يوم شوفتي فشايل تشيب الراس

1. المهم جا الوقت و لازم ادخل عند العريس و بدأت الفشايل :

راح أدخل في الموضوع على طول و بدو مقدمات
نبدأ مع يوم الشوفة
هاداك اليوم كنت بشتغل في الصباح و سمعت على راديو ام بي سي واحد بيقول انو يوم ملكتو قال لخطيبتوا مبروك قام خطيبتو قالتلو الله يبارك فيك ... عقبالك و أنا طبعا فرطت ضحك و نسيت الموضوع
و كمان يومها انكسر 3 من اظافري فاضطريت مجبرة اختك لا بطل اني اركب اظافر

المهم جا الوقت و لازم ادخل عند العريس و بدأت الفشايل :

من كتر ماني مرتبكة دخلت و رحت لأبعد زاوية في الصالون و أم العريس تناديني عشان اجي جنب العريس و انا مسوية يعني اني مو سامعة آخر شي طلعت هي و اخواتو برا و سابونا لحالنا فقام العريس و قعد جنبي و بالغلط جلس علي يدي
سألني أسئلة زي ايش اسمك كم عمرك ايش تدرسي الخ الخ و بعدها بدأت الفشايل
سألني ايش رأيك في الجواز تدروا ايش قلت ؟؟ خير و بركة خير و بركة و ما تتخيلوا ايش صار فيا كتر ما ضحك عليا
بعدين مشيت الامور و وافقنا و قمنا وقفنا عشان يلبسني الخاتم و هو بيدخل الخاتم في صباعي جات يدو على الضفر
و يطيح الضفر على الأرض و انا شوية و أبكي من الفشلة و هو يقول معليش معليش حصل خير حصل خيرفجأة نزلنا احنا الاتنين في وقت واحد عشان نجيب الضفر و فجأة ... طاخ
راحت الروس في بعض
ما قدرت اتحمل بكيت و قلت خلاص ما ابغى بطلت و طلعت اجري من الصالون و بالقوة حتى قدروا يغيروا رأيي و يرجعوني للصالون بس أول لصقت ضفري بعدين رحت
المهم لبسني الخاتم بدون ما يطيح الضفر الحمد لله و قللي مبروك بس انا ما رديت
كنت لسا مستحية من الفشلة اللي صارت
و خرجت امو و اخواتو و دخل ابويا و اخواني و اعمامي و كلهم باركولنا و انا برضو مارديت شوية الا الرجال يرجع يقوللي تاني مبروك قلت خلاص يا بنت عيب ردي لا يحسب ما تبغيه و لا شي بس يا ريت
مارديت
تدروا ايش قلت ؟
قلت الله يبارك فيك عقبالك
شكلها قعدت في بالي من الصباح لما سمعتها في الراديو
شوية و أشرلي أبويا اني اطلع من الصالون و أنا ما صدقت على ربنا قلت أخيرا ؟ الحمد الله بصوت عالي
سمعو الكل الله يقطع الغباء
يومها مو بس فشلت نفسي فشلت ابويا و اخواني و اعمامي و بعد ما خرج الكل
اخدت من اخواني اللي فيه النصيب من التهزيئ و البهدلة
و لما اشتكيتهم لأبويا قللي تستاهلي يا خبلة فضحتينا
إهئ إهئ