرف خوالي يصير لنا من بعيد بس مو مره نعرفهم...
خالد:طيب أكيد أختك موافقه...ولا كعادتها بعد الشوفه ترفض هي قد سوتها من قبل مرتين...
مها تبتسم:لا إنشالله أكيد...لأنها حتى هي مقتنعه فيه مره...
خالد:الله يوفقها...والله فرحت لها مثل ما فرحت لأختي شذى...

مها:صدق يا خالد؟؟؟...

خالد يبتسم بحنيه:إيه والله يا مهاوي...يكفي إنها اختك وبنت عمي...

مها حست بالدموع بعيونها... وش كثر تحب بخالد...وش كثر تحب فيه حنيته وصبره عليها...وش كثر تحب فيه حلمه وعقله... للحين هو عايش معها ولا مكدر صفو حياتها معه أي شي غير تأخر إنجابها لسنين طوال وهو صابر راضي...
تذكرت لمن كلمت أختها اليوم الصباح...وقالت لها عن الخطبه... وإنها موافقه علي التقدم لها...لأنها غسلت يدها من سعود...أو بمعني أصح انزاح حبه من قلبها...لأنه لا تقدم لها أو لمح بشي بكذا...فحست على كرامتها إنه بتنهان...فقررت إنها تستأنف حياتها اللي كانت بتضيع في حب سعود الواهم ..
سعود:ياربي وش كثر كلامك...خلاص قاموس اللغه العربيه خلص وإنتي كلامك ماخلص...
شذى بفشيله:اقلب وجهك...وعطني أمي...
سعود يستهبل:على أي صفحه؟؟؟...
شذى:على الفهرس...
سعود:تكفين لا تنكتين...لأني احس بغثيان...
شذى:طيب عطني أمي...
سعود:اسمعي قبل...سلمي لي على بشاير...
شذى:والله اللي مايستحي...طيب عطني أمي...
سعود:قبل ما تقولين ليش قلتي كذا؟؟؟...
شذى بجدية:من جدك تتكلم يا سعود...
سعود:إي والله...
شذى:سعود إنساها...أحسن لك إنساها...
سعود بحزن:مستحيل انساها...
وراح عطى أمه الجوال وكانت في المطبخ وراح لغرفته على طول...
أم محمد بإستغراب:ألو؟؟؟؟....
شذى:هلا بام محمد...هلا بأحلى أم...
أم محمد بفرح:هلا والله بأم فيصل بقلبي...
شذى:شخبارك؟؟؟...
أم محمد:بخير والحمدلله...بس وشفيه أخوك عطني السماعه وراح وكأنه زعلان...
شذى واللي كانت تعرف السبب:تعرفين سعود..في كل ساعه له ألف حالة..
أم محمد:الله يصلحه بس...
شذى قعدت تسولف مع أمها....
.
.
أما سعود هل كان من الممكن أن يمر كلام شذى مرور الكرام...طبعا مستحيل...أن ينسى حبه لبشاير...اللي اغتاله بكل وحشيه في لحظة غياب عقله...أن ينسى تأملات هذا الحب ووجده...أن ينسى بشاير واحلامها الطاهره معه...أن ينسى حبه الذي جاء على طبق من ذهب... أن ينسى نفسه...فهي نفسه...يريد العودة...يريد التوبة...يريد السماح... فقد اقترف غلطة قد يندم عليها طوال حياته...
أبو بندر اللي كان هذا ثاني مره يكلمها....
أبوبندر: بشاير حرام عليك اللي تسوينه فينا؟؟؟...
بشاير باكتئاب:وش سويت يباه؟؟؟...
أبو بندر:شوفي نفسك...ماعاد صرتي مثل أول...ماعاد صرتي تجيني مثل اول...ماعاد يأثر فيك شي...ليه كذا؟؟؟...انا مقصر معك بشي؟؟؟...
بشاير تهز راسها بالنفي...
أبو بندر بحزن:بشورتي...تكلمي...ليه كذا صايره حزينه...قد صرتي أحسن من كذا وش فيك انتكستي ورجعتي؟؟؟...
بشاير:يباه انا بخير...بس انتوا لمن تشوفوني مشغولة بالجامعه... تقولون زعلانه وغيره...
أبوبندر بمثل الدمعه تلمع بعيونه:أحس بالقهر عليك كذا يا بنيتي.. كله من هالسعود حسبي الله عليه...من اليوم باكلمه وأخليه يطلقك...والله لأجرجره في المحاكم وبين الناس...إن ماخليته يتأدب وتحسف على يوم جيته بالدنيا..
كان أول مره أبو بندر يقول كلام مثل كذا..كان يقول بغيظ..غيظ وغضب الأسد الجريح....كان أبوبندر عنده بشاير غير..يمكن لأنها اصغر عياله.. ويمكن لأنها انهانت بالصميم...ويمكن لأنها لاتزال طفلته اللعوب...
بشاير برجاء:لا تكفي يباه ما ابي فضايح أكثر...
أبو بندر بعصبيه:إحنا صبرنا ولصبرنا حدود...
بشاير برجاء والدموع باقي بعيونها:تكفى يباه...ابوس يدك لا...
أبوبندر بعصبيه حاده جدا:إنتي مالك دخل...هذا شي بين الرجال....
بشاير بدت دموعها تنزل:يباه لأ...الله يخليك...تكفي لأ...هذا بس طلبي الوحيد...
زعل أبوبندر بزيادة حس بالإهانه خصوصا لمن حس إن بشاير لا تزال تحب سعود...

