إخذيني مابيني الكاتبه صوت الدفا

روعه
الروايه كامله ولا لا

ييس حبووبه الروواايه كاامله ....
بانتظار الفراشات؟ ؟ ؟

وهذا الباارت ( 2 )
كانوا جالسين والهدوء طاغي .. ماغير صوت الملاعق اللي تضرب في الصحون ..
فواز اهدى واحد فيهم .. وجود الثلاثي امه وابوه وفهد .. يخوّفه شوي ..
دايم يجلس جمب اخته .. بهالطريقة يحس بشوية اطمئنان
تحس به هي ..!
شبعت فدوى وتركت صحنها قايمه .. ومن شافها قامت ترك ملعقته وقام واقف وراها
ابو فهد : فواز ماكملت اكلك
.... : اكلي .. انا .. خلصت
فهد بزمره : بلا حركات بزارين , شفتها قامت ورحت تقوم وراها
فدوى وهي تهمس لفواز : اجلس كمل
فواز وعيونه تنطق بخوف : لا
رجعت فدوى تجلس عشان يجلس معاها .. تراقبه لين يخلص صحنه
كل مامسك الملعقة بالمقلوب يحاول يجمع بها الرز .. تقلبها له ..
والبقية كالعادة لاهين في أكلهم ,, وفي برنامج شدهم على التلفزيون ..
بعدما فضى صحنه تقريبا وقام .. راحت غرفتها وهي تدندن .. تحاول تسكت صوت مشاعرها اللي تخليها تضيق بشكل غير طبيعي .. من يجتمعون كلهم .. ويستلمون فواز
رفعت شعرها لفوق .. وصلّحت بلوزتها وكان فواز واقف عند باب غرفتها يراقبها ..
ابتسمت له : شفيك فواز تبي شي ؟
قرب فواز بابتسامه حلوه : حلوه .. انتي .. فدوى
استحت : ههه شكرا ..
.... : بس .. صبا .. لاتزعلين .. احلى ترا
ضحكت بضيق وهي تطلع له ويمشون سوا : ههه طيب هي احلى , بس ترا صبا (وتهمس له ) دايم تقول فواز مو حلو
....... : كذابه , بسألها .. اليوم .. اذا جت .. بسألها
تغير وجه فدوى لانها عارفه انه بيلازم غرفته : خلاص اسألها
ضحك فواز ودخل يشغل السوني بسعاده ..
بعد صلاة العصر .. دخل ابراهيم الصاله .. وابتسم بهدوء لما شاف ابوه يطالع تلفزيون .. وديم جمبه نايمه , وهو يطق على ظهرها بخفيف : نام ياحبيبي نام .. واذبح لك جوزين حمام
ضحك ابراهيم : بس يبه ترا كذا بتتدلع علينا ..
حمود : شنهو ؟
.... رفع صوته وأشر على ديم : اقول ترى البنت كبرت وانت مازلت تنومها عندك وتغني لها بعد .. وياليتها اغاني عدله .. مغبره
..... : غبر الله أيامك قل امين, هذا الزين وش يفهمك انت
جلس جمبه : زين يبه .. وشفيها نايمه هنا ليه ماقامت غرفتها ؟
حمود : اول مره فحياتي اشوف احد يشرب قهوه ثم ينام .. الحين انا قاعد اسولف لها ماوعيت الا داخت ونامت ..
ضحك ابراهيم : ههه تلقاها نعسانه بس قعدت تسمع سوالفك
حمود : ادري شفت عيونها نعسانه بس لازم تتعلم
ابراهيم ويكتم ضحكته على حماس ابوه : تتعلم ايش ؟
..... : تتعلم قصة حياتنا مع الرطب .. أوّل كنا
ابتسم : إيه قلتها لي السالفه
..... ولا كأنه يسمع : أول كنا نجتمع .....
..
بعد العشاء .. وصلت الخاله مضاوي مع بناتها .. علياء وصبا ..
مضاوي لفهد : وينه اخوك ماجا يسلم علينا ؟
فهد يصرف : بغرفته نايم
مضاوي ماقتنعت والتفتت على اختها : نادوه يسلم علينا , من زمان ماشفته ..
تأففت صبا بشكل مو ملحوظ بس مضاوي رجعت تعيد كلامها لفدوى : فزّي نادي اخوج يافدوى ..
قامت فدوى مبتسمه ع الوضع وراحت لغرفته وفتحت الباب .. وهو علطول ترك اللي بيده و نط يضمها : جيتي ؟ وينكم ؟ بروحي .... زهقان
فدوى تفك نفسها : ههه تو خالتي جات , تعال تسأل عنك
فواز وهو يحط رجله برا الغرفه بخوف : عادي ؟ .... امي ماتقول شي ؟
ابتسمت : لا , تعال يلا ..
.... نزل فواز معاها بهدوء .. للصاله وين ماهم موجودين .. وعلطول ابتسم وراح يسلم على خالته ويحب راسها ..
ويلتفت للبنات بابتسامه : شخباركم ؟
علياء بحراره : تمام الحمد لله
....... : صبا انتي سمعتيني ؟ ماتردين .. ليش ؟
صبا وماسكه نفسها قدام فدوى لاتزعل : مانتبهت .. الحمد لله شخبارك انت ؟
ابتسم وبدون مايحس صار يتأملها بحب : زين
مضاوي بحنان : فواز تعال اقعد يمي مشتاقة لك ..
التفت فواز على امه كنه ينتظر منها موافقه .. ولما شاف وجهها جامد مشى بابتسامه يجلس جمب خالته بهدوء ..
..
مضاوي تبتسم له .. : وينك نايم هاه ؟ ماتقول خالتي جايه أسلم عليها ..
..
سكت شوي يرتّب الكلام في راسه : انكم جيتوا .. مادريت .. الا الحين
ام فهد : يللا فواز اتركوا البنات على راحتهم .. ماتوا من الحر وهم متغطين
قام فواز وراح لفهد يسحب يده : يللا قوم .. عيب نقعد ..
زفر فهد وقام وراه
علياء سرحانه .. في فواز .. صح هي تعرف شكله .. بس اليوم شكله غير .. لابس بنطلون بيت قطني كحلي .. ومعاه تي شيرت سماوي واسع .. وشعره مرتب .. وهو حلو اساسا ..
والتفتت لصبا تساسرها : حرام عليج .... عطيه وجه شوي .. والله يحبج ومن نظراته يبين
صبا : مدري انتي و ديم شفيكم؟ ياماما تراه خبل ..!
.... : حرام عليج ترا قوية الكلمة , داريه ماقلنا شي بس جبري بخاطره
..... : ماسمعتيه كيف يتكلم ؟ سكتي بس بعدين نتفاهم , امي تخوزر لنا بعيونها ..
.
