اتمني الفائده للجميع

السلام عليكم ورحمه الله وبركاته ..,
مبارك عليكم الشهر .. وكل سنه وانتم بالف صحه وسلامه ..,
حابه اقلكم الي صارلي اليوم ..
الي صار انو شعري مره مره يتساقط بشكل فضيع وناشف ومو طويل يعني الله يعلم بحالو
الحمد الله علي كل حال المهم سمعت عن الدكتور عباس الشيخ عمر في مسشفي بخش بجده طبعا
ورحتلو وشاف شعري وقالي فعلا فروتك تعبانه بس الي مستغربه منو قالي انتبهي انتبهي انتبهي
من حمامات الزيوت !!! والله مره استغربت قالي مهما سويتي فيها ماراح تجيب نتيجه وهيا السبب
الرئيسي لتساقط الشعر وسالتو قلتلو معقول كل الناس يستخدموها وتجيب معهم احيانا نتيجه قالي
طيب وفتح الدرج تبعو وطلعلي قطره وحطها علي يدو قالي هيا راقبيها من هنا لبكره شوفي البشره
راح تمصها ولا لا وبالفعل قعدنا فتره والقطره زي ماهيا مامتصتها البشره ولا شيء قالي كذا برضو
فروه الشعر لايمكن تمتصها الفروه بس الشعر الي يشرب زيت وعلي الفاضي وبصراحه اقتنعت
في كلامو لاني من جد ليه فتره طويله وانا ازيت ولايبان شيء والله احسو ينزل بزياده ..
بس حبيت اقولكم انو مهما تسوا من حمامات زيوت فهو خساره وتعب علي الفاضي وهذا مو كلامي
وبس هذا كمان كلام الدكتور وماشاء الله عليه مره معروف وخبرتو عاليه ..
وقالي كمان عشان تستفيدو الخضار والفواكهه هذي اهم شيء والي شعرها مره يتساقط تتروش
مره وحده في الاسبوع علي شعرها والي عادي مرتين بس .. وقال كمان انو عادي تستخدمي اي
شامبو لاكن المهم انك تستخدمي الي مكتوب عليه ( للشعر العادي ) لاتستخدمي غير هذا وبس
واهم شيء يكون شامبو لوحدو من غير الماسك او اي شيء معاه ..
وكمان الكريم تسخدمي الكريم الي غطاء العلبه حقو احمر هذا قديم بس مره كويس افضل من برشوت
وصانسيلك وهذي الكريمات وانتبهو كمان من بديل الزيت الي يجعد الشعر مره مره مو صحي
ولاكويس وطبعا الاستشوار .., والله والله يبنات هذا الي كتبتو كلو كلام الدكتور ومنبهني عليهم
وحبيت اقولكم عشان تتنتبهو من الزيوت هذي ويارب تعم الفايده علي الجميع ..,
طولت عليكم اسفه ..,