أبوبندر بعصبيته ويرفع صوته:إنتي مالك دخل فاهمه...

ويقوم من عند بنته ويطلع من غرفتها...كان متعب وام بندر واقفين يسولفون بالدرج...لمن سمعوا صوت ابو بندر معصب...راحوا له بسرعه عرف السالفه متعب من أبوه لمن سمعه يصرخ ومعصب لمن يقعد يقول سعود وبشاير...ويقعد يدعي على الساعه اللي عرف سعود فيها...
راح متعب بسرعه لبشاير شافها تبكي بصمت وهي تناظر فيه...
متعب:ممكن أعرف وش السالفه؟؟؟...
بشاير تصيح:ما فيه شي...
حاول يعرف السبب بس ماقدر منها...لأنها ياهي ساكته...ياهي تصيح.. او تقعد تطلبه إن تخلي أبوه يصبر شوي بدل العجله على سعود...
بعدها طلع متعب من عندها متأسف على حالها...بس بعد ماشاف حال أخته وحال أبوه واهله..أصر إلا لزم إنه لازم سعود يطلق بشاير باقرب فرصه..
بعد ما طلعوا من عند بشاير قعدت تصيح...صح هي تعبت مره أول ماتركها سعود وانجرحت جرح غائر من الصعب ان يلتئم.. بس بعدها تحسنت حالتها...بس لها تقريبا ثلاث أسابيع رجعت لبكائها..لحزنها.. لشوقها...لحبها...لقلبها...رجعت مشاعرها تتجدد...لم يكن من السهل أن تنسى سعود...ولم يكن من السهل أيضا أن تعود تحب نفس الشخص الذي جرحها وادماها حتى النخاع...
راحت بشاير وفتحت جوالها وهي تمسح دموعها..راحت للرسائل للحافظات كانت موجوده حافظه بإسم: (حبي)...
قرت بعض الرسايل اللي كان مغرقها سعود فيها...
(يسري لك الهاجس من الوجدان مدفوع
وترتاح لك نفسي وتنسى عناها
واشرب حنانك من جفا الوقت ينبوع
وتشتاق لك عين بشوفك هناها
عين سقت ورد الهوى عشق ودموع
يوم المشاعر أرسلت لك غلاها)
وكان فيه مسج ثاني منه
(القلوب الوفيه ماتنسى ساكنيها
وقلبي بالمحبة يمسي على اغلى من سكن فيها)
قعدت تصيح وانسدحت على جنبها..
(ودي المس كل جرح يتعبك...
ودي اداويه وألمك واجمعك...
ودي اضمك لصدري وتغرق أنفاسي معك..
ودي دوم جنبك مثل ظلك اتبعك..
ودي ابكي فوق صدرك واقول آآآه
وينك يا مخفف أوجاعي اشتقت لك)
قعدت تصيح بقهر...وقعدت تقرى آخر مسج وصلها منه...
(تصدق بسمتك والله تفرح خاطري الولهان..
يطير من الفرح قلبي واصير بعالم ثاني...
والى من شفتك بضيقه احس إني انا الغلطان..
أعاتب نفسي بنفسي ولو ماكنت أنا الجاني...
حبك بداخل عروقي ولا يوصل لحبك إنسان..
يمر الوقت وبثبت لك حبي لك إن الله أحياني...)
وصل هذا المسج في هذاك اليوم الشؤوم...قعدت تصيح..تحس بالجرح وبالحب وبالشوق...الذي حاولت تقتله..بس للأسف كان اقوى منها بكثير..
وبالفعل أثبت لها سعود حبه العظيم لها؟؟؟...
وبعدها ضمت جوالها لصدرها...ولمت نفسها بطريقه مكورة وهي منسدحه تحاول تجمع كيانها المبعثر...تحاول تكتم على حبها لا يفضحها أكثر... تحاول تحس بالحب والحنان اللي فقدتهم من شهور طوال...

بالليل الساعة(8)...