رجع فواز لغرفته .. مايحب يتواجد مع فهد وهو معصب ابدا .. ولانه خاف من نظرات امه .. قرر ماينزل تحت مع ان قلبه معلق بصبا .. زي الطفل فرحان .. قفل باب الغرفه وجلس على الكرسي الدوار يضحك بهستيريا .. وبسعادة غامرة ..
فدوى : تجون الغرفه ؟
علياء باحراج : معليش مو هالمره اخوانج موجودين ..
صبا : ايه ونخاف يحتاجونج في شي ويضطرون يجون الغرفه ..
فهمت فدوى علطول ان قصدهم فواز خاصة .. بس ابتسمت : اجل اجيب الشاهي هنا ..
في الخبر .. بس في منطقة ابعد شوي .. وتحديدا بيت ابراهيم .. كانوا الثلاثه موجودين بالصاله .. حمود وابراهيم مشدودين ع الآخر مع الاخبار .. وديم مشغله لاب توبها وجالسه معاهم .. دق جوالها ورفعته ترد .. بدون ماتنتبه ان صوتها عالي
حمود يأشر بيده : صه ..!
ضحكت وشالت جوالها وطلعت من الصاله : ي سوري , هذا جدي يصارخ ماخليته يسمع ..
امها منال : ههه لا عادي , شخباره وشخبار ابوج كلكم بخير ؟
ديم بابتسامه : تمام الحمد لله ..
..... : زين ترا الاسبوع الماضي ماجيتي تزوريني , والاربعاء كلنا بنطلع المزرعه , خالتج بتجي من الامارات ..
استانست ديم : والله خالتي نوال بتجي ؟ تدرين صار لي يمكن 3 او 4 سنوات ماشفتها ..
....... : كلنا والله ,.. على حسب فضوتها تعرفين , وزوجها مشغول مسكين لراسه
...... : ايه صح ,
.... : المهم بتجين المزرعه ؟ ترا الكل يسأل عنج ..
...... : ان شاء الله , دام اهل الامارات بيجون اكيد بجي ,, ياي من زمان ماشفت بنت خالتي , بروح اقول لبابا
..... : ههه زين اجل , يللا مع السلامه
..... : مع السلامه
دخلت ديم الصاله حاضنه جوالها متحمسه وتراقب اشكالهم داخلين جو مع الاخبار ..
...... : بابا
ابراهيم : صه ديم
حمود : بعدين بعدين
تكتفت ديم تنتظر الاخبار تخلص فالتفت ابراهيم بابتسامه وبسرعه : لاتعصبين كم مره اقول لك خلي الاخبار تخلص وقولي كل اللي تبين ..
جلست تضحك وهي تهز راسها يمين ويسار .. اخذت اللاب تب وحطته بحضنها .. وطالعت ساعته .. باقي ربع ساعه وتخلص الاخبار .. ساعتها تقدر تقول كل اللي تبي ..
يوم الأربعاء .. في الجامعه ..
ديم بابتسامه : نعم نعم ؟ لا والله اليوم بروح عند امي ..
صبا : دبا زين انتي دايما تروحين اجليها هالمره شيصير يعني
فدوى : ايه خلينا نجتمع قبل ننشغل صح بالدراسه ..
ديم وهي تحوطهم : سوري لاتزعلون , خالتي بتجي من الامارت مقدر
صبا وتنط بوجهها : والله ؟ عندها عيال كبار ؟
فدوى : ههه ايه صادقه صبا عندها انتاج اماراتي ؟
ضحكت ديم : سخيفات , ايه اكيد , زوجها اماراتي .. اذكر عندها بس من زمان ماشفتهم , (ورفعت راسها لفوق ) مشتاقة لميثه موت من زمان ماشفتها
صبا وهي توقف قدام ديم وتمشي على وراها : هذي البنت ايه قلتي لنا عنها , والعيال شسمهم ؟
ديم وهي تتذكر : ام , ثابت وشهاب .. على حسب ذكري
فدوى وتوقف قدامها هي الثانيه ويدها على قلبها : وه وه .. من الاسامي الواحد يستبشر بالخير ..
ديم بصبعها : انتي وياها .. عقلوا عاد
صبا : لا لا صوريهم لاشفتيهم الله يخليج
فدوى تلتفت عليها : خبله انتي والله شتبين يقولون عنها ؟
صبا ترفع كتوفها : مافيها شي , انتي تعقدين الموضوع ولا هو مافيه شي
فدوى رفعت حاجب : انا اللي اعقد الموضوع ..؟ انتي عليج افكار هبله
ركضت ديم وشبكت نفسها بينهم : هي انا اللي هبله تركتكم ثانيتين بدون ما اكون بينكم .. كل وحده تبلع لسانها يلا
صبا انقهرت : كيفج روحي لهم , فدوى بتجي عندي اليوم وبنجتمع ونسولف وانتي مو معانا
فدوى يقالها تبي تقهرها : احسن , مخلين لج الاماراتيين ..
..... : ياشين الغيره بس .. يا أحبتي .. انتوا تدرون ان الواحد مفروض ينتهز كل الفرص للتعرف على اشخاص جدد , و يقوي العلاقه مع كل الناس اللي حوله ويكون صداقات جديده .. مع مختلف ..
فدوى وتطل بوجه صبا من الجهه الثانيه : تصفقينها انتي ولا تخلينها لي هالمره ؟
صبا : عليج بكشّتها .. نقطة ضعفها ..
ديم وتهج بسرعه للبوابه وهي تضحك : ههه لا لا الا الشعر , بروح بيتنا احسن لي .. لاتتخانقون مالي خلق ارجع في نص الطريق عشان افككم عن بعض
صبا كشت عليها وقلدتها فدوى .. اما هي تبي تقهرهم فطيّرت لهم بوسه في الهوا خلتهم يضحكون ..
مر الوقت بسرعه لين وصلت للبيت وراحت تلبس بسرعه متحمسه لليوم ..
ابراهيم من الصاله : ديم اخرتيني
شالت شنطتها بسرعه نازله : ي سوري مادريت انك خلصت
رفع حمود راسه يتأملها نازله من الدرج : هالحين رايحه عند ناس اول مره تشوفينهم ولابسه هالخرابيط ؟ روحي غيري
ديم انقهرت وهي تطالع لبسها : يباه .. والله مافيهم شي
التفت ابراهيم لبنته .. شاف لبسها عادي .. برمودا جنز و وشيرت احمر .. وجزمة سبور مع شراب احمر قصير : يبه مافيهم شي هذا لبس البنات .. وبعدين هي رايحه لمزرعه وين رايحه يعني ؟
ماعجبه حمود الكلام .. بس شاف ديم مدت بوزها ابتسم : والله مدري شسوي فيج
قالت بابتسامه بريئة : عادي لاتسوي شي
حمود وكنه عارف مايقدر يجبرها : زين كويتي هالشعر بدال ماهو نافش كيلي
ضحكت وهي تلبس عبايتها : كيرلي يبه , كيرلي
..... : المهم انه مهوب زين , والله مهيب موضه الا فوضى
ابراهيم يضحك : زين يبه يللا بنمشي , مو تبي تطلع تغير جو ؟ نوصل ديم وندور شوي وبعدين نرجع لها ..
