الرجال من المريخ و النساء من الزهرة بنكهة كويتية خالصة

مساء الخير على أحلى فراشات..
وصلني هذا الموضوع عن طريق الإيميل ،، وبصراحة عجبني مرة ،، وحبيت أفيدكم فيه ... وأهني اللي كتب الموضوع لأن أسلوبه جدا رائع ..
موضي و مشاري متزوجين صارلهم اشهر بسيطة .. يعني الميانة .. ليلحين ما طاحت بينهم عدل ..
ذاك اليوم اثنينهم مشتهين ياكلون بمطعم .. بس المشكلة انهم ما يدلونه عدل ..
فقالوا خل نطلع وبعدين نلقاه ..
المهم .. اطلعوا .. ( مشاري اللي يسوق ) ، ويفترون و يفترون ويفترون .. و مضاوي حست ان
مشاري ضايع و مو دال المطعم .. قالتله : " ليش ما تسأل ..؟" ( طبعا اهو لو تموتون ما يسأل )
فقال " الحين دقايق و نوصل " ..
وفعلا .. دقايق و اوصلو المطعم .
الوضع بالنسبة لنا كلنا طبيعي .. ، لكن بالنسبة لموضي ماكان طبيعي ، لانها حست ان مشاري
تغير عليها ، يعني مو ذاك مشاري اللي ينكت و يضحك .. كأنه اكو شي حاصل عكر مزاجه .. .
واهي مو عارفة اشفيه ! ..
طبعا اذا انتوا متابعين وياي .. اكيد عرفتوا السبب ..
اللي حصل ان موضي كانت لما قالت حق مشاري : "ليش ما تسأل "
اهي كانت عند نفسها اتقول " انا احبك و اموت فيك ، و خذ هذي النصيحة مني " .
لكن مشاري لما سمع كلمتها .. سمعها : " انا ما اعتقد انك تقدر توصلنا المكان اللي نبيه
خل غيرك يدلينا " .
هالامور ماكنا نقدر انعرفها لو احنا ما زرنا المريخ و لا الزهرة ..
في المريخ .. الانجاز مهم جداً ، فتخيلوا اشلون كان الوضع عند مشاري ..
كان لازم يوصل المطعم بدون محد يساعده . بالنسبة للمريخيين تقديم النصيحة لهم اهانة عودة ..
ما اترقع .. ، الطريقة الوحيدة اللي ما اتزعل فيها المريخي .. انك ما تنصحه الا اذا اهو طلب منك
النصيحة .
اهني الزهراويات لا يزم ينتبهون .. الحين مشاري في وضع " لا يحسد عليه " .. حس انه في موقف
ضعف .. بالنسبة له الوضع ( انا ما اقدر انجز ، انا مو كفو المسئولية الخ .. ) .
فمو تروحون و اتزيدون الطين بله .. ، لا حزتها فرصتكم انكم تعبرون عن اعجابكم فيه ، حتى لو باشياء تافه ، طريقة مسكته للسكان ، او سلاسة سواقته .. او اي شي .من هالقبيل ..
وومكن جداً انكم تسكتون يالزهراويات .. و تحسون انكم مستمتعين بالرحلة ..
وهذا ترى بروحه راح يعطي انطباع انكم فعلا مرتاحين و تثقون ب مشاريكم .
عموما ، لما المرة تنصح الريال .. اهي ترى ما اتحس اشكر النصيحة هذي تعبر حق الريال انها ما
اتحبه .. ، حتى لو اهي اتحبه و اتموت فيه .. بس النصيحة للمريخي تعتبر اهانة وردة فعله ترى
ممكن تكون قوية على نصيحة بهالطريقة .
وبالنسبة للرياييل ، اهم شي عندهم اهو الانجاز .. حتى لو كان انجاز شي بسيط ..
ويمكن تستغربون لو اقولكم ان الاشياء الصغيرة بالنسبة للريال اهم من العودة ..