بندر اللي كان جالس مع عياله في جلسة يمكن تسمى(كرسي الإعتراف) كان اول مره يسويها...بس لقى هذا أفضل حل خصوصا بعد ما أشار عليه خويه إنه يزور اخصائي اجتماعي ونصحه بهالشي في بداية عودة أولاده للجادة الصحيحة...
بندر:الحين ممكن أعرف وين رحت يا فارس امس..ماجيت إلا الساعه 2 ونص بالليل وإحنا بنص الأسبوع؟؟؟...
فارس اللي كان مستغرب من سؤال أبوه له...
فارس:ليش تسأل؟؟؟...
بندر معقد حواجبه:من دون ما تسأل...قولي وين كنت؟؟؟...
فارس:طيب من اللي قالك؟؟؟...
بندر يصرخ:فارس....تكلم احسن لك...
حاول فواز إنه ينسحب من دون ما يحس فيه ابووه...
بندر يلف على فواز:فواز...اقعد و يا ويلك لو تقوم...
ويلف على فارس:تكلم...
فارس:كنت سهران مع أخوياي...
بندر:والجامعه؟؟؟؟..
فارس:وش فيها الجامعه؟؟؟...
بندر بسخريه:ينتظرونك تقص شريط الإفتتاح...وش يعني ماعندك دروس.. ماعندك محاظرات...
فارس وهو يبلع ريقه:اليوم ماعلي محاظرات قبل الظهر بس..
يقاطعه بندر بعصبيه:انطم ولا كلمه تكذب على يافارس...
فارس مات خوف مكانه...
بندر بعصبيه:قسم بالله لو تكذب على أكثر من كذا لاقطع هالعقال على ظهرك فاهم؟؟؟...
هنا فواز مات ضحك مع مره خايف من أبوه...بس كان شكل أخوه يضحك مره..
بندر:وأنت اثبر بعد...
فارس مقهور:تقولي أنا انطم...وتقوله انثبر...وش معنى؟؟...
بندر بإستغراب مع عصبيه:يعني انثبر أهون من انطم...
فارس:طبعا...احسك تقولها لي يباه بحماس..وبعدين انطم مره قويه...
بندر:أقول فارس والله لو ماتتأدب...ومالك دخل فيني أقول اللي ابي فاهم.. بس شكلي ماعرفت أربيكم زين...
فواز:الحمدلله ماقلنا شي إنت تكلمت بنفسك...
بندر:أنا على بالي إني تارك رجال..بس شكلكم أبد بس والله لأعلمكم التربيه من أول وجد وجديد...
وبالفعل تغيرت معاملة بندر مع عياله وصارت الصرامة الشديدة جدا هي المفتاح الأول لخروج أبنائه من حالتهم المخزيه...
كانت شذى رايحة مع تركي لكوفي من دون فصولي الصغينون..
شذى:وش عندك عازمني على قهوه...اول مره تسويها من تزوجتك؟؟؟...
تركي بابتسامه:قلت تغيير...
شذى:وش سر هالتغيير؟؟؟....
تركي بنظرة مكر:شي اتمنى اغيرة...
ضحكت شذى بصوت عالي..
شذى تناظر تركي:يا حليلي والله يا تركي...
تركي بإستغراب:ليه؟؟؟..
شذى:لأني عارفه وش السبب...بس لمن يصير اللي براسك بيرجع الروتين لحياتي....خلنا كذا احسن يصير شوية اكشن...
تركي:أكشن هاه؟؟؟....أقول مالت عليك بس...
شذى:طيب ليش ما خليتني أجيب فيصل معي خله يتونس شوي...
تركي بقهر:ماعندك غير هالفيصل تشلينه معك بكل مكان تروحين له ترى من جد لاعت كبدي منك ومنه ومن حبك له...
شذى تناظره باستغراب....
تركي مقهور:ترى كل الحريم عندهم عيال مو بس إنتي... إنتي شوفي نفسك كيف أهملتيها عشانه..بعدين بيكبر وبيتزوج وبيسحب عليك وما بيبقالك غير تركي...
شذى بضحكة سخرية:قول مقهور وارتاح...
تركي يكابر:قالوا لك مجنون...اغار من ولدي...
شذى:إيه مجنون...وموت بغيرتك...وكلامك اللي قلته تو بيزيدني أتمسك بولدي...وإنت ادري إنك مقهور لأنك(تقولها بدلع)صفر على الشمال...
تركي بمزح مع جد يمسك يدها اليمين بقوة وهي تحاول تفك يدها منه بس مهيب قادرة...
تركي:أنا يا أم شوشه صفر على الشمال...
شذى بألم وهي تصر على اسنانها:فك يدي..ولا تخليني أصرخ...ترى إحنا بمكان عام...
تركي يزيد:يقالك تهددين...
شذى وهي تترجى بعيونها:الله يخليك فكني...
تركي:ببوسة...
شذى تفتح عيونها زياده:تركي؟؟؟....واللي يرحم امك فكني...
فكها تركي وقاعده تدلك يدها من الألم...
شذى تناظره:وحش...
تركي بطنازة:يا الحسناء....
شذى:غصب عنك...
تركي:إنتي ليش الحين كلامك ابد مافيه رومانسيه...
شذى:بالعكس أحس إني انا ألحين بقمة الرومانسيه...
تركي:باين يا قلبي....
شذى بعد فترة صمت:تركي...
تركي:سمي...
شذى بهمس:الله يخليك لي يا تركي...
تركي:والله يخليك لي يا شذى...
هنا حط تركي يده على خده وقعد يناظرها...أما هي فقعدت تناظره.. التقت عيونهم بحب...وبشوق..يحاولون يعدلون ويصلحون اللي بينهم.