حمود : شنو ؟
ابراهيم رفع صوته : اقول يللا يبه مشينا
..
وصلت الاستراحه وهي شوي مرتبكه .. ومشتاقه حيل لبنت خالتها .. وللكل .. بس سمعت اصوات ازعاج ولعب وضحك .. عرفت ان الكل سبقها ..
الباب كان مفتوح .. فدخلت المزرعه الواسعه .. توها ماشيه خطوتين وبسرعه انكمشت على نفسها تحاول تبتعد عن الكوره اللي جات في وجهها فجأه ..
شوي شافت ثنين يتقدمون لها .. وقلبها قام يدق بقوه .. من شافت اشكالهم الغريبه عليها , اثواب امارتيه والاشمغه حمدانيه (ملفوفة بطريقة اهل الامارات ) .. مبين من اول نظره انهم اماراتيين
ثابت وهو بعيد شوي : السموحه الشيخه
شهاب : ماقصدنا والله
ديم وهي تطالع يمين يسار : شيخه منو ؟
التفتوا الثنين على بعض وضحكوا
ميثه من وراهم : انتي شو انهبلتي ؟ انتي شيخه صج انج مو كفو ..
استوعبت ديم وضحكت .. وبسرعه طبت عليها ميثه تحضنها بشوق .. : تولهت عليج
ديم وهي تصلح غطوتها لانها كانت حاطه ملكي ومفتشله من الشباب اللي حاضرين الموقف : ههه والله انتي وحشتيني اكثر
ابتعدت ميثه بعدما تذكرت وجود اخوانها : ي نسيت , شباب هذي ديم بنت خالتي منال
ثابت ابتسم : هلا ديم شحالج ؟
شهاب بابتسامه هو الثاني : هلا ديم , حلو اسمج
ديم وبغى يغمى عليها من الفشلة : الحمد لله ... انتوا شخباركم ؟ ... شكرا
ميثه توقف بينهم وهي تضحك على صوت ديم المتلخبط : ديم هذا ثابت وهذا شهاب ماتذكرينهم ؟
ردت باحراج : صراحه لا .. سوري
ثابت ابتسم : مو مشكله .. فرصه حلوه .. يللا الميث نحن بنسير , خبّري الوالده
ميثه : بتردون ؟
شهاب : هيه , نحط الاغراض .. ونبدل .. (ويأشر على اثوابهم )
ثابت وهو يتعداهم : يللا شهاب , حياج بنت الخاله
ديم ولزقت بميثه : الله يحيكم ..
وراقبتهم لما طلعوا .. وعلطول التفتت لميثه الي سحبت برقعها
ميثه : يللا بشوفج فتشي غطاج
..... : ههه ياخبله لاتفكرين تتكلمين سعودي .. لحظه ابي مرايه ,, عليج كلام
..... : مرايه شو ؟ مالي شغل متولهه على ويهج
ضحكت : بتزهقين منه صبري
ضحكت ميثه فجأه وكنها تتذكر : كان يبيلج صورة وانتي متروّعة من الكورة
انقهرت ديم : انتي شايته الكوره علي ؟
..... : يس , ايل منو اخواني ؟ ماتشوفينهم بكندورات شلون يلعبون كوره ؟ احنه كنا نلعب
..... : انزين حددي موقفج ياتتكلمين اماراتي ياسعودي ترا كلامج يضحك , وهذي ضربه ( وتطقها على كتفها بخفيف ) عشان الكوره البايخه زيج
ميثه صرخت : بنات اخواني سارو
طلعوا ساره ونوره من الغرفه .. يسلمون على ديم ..
..
< عاد احد يروح استراحه بجلابيه ولبس بيت ..!
ميثه : امشووا نسير داخل ..
ساره : لا خلينا برا احسن ..
نوره : اناا عادي وين ماتروحون نو بربلم
ديم ومسكت يد ميثه بخوف : اول شي اخوكم وينه ؟
ساره : مدري اظاهر طلع ..
ديم بدت تعصب : تراه دايم يطلع مدري من وين ..
نوره وتأكد : لا مو موجود
راحت ديم للغرفه تسلم على امها وخالاتها .. وشوي دخلت ميثه وراها .. بعدما جلسوا وسولفوا شوي .. قاموا الثنتين للغرفه الثانيه يحطون اغراضهم ويتضبطون ..
ميثه : ديّوم مره تغير شكلج , احلوّيتي يالسباله
.... : سباله في عينج , طول عمري حلوه
.... : شو هالثقه ماقدر انه
ديم بتواضع : امزح .. تدر..
وقطعت كلامها مفزووعه قامت بسرعه هي وميثه يتخبون ورا الستاره لما شافوا سعد واقف يتأمل عند الباب .. : احم .. نعم نعم
ديم معصبه : لا ياشيخ عقب مادخلت ؟
سعد وكنه مايدري : اوه في احد هنا ؟ منو ديم ؟
ديم ولانها ماتطيق حركاته : لا والله ..؟
ضحك : أي والله ..
فتحت ديم الستاره وبسرعه طلعت ميثه : منو هذا شفيه مايستحي ..؟
ديم وتودي شعرها لورا : وقح ..
سعد ويطل من الباب شوي ويدخل : وقح هاه ؟
انصرعوا وبسرعه نطوا ورا الستاره ثاني مره بس مالحقوا لانه شافهم .. ماكانوا يدرون انه مامشى ..
اول ماطلع راحت ديم تسكر الباب وتوقف وراه ووجهها احمر : وجع مايستحي
ميثه وهي ماسكه راسها بيديها : شبلاه مايخوّز عيونه عنا ؟
ديم وهي قرفانه منه : هذا طال عمرج , قليل حيا .. قليل ادب ,, موته بس يشوف شي اسمه بنت يحب يطالع فيها
ردت ببراءه : مو يمكن معجب فيج ؟
عفست وجهها وضحكت بسخريه : هذا معجب في البنات كلهم يحب يبصبص حسبي الله عليه بس يروع فينا ,, عاد تلقينه عرف انج جيتي قال يشوف شلون شكلج
انحرجت ميثه : صج سبال
ضحكت : ههه بتتعودين
.... : تدرين ماتوقعتج جريئه جيه وتردين عليه
.... : وربي مو جريئه بس هو بالذات مايبي له الا تهزئ
ضحكت : صح صح , قبل شوي ماعرفتي ترمسين مع اخواني شكلج مستحيه
ابتسمت وظهرها مازال ملاصق للباب كنها خايفه يدخل مره ثانيه : ايه , من زمان ماشفتهم ..
..
< والله شي يقهر
بعد مامر وقت ..
