ادخلو ابي نصايحكم

1. اول مشاركة لي اخواتي معكم وتكفون حبايبي ابي نصيحتكم لاختكم المجروحة


2. ببدأ قصتي ومعاناتي مع اهل زوجي

السلام عليكم ورحمة الله وبركاته

اول مشاركة لي اخواتي معكم وتكفون حبايبي ابي نصيحتكم لاختكم المجروحة

ببدأ قصتي ومعاناتي مع اهل زوجي

طبعا انا عشت طفولتي بمشاكل عائلية دائمة بين امي وابوي وجدتي ام ابوي وابوي متزوج وحده ثانيه غير امي ومن بعد زواجه منها نسي امي وعيالها حتى ملابسه اخذها من دولاب امي ووداها لدولاب زوجته الثانية من احنا صغار يعني قبل 30 سنه والله يابنات مشاكل ما تخلص لدرجة كنت ابكي من كثر ما اشوفهم يتخاصمون بصوت عالي لدرجة ابوي رمى الطلاق على امي مرتين ويضربها باستمرار لدرجة كنت اشوف الدم بظهر امي الحبيبة وجدتي كانت تثير الفتنة الله يسامحها تخيلو الوضع كذا من بعد زواجه لدرجة كبرت وما احس اي طعم لطفولتي من اللي شفته طول السنين وكرهت الزواج وطاريه قلت ما ابي اتزوج ويصير فيني مثل ماصار لامي وكنت ارفض الخطاب وابوي دايما يهزأني ويقول انتي كبرتي في السن ايش تنتظرين والمصيبة يقولي عمرك 35 سنه وانا عمري 27 اصلا المهم الله قدر وقسم لي نصيب و اتزوج واحد يقرب لابوي طبعا انا كنت رافضة بالبداية وخايفة كثير لكن قدر الله وما شاء فعل وتزوجت بعد الدعاء والاستخاره
طبعا زوجي ماشاء الله عائلته اكابر وانا من طبقة فقيرة وكانت هنا معاناتي الثانية مع اهل زووجي
اهل زووجي امه واخواته وزوجات اخوانه من بعد الزواج ينظرون لي باحتقاار والله من اول ما رحت عندهم بعد زواجي اخذت لامه واخواته هدايا حاولت اتقرب منهم علشان ما اعاني زي ما عانبت في طفولتي خاصة انو ام زوجي كانت تسمع بالتشتت الاسري بين امي وابوي لانها تقرب لابوي وعندها خلفية عن هالاشياء فكم تمنيت القى معهم الراحة والامان اللي تمنيته من سنين طويلة الله يسامحك ياابوي عيشتنا بخوف ورعب من بعد زواجك الثاني قلبت حياتنا لجحيم لكن سبحان الله ما نفع معاهم شي ام زوجي تتكلم على حالت اهلي المادية وتناظرني باحتقار وتستصغرني من بين حريم عيالها والعكس مع حريم عيالها الباقي تحترمهم وتقدرهم وتثني عليهم لانهم من عواائل غنية يلعبون بالفلوس لعب حتى انها مرة قالت انو زواج ولدها مني ماهي مقتنعة فيه بس النصيب جبرها و غيرها كثير لو اكتب لبكرة ما راح اخلص الله المستعان
مرت السنة الاولى والثانية و الثالثة مافي حمل وبدأت الثانية مع اهل زوجي
واسمع اشكال والوان من التجريح لدرجة قالو لي عقيمة وما فيك امل وحريم اولادهم بعاملونهم كأنهم ملكات كل وحده معاها 2 و3 اولاد وطبعا عندهم عشق فضيع للاولاد حسبي الله ونعم الوكيل وانا شهريا من مستشفى للثاني وتمريخ واصناف من التعب والمعاناة والحمدلله على كل حال
والحمد لله ربي كتب لي الحمل بعد 4 سنوات زواج وجبت احلى بنوته بعمليه قيصرية لانها وضعها مقعدي
ربي يحفظها لي يارب ياكريم وتخيلو من بعد ما جبتها بنوته زعلت ام زوجي لانها تبي ولد لولدها
سبحان الله ايش هالتخلف وقالت لي ماقدرتي تولدي طبيعيو بديتي بعمليه يعني حدك 3 او 4 عمليات وتقفلي ويمكن يكونوا كلهم بنات وبكذا راح يكون عذر للزواج لزوجي مره ثانية انا بينت اني انا راضية باللي يكتبه لي ربي واذا فكر زوجي بكذا راح ابيعه مثل ما باعني وانا بيني وبين نفسي اقول ياخوفي يصير فعلا هالشي وتعيش بنتي مثل ما عشت انا قبلها من مشاكل وتشتت اسري رحماك ياربي
المهم انا اروح لهم مرتين بالاسبوع لكن نفسيتي مره تعبانه منهم وما ابي اروح لهم لكن زوجي يصر علي اروح خاصة انه من النوع اللي يتأثر بكلام اهله فأتحمل علشان بنتي ما ابيها تتعقد من اي خلاف بيني وبين ابوها
الحين قولو لي كيف اتصرف واروح لناس يحتقروني ويستصغروني ويتجاهلوني كمان مايسولفوا معي والله اكره روحتي لهم والله احس بملل وكآبه فظيعة عندهم يارب ارحم حالي