ابهري ضيوفك بألذ قهوه بخلطتي السريه

السلام حبيباتي طبعا بعضكم مستغرب يقول في نفسه وش هالبنت الرايقه من اللي ما يعرف يسوي قهوه وراح اجاوب طبعا كل الناس القهوه يومي في بيتهم بس الفرق هل ضيوفك لاشربوا فنجالك قالوا ياه هذي القهوه اللي تقند الراس........ قولي وش سرك ؟
انا بقولها حبيباتي السر يكمن في المكونات وانا راح اشرح طريقتها بالتفصيل عشان حتى اخواتنا العربيات يتعلموا قهوتنا المره ههه
وعشان اخواني العزابية اللي متغربين عن أهلهم
عمري اولآ اكبر خطأ تقع فيه معظم النساء هي انها تفوح ماء قهوتها بنفس ابريق القهوه اللي بتطبخ فيه القهوه
وهذا خطا لازم تفوحين الما قبل بفواح الما او الغلايه الكهربائيه الين يفوح بعدين تحطينها بقدر القهوه او المفواح حق القهوه ، المقادير نص ابريق القهوه ماء
ثانيا البن قلبي افضل حمسه هي الوسط يعني اذا رحتي للمحمصه قولي ابي بن بري حمسه وسط والقهوه البريه هي افضل الأنواع ، حطي فنجال ونص حسب حمستك اذا وسط حطي كذا واذا غامقه فنجال واذا خفيفه حطي فنجالين
ثالثا حاجه تاخذينها من العطار اسمها الشيبه او الشنه حاجه مجففه لونها رمادي مايل للأسود تحطين على القهوه وهي تطبخ ع النار من الشيبه قليل بس بين اصابعك
رابعا الزعفران فيه ناس تحطه اخر شي بدلة التقديم او الدفايه او الزمزميه وكلها مصطلحات تعني الأنيه التي تقدم بها القهوه للضيوف ولكن طريقتي انا هي استعمال زعفران خاص تلقينه عن محلات هضيم المشهوره لها فروع بكل مناطق القهوه قوليلهم ابي زعفران هضيم اللي لها مسمى ثاني هو الخلطه الملكيه الممتازه للقهوه بالهيل والله يابنات تصبغ قهوتك حيل تحطين على القهوه وهي تطبخ ملعقه او اكثر او اقل حسب رغبتك بس ملعقه تكفي لانها تصبغ على طول اللي ماتلقى الزعفران تقدر تستخدم زعفران الأعماق بس تطحنه مع الهيل احسن
خامسا ترك القهوه تغلي على النار لفتره كافيه بعض الحريم يستعجلون عليها وهذا خطا لازم تطبخ على النار اقل شي عشر دقايق وهذا لاصرتي مستعجله انا اخليها ربع ساعه او 25 دقيقه على نار هاديه
سادسا التقديم عمري لازم بعد ماترفعون القهوه من النار لازم تترك شوي قبل ما تحطينها بآنية التقديم عشان يركد البن تحت وتصير قهوتك صافيه خليها تقريبا دقيقتين او ثلاثه تكونين وقتها قمتي بطحن الهيل وهنا الأهم اغلب الناس يقومون بطحن الهيل بكميات وعند التقديم يحطونه جاهز وهذا اكبر اهدار لنكهة الهيل لازم ماتطحنينه الا عند التقديم تاخذين المقدار اللي يكفيك وتطحنينه وتحطينه بآنية التقديم وتزلين القهوه عليها وكل وحده تتبع ذائقتها وذائقة ضيوفها من المطيبات عويدي قرفة شوي زنجبيل شوي والله ياهو رهيب لاتستغربون حطو طازج شوي بس يعطي القهوه لذوعه شوي تستطعمها بس ماتقدر تحدد ماهيتها
واخيرا اقولكم خلوكم من ذا الدفايات اللي تجيب أكزيما بالمعده ههه
مافي احسن من الدله تسافربك لعالم ثاني وأهلا بكم في الخطوط الجوية العنزيه ههه
المهم اصنعي هذه القهوه ومن ثم
وش كنت اقول ايه ومن ثم تلذذي بأحلى قهوه بحياتك سويها بحذافيرها وادعي لوالدي الله يرحمه بالجنه الله لايسامح اللي تسويها وما تدعيله
وانتظر ردودكمم
منقوول
مرحبا انا تقريبا نفس الطريقه اسووي ويالييت كل وحده تدخل تقول لنا وش طريقتها علشان نستفيد من بعض