ساره : بنات يللا عاد , ميثه بلا سخافه
ميثه : شو بلا سخافه ؟ مارح يوافقون ,,
نوره تضحك : يلا وربي شكل اخوانج مستحين مننا ومو داخلين جو , خلينا نهبل فيهم شوي ..
ديم وهي تربط خيوط جزمتها : شناوين عليه حرام عليكم والله اشكالهم ثقل مو حقين هبال
ساره تترجى ميثه : بس يتسلقون النخل يجيبون الرطب ..
ديم شهقت : إههه , خافوا ربكم في هالمساكين , الحين على كثر العمال تبونهم يطلعون لفوق
ميثه وعجبتها الفكره : لا لا والله حلوه , نسوي بينهم سباق
نوره : بس لو سعد يرضى يدخلهم جو , مافيه غيره في سنهم هنا
سعد وهو جاي من بعيد : ارضى بشنو ؟
تغطت ديم بسرعه وميثه تحجبت وصدوا عنهم ..
ديم وبدون ماتحس ان صوتها عالي : اف الواحد مايعرف ياخذ راحته
سعد : نعم ديمه قلتي شي ؟
.... : ديم ! ديم مو ديمه
سعد وحاب يقهرها : ماتفرق نفس الشي , ايوه نوره شكنتي تقولين ؟
.... : اقول حرام عيال خالتي نوال لحالهم وانت جالس تتمشى
(وقالت له الفكره بس مارد .. )
ميثه ومن قهرها منه : سبال متوقعه بيرفض
سعد وهو يقرب : منو سبال ؟
ميثه بقهر بدون ماتلتفت له : انته
ابتسم ورفع ثوبه يربطه عند خصره .. : نادي اخوانج وانتي ساكته
انقهرت ميثه ودخلت تنادي اخوانها اللي طلعوا في هدوء ..
سعد وهو يربط نفسه بالنخله : هاا شباب نشوف مين يجمع اكثر ؟
ثابت ابتسم ورفع كابه البلاك عطاه اخته : هيه من ناحيتي ماعندي مانع .. شو شهاب ؟
ضحك : ماعرف , ماتعلمته مثلك , كنت صغير
سعد : مايبيلها تعليم تعال بس
انحرج شهاب وراح لعندهم والثلاثه مبتسمين بسعاده .. وتركوا البنات يفكون غطاهم لانهم ابتعدوا شوي ..
ديم : بنات امشوا نبعد فشله في وجههم ..
ميثه : هيه والله ماله داعي نتفرج .. نسير نتمشى ؟
ساره بابتسامه : اهم شي نفذنا الخطة , وهم بكيفهم ..
ديم ضحكت فجأه لما تذكرت شي : تعالوا شرايكم نروح نجمع كنار زي اخر مره ؟ اكيد اهلنا بينبسطون ,, يموتون ويشوفونا نحوس بالمزرعه ونرجع لهم ذكريات اول ..
ساره وترفع جلابيتها تربطها ع جمب بحماس : يلا
فوق النخل فوق .. :
شهاب : ارحموني مايصير جيه
سعد يتطنز : مالنا دخل انت مو قاعد تتحرك بسرعه ..
ثابت يضحك : شهاب انه حاس اني با شوفك طايح في الأرض هالحينه
شهاب خاف : لاتقول جيه , شو شايفني ماعرف ؟
سعد ضحك : لا بس كنك بزر , وشكلك من الحين خسران لانك تقطعه حبه حبه
شهاب وتحمس زياده : برويك هالحينه شو بسوي وكم بجمع , عسب ماتعيب ..
ثابت ضحك بهدوء : يصير خير
بلييز فراشات ردوودكم وتعليقاتكم

ولا رد شدعوى

زعلتوني بجد

90 مشاهده ولارد
هذا البارت لعيوون المشاهدين
(وش ذنبي ..؟ بلاني ربي ..! )
فواز واقف ينتفض من الخوف بسبب صراخ ابوه : حمار انت ماتفهم ؟
جرب ينطق أي شي يبرر موقفه : قالت امي .. نظّفه ..!
ابو فهد وهو ماسك الجوال الغرقان ماي : تقوم تغسله بماي يالأهبل .. فيه احد يغسل جهاز بماي .. ماتفهم انت .. غبي ؟ اكلمك انا (وفقد اعصابه يرمي الجوال ع الارض قريب منه بعنف خلاه ينتفض زياده ) قول لي شسوي فيه الحين معاد ينفع
فواز وماعد يتحمل فغطى عينه بظهر يده يمنع صيحته وهو يبعد لوراه : خ.. خلاص اشتر غيره
ابوه بسخريه : اشتر غيره .. ! بس وهذا هي ... تخرّب ونشتري غيره ..
لما شافه ساكت دارت عيونه على ولده الكبير .. ولما اقول كبير قصدي بجسمه بس .. لان فواز واقف مستند لجدار ومغطي وجهه بيدينه من الخوف ..
ابو فهد مازال معصب فسحب فواز من ذراعه وهو يصرخ في وجهه : طس عن وجهي لابارك الله فيك .. رح انقلع غرفتك
راح فواز بسرعه لغرفته وقفل الباب مرتين .. وكعادته اذا خاف يتخبى تحت السرير ينتظر فدوى او أي احد يطل عليه ويطمنه .. وان مر الوقت ومحد حوله ينام في مكانه ..!
مظاوي دخلت وقالت لاختها وهي تفصخ عبايتها لان ابو فهد طلع بعد ماتنرفز من ولده : وعيالج ماينشافون ,, مايقولون عندهم خاله يسلمون عليها ؟
ام فهد تنهدت : فهد طالع وفواز بغرفته .. توه متخانق مع ابوه ..
..... : خير شصاير ؟
.... : ولا شي .. تعرفين العيال ..
مضاوي وباصرارها المعتاد وهي ترتب الجلابية الفستقية على جسمها : زين بروح اطل على فواز ..
ام فهد وماودها : زين .. انا بالمطبخ ..
طلعت مظاوي الدرج ماخذه راحتها ومتعوده لانه بيت اختها وزوجها طالع مش موجود ..
وصلت لغرفة فواز وطقت الباب : فواز .. فواز
فواز وعيونه تراقب الباب بخوف : مين ؟ فواز ترى .. نايم
مظاوي ابتسمت بحنية : فواز ادري انك مو نايم .. افتح انا خالتك ..
طلع فواز من تحت السرير بكل سعاده وقام يفتح الباب وتطل هي بوجهها البشوش .. : خاله مظاوي ..
مافارقته الضحكه بس مد يده صافحها وحبها على خدها .. رجع لوراه شوي بعدين ابتسم ومسك راسها وباسه ..
سرح شوي ورجع يمسك يدها ويبوسها ..
مظاوي انحرجت بس ضحكت : خلاص فواز شقالوا لك كعبه انا
فواز ببراءه : لا .. بس يحبج فواز ..
