اسألكم بالله العظيم انكم تعطوني ارائكم انا بنص الطريق اكمل او لا تعبت كثير وانتم الحل

1. طول عمري كنت اتمنى الزواج والاستقرار


2. ومن هالكلام ماقد تقدملي واحد زين

السلام عليكم
مدري صراحه كيف ببدأ لكن ابي اقول لكم قصتي بالتفصيل ارجوكم طولوا بالكم علي واقراوا قصتي وساعدوني انا مالي الا اخت وحده واصغر مني وتدرس بعيد مو عندنا وعلاقتي معها يعني مو ذيك العلاقه فما لي غيركم
اعتبروني اختكم او صديقتكم وعلموني وش الحل
انا بنت عمري 24سنه ماقد تزوجت من قبل ادرس بالجامعه لسه ماتخرجت والحمدلله حلوه بشهادة الجميع وقبيليه مو بناقصني شي وهذا بفضل ربي

طول عمري كنت اتمنى الزواج والاستقرار

طول عمري اتمنى اعيش في بيت يشاركني رجال فيه يكون بالنسبه لي كل شي زوجي وحبيبي وصديقي واخوي وكل شي يحبني ويخاف علي ويكون عقلاني كثير يفكر بعقل ويتصرف من عقل ويدافع عني ويحميني ويسعدني ويحن علي ويهنيني ويعوضني عن ابوي
اللي كنت دايما احس اني بدون اب
كان مايجلس معي ولايسولف معي ولايحس فيني وبس شغال اوامر باوامر ودايما يهاوشني باسباب وبدون اسباب ويظلمني في كثير من الاحيان ماادري ليش
بس ابوي بشكل عام قاسي مع الجميع مو بس انا بس انا احس اني اكثر وحده بالبيت ودايما عماتي وعمامي يقولون الله يعينكم عليه ويصبركم
المهم انا وابوي مو اصحاب من زمان وهذا الشي تعودت عليه وماعاد يشكل لي اي مشكله هالموضوع
نرجع لموضوعنا زي ماقلت لكم كنت اتمنى الزواج كلمت خطابه وساعدتني اكثر من مره وكان ابوي يرفض
مره بحجة انه احنى من شيوخ القبيله ولازم اتزوج ولد شيخ مثلي ومره يكون اللي متقدم فعلا سمعته مو زينه يشرب او اخلاقه زفت او راعي سجون او مايشتغل

