الحياة اول الزواج بلاحب هل ستستمر ردودكم

1. مرحبا يافراشات

مرحبا يافراشات

يقولون الشكوى لغير الله مذله وانا اقول انه (مليون مذله بعد ) ماقلنا شي بس من باب الفضفضة لااكثر ولا اقل
انا متزوجة من 8 شهور ونص تقريبا ومشكلتي اني ماحبيت زوجي من ايام الملكه وانا مدري وشلون وافقت عليه يمكن خوفي من اني اكبر ماتزوجت وانا عمري 24و هو شاب ماعليه عاش يتيم من صغره خلوق عن ماسمعنا عنه والعائله اكثرهم ملتزمين وطيبين لكن الولد فيه عيب الدخان و مقطوع من شجرة له اخوان من ابوه وله اخوان من امه وله شقيق واحد لكن علاقتهم شبه معدومه كل واحد بمنطقه وحتى الي بمنطقه وحدةمايتواصلون تخيلوا خواته رحت لهم مره وحدة اول ماتزوجت غير كذا مايوديني ابد ليه مدري هو بس يروح لهم انا لا ابي اعرف ليه ؟
سالته مرة عن علاقته بهم وعصب وقال شي مايخصك مهب لازم تعرفين بعدها فشلت ولاعمري ذكرت اهله الا مرة اخته بتتزوج قلت نهديها هدية ورفض براحته لكن انا ابي اعرف شي عن حياته عجزت انسان غامض لابعد الحدود حتى الزواج والملكة تخيلوا هو بس وابوه واخوه جانا ليه مدري
الحريم مافيه ولااحد لازواج ولاملكه ماجونا انا صراحة حزت بخاطري وتحطمت يوم زواج ولدهم ولايجون مسويه كوشه وفستان وميك اب متكلفه عليهم لكن وش اسوي جاملت وسكت وقابلتهم بوجه بشوش اول مرة شفتهم وغيرها ماعمرة وداني لهم والله افكر واقول احسن لي واريح لهم
انا متعجبه من حالهم لاني ماعرف العائله غريبه عنا لكنهم من نفس ديرتنا وكل من سمع عنهم يقول ونعم فيهم
انا الحين عشت معه قرابة تسع شهور ولاشفت منه الا الخير ولاصار حمل لاني كنت اخذ مانع حمل اول خمس شهور بعدها وقفت والحين مالله كتب لنا وهو متحمس لكن انا عندي تناقض بين امرين ابي طفل يملي علي حياتي لكن مشكلتي مااحب زوجي هو طيب وحنون وكريم والحمد لله حالتنا الماديه حليوه بس المشكله هواني عجزت احبه دايما اسمعه كلمة احبك وماقدر استغني عنك لكن مجامله والله مجامله يمكن فارق التعليم بيني وبينه هو معاه متوسطة وبعدها دخل العسكريه وانا جامعيه ومثقفه الحمد لله بشهادة الجميع يعني احيانا افكر واقول انا خسارة عليه احسن منه بكل شي قسم بالله احيانا يجيني تفكير اطلب الطلاق واروح لاهلي لكن اذا تذكرت امي واخواني وشلون مصيبتهم يوم فاتحتهم اول زواجي بهالموضوع الي صاح والي خانقني والي قال حرام عليك الرجال رجال مافيه عيب و تعوذت من ابليس واتذكر اني ابعيش هناك عند امي واخواني بمنه لان ابوي متوفي عساهم يصرفون على انفسهم تبي تجيهم مطلقه وتعيش معهم بعد
والله اني اتندم على حالي وابكي يمكن لو صابرة بيحيني واحد احسن منه بس انا استعجلت حتى امي ماكانت موافقه مبدئيا تقول مامعه شهادة وهو مدخن بس انا قلت وظيفته حلوه مب مهم الشهادة بس عقب الزواج امي شافت الرجال مافيه عيب الا الدخان وصارت دايما تقولي حافظي عليه تراه جوهرة غاليه و رجال ونعم
صح اعترف انه ماعنده سوالف حريم وخرابيط لا والله محترم الحمد لله لكن مشكلته معقد مايحب سوق ولا يحب اذا رحت اشتري غالي مع انه يدفع مايقصر لكن يحاسبني بعدين ويقول حرام
عليك ومن هالخرابيط ووالله انه طيب لكن عجزت احبه والله اني احرصه دايم على الصلاة قلت لعل وعسى الله يفتح قلبي له واركب المنبه لصلاة الفجر يقوم يقفله ويرجع ينام لكن ايام دوامه لا ينقز والله يضيق صدري عليه كم من مرة نصحته ومرة زعلت عليه ولا لقى لي بال يقول انتي قومي وصحيني وانا ودي هو يحس ويقوم ويقومني وش الفايدة اذا انا قومته ابي يصير عنده احساس للصلاة وخوف من الله هو الرجال المسؤل عن رعيته الله يهدينا بس بغيت رجال يقوي ديني الضعيف ويكون لي سند ويعوضني عن يتمي لكن الله مايضيع احد وانا اول مرة اشكي همي لاحد لاني ماحب اشكي ولا لامي لانها مسكينه مابيدها شي غير الدعاء ودايما اقولها ادعي لي واستهبل واضحك عند اهلي اوهمهم بالوناسه والسعاده وانا الله اعلم بحالي
حتى استغفر الله احس ماملى عيني مع انه بنظر غيري وسيم لكن اذا رحت معاه برا عيوني تطيح على الحلوين استغفر الله والله غصب علي
من ايام شهر العسل كنت اشوف المعاريس بماليزيا واقول ايه احلى من زوجي ياليتني ماخذته مدري وش لاقيه فيه مع اني شايفته قبل الزواج كنت انتظر بس نرجع السعودية بس واتطلق ماني مصدقه اني ابصبر كل هالشهور
احس حياتي صايرة ممله معه يمكن زيادة لاني ماعرف احد بهالمدينة ولااطلع من بيتي الا لسوق او مطعم
بكرة بنسافر لديرة اهلي واهله والشيطان يلعب براسي اني اروح بلا رجعه واقول فرصة مدام ربي ماكتب الحمل بس اذا تذكرت كلام اخوي يوم يقولي اذا تطلقتي حطي براسك ماراح ياخذك الا رجال متزوج يضيق صدري واجلس الدموع اربع اربع واحس اني ضايعه وافكاري متلخبطة عجزت اتخذ قرار مدري وش ابي لكن ماحس بالسعادة احس حياتي قبل الزواج اريح مااحس بالحب احس عايشه بلا حب والله صعبه تعيشين مع شخص بلا حب ارحمه احيانا لكن ماحبه
الله يعين بس ويفرج عنا وعنكم
هل هالحاله اللي امر فيها طبيعيه ومريتوا فيها والا لا لاتطنشوني يابنات ابي جوابكم بكل صراحه؟
واسفه على الاطاله ..........