ضحكت مظاوي وهي تطالع الغرفه : عادي اجلس شوي ويّاك ؟
فواز ووجهه ينطق بالسعاده الغامره : ايه تعالي
ابتسمت خالته ودخلت تتأمل الغرفه .. على نفس حالها كل مره تدخلها ..
فواز وقف يدور ويسرح في الفراغ واخيرا ينطق : صبا وينها ؟ عليا معاك ؟
انتبهت مظاوي لشبح الابتسامه اللي مر على طاري صبا .. بس ردت بهدوء : لا كل وحده في شغلها .. انا جايه اتغدى عندكم وهم مايطلعون هالوقت ..
هز فواز راسه : نلعب سوني ..؟
.... ضحكت وهي تجلس على الكرسي الدوار : ماعرف له ..
.... : اعلمج ..
ابتسمت مظاوي وقربت تجلس على الارض قبال التلفزيون الصغير : يللا
ضحك فواز وسرح في طيبتها شوي .. هي كانت تراقبه والسعاده تشع من عيونه الجذابه وتنوّر وجهه الحلو وملامحه الجذابة .. بعد ثواني مرت تغيرت ملامح وجهها للاستغراب .. لان فواز قرب راسه لها وباسها على خدها, وبعد ثواني قال بكل حب : احبج
رق قلبها مظاوي .. وحركته حننت قلبها زياده .. أججت كل مشاعرها وضيّعت كلامها .. لو هي داريه كل هالسعاده بيحس فيها كان من زمان حاولت تصادقه : وانا احبك بعد ..
ضحك والتفت للتلفزيون بحماس يشغل اللعبه .. فيما دارت عيون مضاوي على ولد اختها .. على كل شي فيه .. قضاء وقدر وماتقدر تقول شي والحمد لله انه بصحه وعافيه .. بس ياليتها تقدر تتخطى حواجز اهله وتفهمه وتحتويه .. تنهدت بحزن في نفسها وقبل لاينتبه لها ابتسمت بسرعه ..
تذكر هو والتفت علطول : قلت لج انا ..! صلى فواز في المسجد !!
مظاوي وهي مو فاهمه ليه الفرحه الكبيره بقلبه وش سببها ..! شلون يعني صلى في المسجد هو مايطلع كثير بس ماهي فاهمه ليه مايصلي برا
استوعب فواز انها ماتعرف شي فسكت منحرج .. ونزل راسه يدور كلام
مظاوي بحنيه : شنو ؟ ليش سكتت ؟ كمل
فواز وبعد فترة سرحان كالعاده : زي فدوى ؟؟ انتي يعني ؟
.... : شلون زي فدوى ؟
..... تنهد وملامح وجهه تنطق بضياع مشاعره : يعني .. فواز يقول لج .. يسولف .. اللي يبي ,,؟؟
ابتسمت اكبر ابتسامه حنونه .. ومريحه .. ارتاح منها فواز وهبط صدره وبدا يسولف كلمات تفهم نصها ونصها لا .. يرجع يعيد بعض الجمل ويحاول يرتبها عشان تصير مفهومه .. بس مو قادر مندفع بسوالفه وكنه مو مصدق انها بمكان فدوى عنده ويقدر يقول لها اللي يبي بدون مايخاف من ردود فعلها
وهي تسمعه وتحاول ماتركز كثير وتطلبه يعيد كلامه عشان ماتجرحه وتحسسه انه فعلا فيه شي ..
انتبهوا الاثنين لام فهد من عند الباب وتحرك الملّاس بيدها : اقول مظيوي ماكنج طولتي ؟ طاقينها سوالف وانا في المطبخ بروحي ..
فواز علطول قام ولصق بخالته يمسك ذراعها بخوف .. هالحركه اثارت فضولها ونقلت عيونها بينهم ثنينهم .. : شالسالفه ؟
ام فهد وهي تطالع ولدها بقهر : خايف هاه ..؟ تستاهل يمكن تحس وتفهم
مظاوي باهتمام : شفيج قولي لي شمسوي هو ؟
ام فهد بحنق : شمسوي ؟ اقول له امسح الجوال يروح يغسله الثور !
التفتت مظاوي على فواز تراقب الخوف بعيونه العسلية .. اما ام فهد تركتهم معصبه راجعه للمطبخ ..
نطق فواز ببراءة وعيونه تتعلق بعيون خالته وكنه يبيها تشوف الصدق بنظراته : خالتي .. مو ثور أنا ! .. والله
ربتت مظاوي على كتفه وهي تبلع ريقها و ترسم ابتسامه على وجهها : لا ياحبيبي مو ثور .. بس امك معصبه عشان كذا تقول لك هالكلام .. ماتقصده ..
سرح فواز في الباب اللي طلعت منه امه .. وعلق عيونه على الدرج يشوفها وهي تنزل .. ماركّز في كلام خالته .. ولا اهتم .. هو في نظرهم ثور وغبي ومتخلف .. غصب تمر عليه فترات يحس فيها بنقص قدامهم ..
اما سعد كان توه داخل البيت .. واول ماشاف حالة اهله في الصاله بان على وجهه منقرف : اعوذ بالله ! الواحد يصبح ويمسي على هالاشكال ..!
ساره وتتحرك من مكانها بثقل تصلح بجامتها السماوية اللي طق لونها : نعم مو عاجبك اخ سعد ؟
سعد رمى مفاتيحه على الطاوله وجلس : لا مو عاجبني طبعا ..
نوره تنط بوجهه هي الثانيه وهي حاطه يدها على خصرها : شفيها اشكالنا يعني ؟مدري متى بنعجبك احنا
سكت سعد لحظه يتأمل اخته : شايفه قميصج تقولين شفيها اشكالنا ؟ بالله هذا القميص انا اشوفه عليج صار له سنتين يمكن
.... : عاجبني واحبه .. ! كيفي ..
سعد ومن جد الموضوع قاهره : انا ابي افهم يعني .. حتى لو قاعدين في بيتكم وماخذين راحتكم .. ماتشوفون اشكالكم في المرايه شلون صايره ..
ساره : كيفنا والله محنا حريمك نقعد نكشخ لك ..
.... : ولو ! انتوا ماتحبون تشوفون اشكالكم مرتبه ؟ وجع تسدون النفس
نوره تطالع باختها مو عاجبها الموضوع : وجع في عينك .. كل البنات كذا ! كلهم حالتهم حاله في بيوتهم , يعني الواحد اذا ماخذ راحته في بيته يعني وين ياخذها ؟
قام سعد يلمس شعر اخته المتشابك : كل البنات كذا هاه ؟ شوفي استغفر الله .. حتى تلمينه بدون ماينمشط .. وانتي الثانيه (يلتفت لساره ) مفروض انتي الكبيره بس ماش ,, مامنكم فايده .. قراوى طول عمركم قراوى الله يعين اللي بياخذكم ..
