ابي اتزوج ابي اعيش مرتاحه

1. السلام عليكم ورحمة الله

السلام عليكم ورحمة الله

بصراحه شفت ردودكم مع كل الاخوات اللي عندهم مشاكل .. والله يصبر قلوبهم ويآآجرهم .. وحبيت انكم تشاركوني مشكلتي .. حتى لو انكم ما ساعدتوني يكفي اني افضفض واقول اللي بخاطري ..ا
نا عمري 23 سنه .. عندي 3 خوات و3 اخوان وعايشة مع امي .. والوالد الله يرحمه توفى من كان عندي 8 سنوات ..مشكلتي بدت من كان عمري 8 سنوات .. عشت بدلع ابوي اللي كان يميزني عن باقي اخواني .. ولما توفى الحال كله انقلب ضدي ..زوجة اخوي لا بارك الله فيها كانت تتفنن بتعذيبي .. ضرب اهانات بصق بوجهي والله والله ان خالي كان يترجاها ويقول لها اني صغيره وكانت تتطاول حتى على اخوي .. مشكلتي الحين مع من؟مع امي واخواني وخواتي ..امي جابتني وهي كبيره بالعمر .. جابتني بعد 6 .. اكبرهم عمره الحين 44 سنه واصغرهم عمره 32 .. وانا عمري 23 .. يعني فرق كبير وايد بيني وبينهم ..اخوي الكبير متزوج العقربة الظالمة اللي قلت لكم عليها وعنده منها بنتين وولدين .. واقم بالله ان مو مهتم فيني ولا بعمره سألني محتاجه شي والا خلصتي من السوق او اي شي .. وبناته من الظلم اللي شافوه من امهم جاو يشتكون لي يقولون لي يا ليت لو ابونا يطلقها وانا قلت لهم هذي امكم وعيب هالكلام مع ان بيني وبين نفسي ودي لها بالموت مو الطلاق وبس ..واخوي الثاني مغرور وما يحب اي انسان يكون افضل منه .. اما الاخير والله طيب طيب وايد وحنون ..وخواتي .. الكبيره ما تسأل فيني والثانية الثالث مجننيني .. طبعا 44 عمر اكبر اخواني يعني اكيد انتبهتو ان عمر امي مو صغير .. امي عمرها 60 سنه .. يعني انا بالنسبة لها بزر .. وخواتي الله يجزيهم خير مسوين مشاكل بيني وبين امي ..قسم بالله انا احبها وهم بكثر ما يقدرون يوضحون لها انهم اللي يحبونها وانا اكرهها .. تعودت لما اجي من اسلم عليها عادي .. ومن فتره كنت ابي اضحك معاها سلمت عليها وهم موجودات.. قلت لها شخبارها الورده ؟ والله عشان قلت لامي كلمة ورده صارت مشاكل تخيلو اختي تتهزأ بي جدام امي وتقول لها .. هي تبي فلوس والله ما قالت ورده من قلبها ..وغير هالشي والله والله انا موظفة اجي من دوامي تعبانه المفروض ادور الفراش وينه وبس من التعب .. والله ارجع البيت وعلى طول ادخل المطبخ اسوي الغدا واحيان اسوي كيكة او اي شي .. وبعدها ابي انام ارتاح .. قولون لي قومي ودي امي السوق .. طيب انا تعبانه ابي ارتاح .. ليش انتو ما تروحون يا اخواتي؟؟ قال والله انتي اللي عايشة بهالبيت مو احنا .. طيب هي مو امكم ؟؟ وبعدين خواتي يوميا زياراتهم لبيتنا من الظهر يتغدون عندنا لحد الساعه 10 او 11 بالليل .. كيف مو عايشين بالبيت .. يقولون لأمي كلام عني عشان تكرهني .. امي قلبها بدا يغلظ علي وتكرهني .. هي تشوفني بزر .. وتشوفهم هم الكبار العاقلين .. قسم بالله تعبت نفسيتي .. وغير هالشي .. تقدم لي شخص من طرف زوج اختي وانا عمري 17سنه .. الصراحه شخص طيب واخلاق وملتزم .. بس من يوم شفته بالنظرة الشرعية ما ارتحت له رغم ان مطوع .. ومن غير ما اصلي استخارة رفضته .. ورفضته اكثر لما كان شرطه الوحيد ان ما اكمل تعليمي الثانوي .. وبعدها بشهرين تقدم لي شخص ثاني من عايلة مرموقه .. بصراحه شفته وارتحت له وايد ..