ومن هالكلام ماقد تقدملي واحد زين

وبيني وبينكم لاتزعلون مني حبيت بعد مره او بلاش اكذب عليكم مرتين حبيت في حياتي وكان حب شريف اقسم بالله ماابي من وراه الا الزواج بس ماصار الاول اختلفت معاه بعد سنتين والثاني كان يوعدني ومايجي بسبب ظروفه ودراسته برا
مالكم بالطويله واعتذر اذا ازعجتكم بس انا ودي تعرفون اهم الاشياء وصدقوني جالسه اختصر بما فيه الكفايه
ومره من المرات وكان هالكلام قبل سنه كنت بالسوق وكان في شاب لاحقني ماعطيته وجه كعادتي لكن ماتركني ابدا واخر شي لما شاف انه مافي امل مني رمى رقمه بالكيس اللي معي وراح
انا نسيت السالفه بس لما رجعت البيت شفت الرقم ولاتزعلوا مني الله يخليكم اخذت الرقم وقلت ايش وراي خليني استانس واتسلى مثل ماهم يتسلون فينا دقيت وبدت العلاقه ماكملت شهر ولما شاف اني محترمه بالكلام معاه ومؤدبه ومافكرت ارسل صورتي ولااسوي اي شي مو زين ولامقابلات ولاهالحكي الفاضي عجبته عرض علي الزواج وقال انه عرضه علي بعد ماعجبته من ناحية الشكل لما شافني بالسوق وعجبته بالاخلاق ولاني صغيره بالعمر ومن نفس قبيلته وانه ماكان يفكر بالزواج ابدا الا لما عرفني المهم تقدملي وابوي اعجب فيه رغم انه مو ولد شيخ زي ماابوي كان يشترط بس يمكن النصيب ابوي كثير اعجب فيه وكلمني عشانه ووافقت قلت بعقلي هذا الحب الصدق رجال حبني وتقدملي رغم اني ماحبيته عادي كان بالنسبه لي
لكن امي ماكانت تبيه بحجة ان اهله حيل بدو مو مثلي ومثل اهلي متحضرين وانه ماديته مو زينا لا شوي على قده
بس حاولت فيها انا وكنت اتهاوش معها كثير عشانه وبعد شهرين ثلاثه وافقت قالت خلاص اذا انتي مقتنعه براحتك وماابي امنعك وبكره اذا تاخرتي بالزواج او ماتزوجتيه تلوميني المهم ملكنا وليتنا ماملكنا طبعا وانا وياه مستمرين بالمكالمات بدون علم اهلي بس بعد الملكه صاروا يعرفون انه نكلم بعض الا ابوي لانه كان رافض وعذره يقول المكالمات تسبب مشاكل كثيره
والحين صارلي 8شهور مملكه واربع وعشرين ساعه مشاكل انا وياه مو راضي يفهمني ولاانا راضيه افهمه ومشاكلنا جدا تافهه وهو اللي يخلقها هذا غير انه كل يوم له راي وكلمه اليوم يقول موافق على الشي الفلاني بكره برفض اليوم يخليني قمه عنده وثاني يوم يخليني بالقاع متقلب بقوه ومزاجي بقوه وبس يقول امك ماتحبني امك للحين ماتحبني وامك وامك وابوك مو راضي يساعدنا بالتكاليف وماادري ايش
وكل يوم يهزئني وانا ماخليت وسيله الا واتخذتها معاه مره اصير شديده ومره لينه ومره اكبر عقلي ومره ابكي قدامه ومره مااعرف ايش ومافي فايده
انا مااقول انه كل سيء هو سمعه الحمدلله زينه ولايشرب ولايتعاطى ولا له بالمعاكسات كم مره اختبره مع بنات ولاكان يعطيهم وجه ابدا واهله ناس الحمدلله زينين
ودايم يقولي انا ابيك تعرفين كل شي من الحين ماابي اكذب عليك ابي اكون واضح معك بس انا مو قادره اصبر خلاص تعبت نفسيا اقسم بالله كل يوم ابكي واصيح طلبت منه الطلاق اكثر من مره بس هو رافض يقول انه يحبني
بس انا مو قادره اتحمله عصبي جدا ومزاجي وماله كلمه وافكارنا غير عن بعض وعاداتي غير عن عاداته انا اهلي وحياتي شوي فري بحدود يعني هو لا متزمتين شوي وبدو زياده عن اللزوم
وهو يبيني زي اهله رغم انه كان عارف حياتي شافني قبل لكن الحين صار يحتج ويرفض
وانا ماقدر اتحمل هالحياه انا ابي انسان حياته زي حياتي ويسمحلي بالمعقول مو كل شي يرفضه بالبس بالطلعات باللي مااعرف ايش
غير اني فعلا بديت من الحين اعاني من ماديته يمكن لاني ماتعودت ومادية اهلي افضل بكثير لكن مايقدر يأمن لي نص اللي ابيه وانا تنازلت عن اشياء كثيره عشانه بس مااقدر خلاص
لاطبعه ولااسلوبه ولامزاجيته ولاماديته ولاتفكيره وعقل مافي بعد مو عقلاني ابدا
تعبت كثير اقسم بالله وش رايكم يابنات اسألكم بالله تساعدوني ادري طولت عليكم صار فيلم لكن لاتخلوني قولو اللي تبونه بس لاتجرحوني بالكلام
اكمل معاه ولا اتركه هو يقول انه يحبني حيل ورافض يطلق بس زي ماقلت لكم ماخليت طريقه حاولت اتفاهم معاه بس بدون نتيجه مشاكلنا كل مالها تكثر وتزيد وعلى قلة سنع وهو غير متفهم ابدا ومايحاور بس شاطر يهاوش ويهزء ومايحترم وانا سامحته كثير بس لين متى
يعني عشاني طيبه يتصرف معي كذا ولا كيف بالضبط؟
وش غلطي بالضبط ؟ او لاني قبلت بشخص اقل مني بكثير من جميع النواحي الماديه وغيرها وبالعادات وبكل شي
او ايش بالضبط
الله يخليكم فكروا بكلامي وردو علي بالله عليكم ريحوني بنجن تكفون ربي يريحكم ويسعدكم .....
ومشكوره.
اعتذر عن الاطاله