ساره بثقه : كل بنت تتغير اذا انخطبت
سعد بحمق : الا انتو ماتوقع ! والله يعينكم على انفسكم صراحه ..
نوره : من زينك الحين شايف نفسك ..
سعد سند ظهره للكنبه وسحب الريموت من يدها وحط على ام بي سي وثواني تنط نانسي : شوفوا .. شوفوا هذا الاشكال الصح
ساره كشت عليه : مالت عليك وعليها والله انا احلى منها ..!
لف راسه بقرف : تاكلين تبن احلى منها ! انطمي بس ..
نوره تتكتف : هذا انتم يالشباب شايفين نفسكم .. آآآصلا هذي نانسي تجيب القرف .. جمالها مو طبيعي
..... سعد ويضحك على خواته : زين اذا عندكم طبيعي طلعوه .. خلوا الناس تشوفه .. المهم ماعلي .. انا اذا بعرس .. ابي وحده مثلها (يأشر على التلفزيون )
ساره وزادت عصبيتها : انتم لاتتكلمون .. نبي زي نانسي وزي هيفا وزي مدري مين .. يجيك الواحد عبد شعره مليّف اسنانه صفرا وريحته توصل قبله ويقول ابي وحده حلوه ... انطموا بس من زينكم الحين
نوره تأيد : أي يعني ياأخ سعد .. اذا صرت تشبه وائل كفوري ولا هرتك روشان ولا تاركان تعال تكلم ..
سعد ابتسم : والله تعرفين تاركان .. خطيره !
ام سعد وصلت على صوتهم العالي : يالله سعد .. شفيك على خواتك
..... : قرويات يقهروني
..... ام سعد وهي تحط الصينية بالأرض : كل البنات كذا
..... انفعل سعد وغير قعدته يواجه امه : اما .. اما .. اما كل البنات كذا .. انا قاز نص بنات الشرقيه لاتتفلسفون علي .. حتى ديمه ذي مدري شسمها اللي مو عايشه مع امها ولا عندها بنات حولها تفهم في الكشخه اكثر من ذول ..
ام سعد عصبت : لاتقارن خواتك بأحد .. كل وحده وكيفها
ساره : وبعدين اصلا ديم هذي ماتقارن فيها احنا احلى منها .. انا شعري انعم منها
سعد يتطنز : احلى منها ! تخسين احلى منها .. بعدين ياحبيبتي ماله دخل الشعر درينا ان شعرج ناعم .. اهم شي تكون البنت تهتم في نفسها ..تطلع ملكة جمال
امه بتهديد : سعد ! لاتقول عن اختك كذا .. بنت ابراهيم مافيها زود على بناتي
سعد من ورا اسنانه : الا فيها زود ونص
نوره سمعته : ياخي عاجبتك روح اخطبها ..
ضحك سعد حييل : لا ياعمتي لاعاجبتني ولا اخطبها .. هذي تحسينها دلوعة بابا وجدو وانا اكره المياعه والدلع .. وبعدين ماأتزوج الا لاتزوجتوا انتوا عشان ماتفشلوني وتنشبون في البنت تكره حياتها منكم .. (وطالع فيهم شوي ) يعني شكلي بموت عزابي ..
# انا اشوف ان نانسي وهيفا واشكالهم يموتون احسن ! بجد سووا زحمه على الشباب ...
والفرق وااضح بينهم وبين ديم .. مافيه مجال للمقارنه اساسا .. وبدليل ان في بيت ابراهيم ..
كان حمود يطالع في رجل ديم وهي جالسه على الكنبة بروقان : ديمه ! بردانه ؟
ديم وتطالع مكان مايطالع جدها .. وتشوف قدمها : شنو ؟ لا بردانه ولا شي
..... : اجل ليه لابسه شراب في البيت !
ضحكت ديم وقالت برقه : يبه كم مره سألتني ؟ حاطه كريم....
حمود عفس وجهه وطالع رجلينه اللي اكل عليهم الدهر وشرب : الحمد لله والشكر .. عسى منتي ميّته حر بس ..!؟
ديم وكتمت ضحكتها : لا مش حر ..
ابراهيم ويقبل قاعد على الكنبه : ديم تعالي حبيبتي همزي رجولي ..
حمود يمغط رجلينه : ايه وانا بعد
ديم وماسكه نفسها : ان شاء الله
حمود يصارخ على باله ماتسمعه : وحطي لي فازلين .. وشراب زي ذا (يأشر على شرابها القصير )
ديم ماقدرت تمسك نفسها وضحكت : طيب
..... : مابي وردي ! جيبي لي شي ثاني ..
.... : تيب ,, تيب !
حمود عصب ويلتفت لابراهيم : وشفيها بنتك تتكلم كذا .. طيب بحرف الطاء مو بالتاء
ابراهيم ابتسم : حركات بنات خلها على راحتها
حمود ويرجع ظهره لورا : شنهو ؟
.... : اقول براحتها يباه ,, براحتها ..
..... : زين سمعوا .. ابي اروح لمزرعتي في الحسا من زمان مارحنا
ديم وانبسطت حيل : أي أي يلا خلونا نروح
ابراهيم : بسم الله ديم ,, شهالحماس
ديم : من زمان ودي اروح اشوف بنات عماتي وبصراحه مشتاقه للركض في المزرعه ولذكرياتي فيها مره من زمان عنها وعن اهلي ,,
حمود : الاربعاء ان شاء الله نروح ؟
ابراهيم : لا ! بكره خالتها نوال بترجع لدبي واكيد تبي تقعد وياها , خلاص ديم نروح يوم الخميس او الجمعه ان شاء الله
ديم ونطت تحضن ابوها : ياي ثانكيو مره مره ثانكيو ..
حمود : هاه ؟ كم مره اقول لج تكلمي عدل زي الناس متى تتسنعين انتي
ديم ضحكت ووقفت كنها تلقي خطاب : شكرا وجزاك الله خيرا يا أبي
حمود عفس وجهه : تتطنزين هاه ؟ ذلفي بس
ضحكت قايمة عنهم حاطه رجلها لغرفتها ..
حمود بعد ماراحت ديم قرب شوي لولده : اسمع ,, من اليوم وطالع تقوي علاقتك في اهلك .. لو مانتم قرايب مره بس ميخالف ..
..... : يبه كم مره تفتح معاي الموضوع .. ترا صار لنا فوق السنه تقريبا ماشفناهم ..
...... : واذا ؟ شوفوهم طيب ..! يا ابراهيم انا قايل لك انت كبرت ويبيلك وحده تهم فيك وتسنعك غير بنتك .. وانت منتب راضي يعني يقال لك ماتعرف الناس ولاتبي تختلط بانساب جديده .. فخذ لك وحده من العايلة احسن .. واقرب .. والله مافي مثلهم
ابراهيم امتعض بس رد بهدوء : يبه انا قايل لك خل لموضوع هذا على جنب انا ماقررت اتزوج وحتى ديم ماعرف شنهو رايها .. بعدين يبه انا دخلت الاربعين مو بسهوله وحده ترضى فيني ..
