إلى ذوات الخبرة ريحوني الله يريحكم

مشكلتي تزوجت من واحد مطلق وعنده ولد
ام زوجي لمن جات تخطب قالت ان الولد بيعيش عندهاا .
أناكنت احسب الولد زي اي طفل امه وابوه منفصلين عن بعض يكون عند امه
واخر الاسبوع يشوفه الاب
بس مع الايام اكتشفت حاجات وكنو أحد يصفعني على وجهي عشان أصحى
الولد عمره بداية ماملكنا 3 سنين
كان عند امه بس الغالب الاب يجيبه عنده
تعلق الولد بابوه مرة واتنينتهم يحبو بعض
حب مو طبيعي
المهم اكتشفت ان الولد مدلع من ابوه وجدته مرة
يعني لاحد يقول له لا ولا يصرخ عليه كل شي يبغاه يجي لحده
هناك عندهم شغالة حماتي منتبه له مررة
طبعا انا اتعامل معاه عاادي
يعني مااحب احتك فيه كثير فكنت اطنش اقول بكيفهم
مع الايام الاب يزيد تعلقه بولده
حملت فصار يقولي انا ابغاه يجي يعيش معانا عشان لايصير تفرقة ولا يغاار
من اخته
وصار يجيبه اوقات البيت عندي
و ينام عندنا عشان يتعود ويخليه هنا علطول
الولد دحين عمره 5 سنين
ماشاء الله عليه نبيه وزكي مرة
يعني اي مشكلة او شي بيننا بيتقال لامه ولاهل ابوه
انا دحين عندي بنت حقت 3 شهور
والاب بدا يجيبه ينام
المشكلة انو الولد من شدة تعلقه بابوه يبغى ينام معاه وبالوسط كمان
جبنا له سرير برضو مصر يكون الاب جنبه علطول
ويقعد يسوي ازعااج ويتدلع ويبغى كل شي
طبعا الام الحقيقية ماتتحمل هذه التصرفات!!
فمابالكم بزوجة أب
ويعلم الله اني احب الولد ولا أعامله الابما يرضي الله
بس تصرفات زوجي سببت لي مشكلة كبيرة
المشاكل اللي امر فيهاا اثناء وجوده :.
الاب يطنشني بالمررة ويعطي كل الجو لولده
يقعد يتكلم معاه حتى لو انشغل الولد شوياا يناديه ويقعده جنبه ويتناقش معاه
باي شي
يعني انا ولا كأنو ليا وجود
ويخاف على مشاعر ولده اكثر مني
انا بينت له انو غلط كدا لازم تعدل انا كدا اغاار
غير كدا الدلع المفرط بيخرب الولد
بس يقولي هذا ولدي
انا دحين مو عارفة كيف اتصرف امنعه انو يجيبه او اخليه براحته
واقعد مقهورة وأحرق بحالي
بصراحة تعبت من مشكلة الولد وتعلقه الزايد بابوه والدلع المفرط
والله انو من الدلع الولد صار طفشان ومو عارف ايش اللي يبغاه
علما بانو مايرضى يروح لامه لانها ماحبته ولاعطته الحنان
والام برضو ماتسئل عنه الا مرة بالشهر
ابيكم ترشدوني للصواب لو انت في مكاني ايش تعملي ؟؟
تمنعيه من انو يجيبه للبيت ويخليه عند جدته ويشوفه هناك
منعا من الغيرة وتصرفات زوجي الغلط
او اني اتحمل واجيبه واخدمه مع انو دا الحل مرة صعب
يعني بكون مش مبسوطة وبتصير مشاكل بيني وبين زوجي
بس اداء واجب لاغير
علما بانو يوميا من العصر الين المغرب بيكون معاه
مع ولده والله انو يتعامل معاه كاحسن اب على وجه الارض
بس برضو يحس انو مقصر
انتظر آراائكم ...