وشنو اللي صار ؟؟طبعا اختي الكبيره خبرت زوجها عنه وهو اللي راح يسأل عنه .. والريال طلع ملتزم وخلوق ومافيه شي ينعاب ..اخوي الثاني عصب على الكل .. قال ما ابيها تتزوج واحد من اهل زوجتي .. هذي تبي تفشلنا جدامهم .. هم ناس اتكيت وراقيين .. واختي الثانية قالت لي اكيد بينكم علاقة وتعرفينه والا ليش ترفضين اللي من اهل زوجي وترضين فيه .. وانا قسم بالله ما اعرفه .. تخيلو انها اتصلت له جدامي وقالت له انا مستعده ادور لك غيرها .. والله والله ان قلبي احترق .. لكن مانزلت دمعه جدامها ولا جدام احد ,,وهذا الشي صار يتكرر بكل واحد يخطبني .. واحيان كانوز يرفضون اللي يخطبني قبل لا يسألوني .. يرفضون ناس انا ما اعرف ولا شي عنهم .. وحجتهم لا هذا خليجي ولازم تاخذين بحريني .. والا هذا غني واكيد بيذلج .. والا والا والا .. وقسسم بالله ما ياخذون رايي الا بالشخص اللي انا مليون% راح ارفضه .. بعدها قلت خلاص لحد هنا وكفاية واي شخص يخطبني بوافق حتى وان كان مو متربي ... مو يقولون الحرمه هي اللي تصلح بيتها .. انا اصلح بيتي اهون من العنوسه .. وتقدمو لي شخصين بوقت واحد .. الاول عمره 26 سنه .. جلست معاه وشفته بالنظره الشرعية وسبحان الله اخلاق ووسيم وما عليه كلام .. حتى ان جارتنا تعرفه وتمدح فيه - على فكرة مو هي اللي جايبته- والله والله ان الريال اخلاق .. واختي هنا شقالت .. ؟؟روان هذا يفشل قصير ... لا يغرج شعره اللي لكتفه .. ترا اقرع .. حرام عليها وربي وربي طوله عادي لاهو قصير ولا طويل .. وشعره مافيه شي ينعاب .. كل هذا قهر ؟؟راحت كلمت الشخص و الشخص هذا قال لها انا بصراحه سألت عنها وبعطيها مهر باللي اقدر فيه وهو بس 4 الاف دينار يعني 40 الف ريال .. قالت له اختي والله من بدايتها بخل؟؟ طيبلاانا راضية انتو شتبون مني ؟؟؟والرجال من بعد هالكلام لا عاد اتصل ولا نعرف عنه شي .. اما الثاني .. وقفت بوجه اهلي مو عشانه الا عشان ما اعنس وبس .. حط لي شروط بصراحه حسيت ان ما بتحملها .. كانت شروطه ان يتزوجني بعشرين الف ريال ويسكني ببيت اوبه بغرفه منعزله عن البيت .. وطبعها لا حفلة زواج ولا حتى شهر عسل .. قلت مابيه .. انا مابي اشرد من ضيم اهلي عشان اطيح بهذا الشخص .. وربي تعبت من تصرفات اهلي .. ليش يكرهوني ؟؟ ليش يعاملوني بهالطريقه ؟؟ مو كأنني بشر ما كفاهم الابتلاء اللي جاهم من الله بعيالهم المعاقين ؟والله تعبت من عيشتي .. لا زوج .. ولا خوات يحنون علي .. ولا ام قادره توصل لعقليتي الصغيره على قولتهم ..حاولت اتقرب من امي ... بس عندي خوات ما اقول الا الله لا يبليكم باللي مثلهم واسمحوو لي طولت عليكم