..... : افا ! وشقال قال 40 .. توك بعز شبابك يابراهيم بعدك صغير .. وبعدين والله ياولدي اني اعرف لك وحده من الاهل متوفي زوجها صار له فتره .. يمكن فوق السنتين ,, ورجعت تعيش في الحسا مع اهلها .. وماشاء الله الكل يمدح فيها .. ماتدري يمكن تكون من نصيبك انا ودّي بها لك ..
ماعجبه ابراهيم الموضوع فحرك يدينه في الهوا ببطئ يهدي ابوه : يبه يبه .. انسى الموضوع هالحين ,, بعدين انت قلتها المره ميّت زوجها مارح توافق
..... : من اللي يقولك ؟ المره مردها بيت رجلها وهي توها صغيره واكيد بتحتاج لزوج .. وبعدين انت تقدمت وهم رفضوا .؟؟ ... ابراهيم تعقّل .. لاتضيع حياتك وتقول يمكن ويمكن ..
سكت ابراهيم ولف وجهه يتجنب نظرات ابوه .. وقام من عنده لأي مكان اهم شي بعيد عنه ..
لمعت بعيون حمود نظرة غريبة : بخليك تتزوج ..! لو ماقتنعت اليوم بتقتنع بكره ... هين يابراهيم حركات الشباب والمراهقه هذي مانبيها ..
يمكن حمود كانت النظرة الغريبة اللي في عيونه لها ألف معنى ومعنى .. لكن فواز واللي في الجهه الثانيه من الخبر .. كانت بعيونه نظرة وحده .. مو غريبه بس .. غريبه لدرجة انا تحسس الكل من حوله بأنه غريب عنهم ..
فهد بزمره : نعم يالأهبل ليه تطالع كذا فيه شي ؟
فواز مانتبه ..
دفه فهد من ذراعه : هآآي إنت ,, اتكلم انا
فواز ابتعد بخوف : ش .. شنو ,, مافيه شي .. بس افكر
ضحك فهد .." شقال قال يفكر ! خ .." ورجع يكمل اللي بيده وهو قرفان من اخوه ,,
فواز رجع يراقبه وينتظره يكلم جوال .. كذا مجرد فضول طفل .. فهد دايم هالوقت يكلم خويته .. وماينتبه ان فواز بعد فيه عقله نسبة ذكاء تخليه ينتبه لهالأشياء ..
في الغرفة .. فدوى معصبة وشوي وتطلع من السماعة تكفخ ديم : سخيفه انتي تدرين
ديم بدفاع : فدو عمري ماقدر والله , تعرفين حركات بابا هذي مش اول مره ...
فدوى وشوي وتزعل : طيب بس عشان عندي اخوان كبار يقول لج مافيه روحه عندها كل شوي ,,؟ شسوي في اخواني يعني اذبحهم عشان يرتاح ابوج ؟ كل مره نفس السالفه يعني
ديم وتهديها : فدو , فدو اسمعيني,, اصلا انا من زمان ماجيت عندج وبقول لجدي يقنعه .. واذا قلت له اخوانها طالعين ان شاء الله مارح يقول شي
..... : ..........يعني بتجين ؟
..... : بشوف جدي ..
فدوى بتعب : ديمم وربي ادري انج تبين تكفخيني ,, والله صبا مشغوله مع اختها .. وقلت لها قالت ماتقدر تجي .. بعد ماتجين انتي ؟ انهبل ترا ..
..... ابتسمت وبانت حنية في صوتها : فدو بسم الله عليج .. الحين بروح اكلم جدي ..
ارتاحت فدوى شوي : الله يخليج ,, تسلمين
# ياربيه شلون نعيش بدون صديقات .. نجلس سوا ونرمي همومنا على بعض ونرتاح .. نعصب على بعض ونحتاج لبعض .. وننفجر في بعض .. وبعدها نضحك سوا ..على سوالفنا واحتياجنا لبعض ..
فتحت فدوى يدينها في الهوا بسعاده .. جية ديم مضمونه ان شاء الله هي عارفه ان هم مايهونون على بعض .. سمعت تلفون الصاله فطلعت بترد .. لكنها شافت فواز يتحرك ويروح للتلفون .. وينشقّ فمه بابتسامه عريضه .. وبكل لهفة طفل يقول : صبا
صبا توهقت : هلا فواز .. معليش ابي فدوى ضروري ..
فواز والفرحة غامرته التفت لوراه ومد السماعه لاخته اللي كانت شوي حزنانه على فرحته : هلا صبو
صبا : وجع ليش ادق على جوالج مشغول ؟ منو تكلمين ديم ؟
فدوى يقالها مقهوره : ايه ديم .. وبتجيني ان شاء الله .. انقلعي لعلياء خليها تنفعج
صبا : ههه تجنن عصبت ,, فدوى قلبو ماقدر عليج والله ,, بطل عليج ان شاء الله ولو اني ماقدر اطول ..
فدوى لفت سلك التلفون على اصبعها بدلع : صج ووالله ؟ ياقلبي انتي احبج تدرين
(هنا التفت فهد يراقبها وهي مبسوطه )
فدوى : خلاص انتظركم .. اقول جيبي علّوي خلينا ننبسط وياها قبل تتزوج وتقاطعنا
..... : ههه طيب اقول لها مع ان فكرها وخيالها واحلامها وكل شي .. في عالم ثاني
..... : ههه ياحليلها .. يللا اشوفج
.... : يللا باي
مامداها فدوى تسكر الا ويستلمها فهد : خير ان شاء الله ؟وش اللي سمعته انا
فدوى استغربت : الخير بوجهك
فهد ويحرك يده مو عاجبه الموضوع : احبج وياقلبي .. قومي عطيها بوسه بعد ..
رفعت حواجبها : طيب ؟
ام فهد بتأييد : احد يتكلم هالكلام ..؟ ماتستحين انتي ؟
وقفت فدوى ماشيه بثقه : صديقتي واحبها واقول لها مشاعري مافيها شي ..
فهد عصب : عاد مو احبج وياعمري وياحياتي .. شواذ انتم؟
فواز قطع كلامهم وكنه قاعد يربط بالعلاقه بين فدوى وصبا .. وبين فهد وخويته : طيب .. فهد .. انت .. تكلمها تلفون ... تحبها .. قلبي .. حياتي
فهد انفجع وطار الشرر من عيونه : شتخربط انت ؟ خلك خلك على جمب (ورمى له نظرة تهديد قوية خلته يخاف ويجلس ) .. ماعليكم منه .. وانتي هيه .. ! تعلمي تتكلمين زين زي الناس , بلا حركات نص كم ..
