الحل يا اهل الخير

السلام عليكم ورحمة الله وبركاتة
تقبل الله صيامكم وقيامكم ..
لي صديقة متزوجة لها 4سنوات تقريبا..وعندها طفلتين وحدة عمرها 3سنوات والثانية 7شهور
المهم ..
هي من بداية حياتها لاحظت على زوجها انو بارد او يمكن مزاجي لكن كان عطوف ورومانسي نوعا ما معاها وكانت علاقتهم الزوجية طيبة..
مع الوقت بدءت تلاحظ انو صاير مرة عادي شي صايبو زي التبلد ..تتزين تتلبس ما تحرك فيه شعرة
تقول لو اوقف قدامو زي ما ربي خلقني ماتتحرك في شعرة..الا ازا جت وطلبتو بطريقة غير مباشرة ساعتها يعطيها حقها..
ويا ريت كدا على قول المثل اقشع وارقع .. حتى ما يفكر ازا هي استانست وياه وبعدها يقولها اسف ما قدرت امسك نفسي ويقوم يتسبح وبعدها يحط راسو وينام زي الايه..
وتعاني انو طول وقتو يقضيه على الشيشة اكثر منها ..ولما تقولو ما يصير كدا يقولها طيب اجلسي معايا وانا اشربها لكن تلقاه موجود ومو موجود جسد بلا روح
انسان فاقد للرومانسية تماما ..اخر مرة قالتلي انو سافر حق يومين يسوي عمرة وهو طبعا من قبل السفر ما لمسها ..يعني المفروض يرجع مشتاق لها ..تقول هدا رجع ودخل عادي حتى ولا سلم عليها قصدي
ولا قلها وحشتيني وهي في اليومين دي ما اتصلت عليه قالت عشان يشتاق لها اكتر ..يا حسرة عليها
وتقول هم الان رح يكملو شهر ما مس منها شعرة والادهى من كدا انها في الوقت الحالي بعد كم صدمة اخدتها وكم مشكلة عدو بيها ..
كرهتو وماعادت تبغاه ..وصارت تنفر منو يعني حتى فكرة انو يجيها ماعاد صارت تتقبلها كل ما تجي الفكرة في بالها تتقشعر ..وهي تخاف الله ..
انا قلتلها ليه ما تتصارحي معاه ..وتفهمو انو هي لها حق عليه ولازم انو ما يحرمها تقول حاولت كم مرة لكن مافي فايدة ..
وزوجها من النوع الكتوم والدكتاتوري ما يتقبل الكلام اللي زي كدا من مراة
وهي دحين تبغى تطلب الطلاق لانها ماهي عارفة لاهي مطلقة ولاهي معلقة ..زوجة مع وقف التنفيذ
معلومة هي قبل كدا طلبت الطلاق منو وساومها حريتها مقابل حرمانها من اطفالها..
وكل مرة يوصلو لطريق مسدود وما يلقو غير الطلاق انسب حل ..هو ما يرضى يطلق وهي مرة متعذبة ماهي قادرة تعيش حياتها وهي قادرة تسعد زوجها ..
افيدوني في هذا الموضوع ..