طالعت فدوى فيه بغير اهتمام .. رفعت شعرها الفاتح تربطه باسوارتها .. وتصلح بلوزتها الموف والبنطلون الباذنجاني البسيط .. : لانص كم ولا ربع كم .. صديقاتي واتكلم معاهم براحتي .. (والتفتت لامها ) يمه البنات بيجوني بعد المغرب ..
ام فهد : زين بكيفكم روحي صلحي لهم القهوه والشاهي ..
ابتسمت فدوى : اكيد ..
فهد ومازال مقهور : وانتوا ماتزهقون من بعض ؟ مالها مناسبة هالعزيمة على فكره ..!
فدوى بثقه اكبر تحب تهزّ غرور فهد : مو لازم مناسبه .. ضايق خلقي ومقهوره وكارهه حياتي .. وبيجون يوسعون صدري شوي .. صديقات ولبعض ,, عندك مانع ؟
فهد قام عنهم لغرفته : تافهات .. وفاضيات بعد ...
مشت فدوى هي الثانيه لغرفتها تكتم ضحكتها لاتتهزأ من أمها وابوها .. وسمعت صوت باب غرفة فهد ينصفق بقوه ,, اخيرا وصلت لسريرها ورمت نفسها عليه تضحك بسعاده .. وناسه قهرت فهد !
ام فهد في الصاله بتهديد معتاد كالعاده : تفهم ولا ماتفهم ..
فواز ببراءه : افهم ... ايش ؟
مسكت امه راسها لانها بترجع تعيد كلامها ثاني مره : اوف ,, اللهم طولج ياروح ,, اقول لك (وتضرب راسه بخفه كنها تحاول تدخل المعلومات فيه ) لاتقرب للمجلس .. خلك بغرفتك ولا والله ترا اقفل الباب
فواز خاف : لا .. باب ,, لاتقفلينه ,, اطلع لا .. ما أطلع
سحبته امه من ذراعه : اجل يلله ,, على غرفتك اشوف ..
طلع فواز منكسر لغرفته .. ماحس حتى بالوقت اللي مر بسرعه .. صبا وصلت لعند فدوى .. عشر دقايق وهذي ديم داخله معاها اكياس .. واول ماشافت صبا بوجهها : يااويلي ع الغيره انا .. خافت تخلينا بروحنا نحش فيها ..
صبا تنفخ نفسها : طبعا ,, ماقدر اخليكم لحالكم تقطّعون لحمي تقطيع ..
فدوى تطل في الكيس : شنو جايبه وياج ؟
ديم تطلع اشياء ومن ظمنهم دوريتوز الازرق : ومن غيره يعني
صرخوا البنات مبسوطين ..
ديم وهي تفضخ عبايتها : الحمد لله ماعندكم اكل في بيتكم ؟
فدوى ومبسوطه : الا عندنا بس تخيلي البقاله القريبه منا مافيها شكله مخلص .. بس انتي سوبر ديم ,, تنقذين المواقف
صبا تطيّر لها بوسه : ياحلوج بس ..
ديم وهي تلوح بالكيس يمين يسار : عاد الناس يجيبون معاهم صينية حلى فطاير شي ,, انا شبس واحمدي ربج
فدوى ضحكت ومسكت الدله تصب الشاهي : عادي نمون
صبا : فدو حلو لبسج ,, عجبني بسيط ..
فدوى ابتسمت وهي تطالع البرمودا الباذنجاني : حلت ايامج يارب .. لو شايفه وجه فهد قبل شوي ..كان متي ضحك
استعدلوا الثنتين : قولي
فدوى : بس شافني نازلة لكم بهاللبس يقول لي ماتستحين المفروض تكشخين لهم ..
صبا تطالع شيرتها البلاك والبنطلون الجنز الفاتح وترفع شعرها من قدام بكلبّ صغير : عادي طيب فهد هذا شفيه اهبل ؟ متعودين على بعض احنا ...
ديم هي الثانيه : متخلف اخوج سمحي لي
فدوى ضحكت ضحكه مريحه .. بس مجرد قربهم من بعض يريح النفس ..
ديم بعدت الطاوله الصغيره وتربعت على الارض .. وضربت بيدها يمين ويسار : قعدوا .. بلا اتيكيت بلا هم ..
صبا : ماتترك طبعها فتاة المزرعة ذي ..
.... : فتاة مزرعة في عينج ياخبله .. قعدي وانتي ساكته ..
ضحكت صبا واخذت بيالتها وتربعت في الارض جمب ديم : فديو ,, تتدلعين ؟
فدوى ضحكت وجابت صينية الشبسات والحلويات وحطتها بالنص وتربعت ...
ديم بخبث : يللا , ام نحش في مين
صبا رفعت يديها لفوق تستهبل : استغفر الله استغفر الله , بتحشون انا بقوم ..
.... : ياويلي ع المانيب قايله ,, قعدي بس ..
ضحكوا ثلاثتهم سوا ,, ضحك يفتح النفس ويرد الروح ..
فدوى برقة فكت شعرها وجابته لقدام تلعب بخصلاته وكنها مقهوره من شي : ام , طيب خلو فواز على جمب ,, الحين كل الرجال نكديين وعصبيين مثل الاخ فهد صح ؟
صبا بتأكيد : طبعا شرايج يعني , كلهم يجيبون النكد
ديم بدفاع : لا حرام عليكم شالفكره هذي فدوى
فدوى وصبا بحلقوا عيونهم عليها : نعم نعم .. من متى وانتي تدافعين عن حزب الرجال ؟
ديم تفشلت : لا مو قصدي بس الحق حق .. طيب هذا جدي بس ينكد .. اما بابا احس عادي واخف شوي ..
فدوى : أي حق ياعمتي انتي .. (وضحكت بخبث تلتفت لفدوى ) لا البنت شايفة لها شوفه .. بنت ! عقلي من متى والرجال مو نكديين وعصبيين .. ؟
ديم بثقه تبعد قذلتها (غرتها ) الصغيره عن عيونها وتقول بعناد : مش كلهم يعني مش كلهم ..
فدوى : شف شف , صبو البنت هذي تطعننا من وراء ظهورنا
صبا قامت ماسكه رقبتها كنها بتخنقها : اعترفي تحبين ولا لا ؟ ليه يعني تجيج طريات وتمدحين فيهم ,, اكيد شايفه احد وخبص لها قلبها .. اقول يمكن اهل الامارات .. فدوى هاتي النعله بسرعه ..
شالت فدوى شبشب البيت الصغير حقها وهي تضحك واستلمت ضرب خفيف في ديم ... اللي تكح وتضحك بهستيريا بنفس الوقت .. تترجاهم يتركونها وتحاول تفك نفسها ,, واخيرا يتركونها لما يتغلب عليهم ضحكهم من سخافة الموقف
ديم تصلح نفسها : يااربيه شنو هذا .. وجع دفاشة ,, شعري خرب ياقرويات
فدوى : احسن ... عشان تتأدبين

!!!!!!!!!!!!!