لانه اهو اشلون يفكر ؟
هو يقول ، اذا اهي ما تثق فيني في موضوع صغير .. اشلون راح تثق فيني في موضوع عود
ومهم !؟ .
كل اللي يحتاجه المريخي .. هو الحب على جميع الاحوال .. ما يبي نصايح و لا نقد .
طيب و الزهراوية شنو تبي ؟
انا اقولكم ..
الزهراوية ودها تقعد مع المريخي ، تسولف ، تشاركه بمشاعرها .. شنو صار اليوم شنو المشاكل
اهو تلاقونه عباله انها قاعد اتشكى ، فاهو بعد ما يجذب خبر .. يعطيك الحلول السريعة مالته
سوي جذي ، لا تسوين جذي ... شوفوا هالموقف بين مشاري و موضي ..
موضي توها ياية من الدوام متاخرة شوي ..يالله بدلت و انزلت الصالة ولا مشمش قاعد ..
موضي : اوف .. اليوم لوية عندي الف شغلة اسويها و ماكو وقت كلش ..
مشاري : شالله حادج ، طلعي من هالدوام وارتاحي ، منتي محتاجه راتبهم .
موضي : لا بس انا احب شغلي .. بس اليوم كل قطو الشغل كله علي انا ..
مشاري : خليهم يولوون ، سوي اللي تقدرين عليه و خلي الباجي حق يوم ثاني .
موضي : اي انا هذا اللي سويته .. اوف نسيت ادق على امي مواعدتها ..
مشاري : مو مشكلة عمتي حبيبة .. ماراح اتقول شي .. دقي عليها بعد شوي .
موضي : لا امي هالايام وايد تعبانة .. نفسيتها كلش تعبانة اهي محتاجتلي !
مشاري : اشدعوة .. ماكو اللا العافية .. انتي اللي شاغله بالج زيادة عن اللزوم
وهذا اللي مخليج كله ضايق خلقج و متكدره .
اهني موضي عصبت ..
موضي : لا انا مو متكدرة وضايق خلقي ! انا بس ابيك تسمعني ..
اهني مشاري مستغرب من الطلب ..
مشاري : و انا اشقاعد اسوي .. انا قاعد اسمعج ..
موضي : اوه ..خلاص خلاص ..
طبعا موضي صارت متضايقة اكثر .. و مشاري هم متضايق لانه ما يدري اشفيها موضي
ازعلت ، مع العلم انه حط حلول لكل مشاكلها ..
وطبعا .. مثل ما كان الموقف الاول مال المريخيين معروف سببه بالنسبة لنا .. هم هالموقف المفروض يكون معروف سببه بعد ..
واللي ما عرف يتابع ويانا
في كوكب الزهرة .. محد يعطي حلول او اجابات لما احد يسولف .. ، ينطرونك هالزهراويات
ليت اتطلع كل اللي بجبدك .. و تفضفض تفضفض لين تخلص كلماتك .. .
فعيب جداً ان الزهراوية تقاطع زهراوية ثانية .. وهي تفضفض ...
مشاري الله يهداه .. لو انه عارف ان السالفة جذي .. جان انحلت المشكلة وياه ..
المهم انا بلغته نيابة عنكم .. عن السالفة هذي .. و اطلعت ناجحة 100 % ..
كل اللي عليك انك تسمع حق الزهراوية .. و اتعاطف وياها قدر الامكان .. لانها يا ولد الحلال
مو قاعد اتشكى .. افهم يا مريخي يا بعد جبدي .. مو قاعد اتشكى .. تبي تشاركها في
يومها .. لا اكثر .
عاد ذاك اليوم مرني مشاري وقالي شصار معاه لما فهمناه القصة ، و طبق الطريقة :
يقول مشاري : ردت زوجتي ذاك اليوم من الدوام متأخرة شوي ..
موضي : اوف .. اليوم لوية عندي الف شغلة اسويها و ماكو وقت كلش ..
مشاري : اي الله يعينج يا عمري .. امبين عليج تعبانة .
موضي : مادري شسوي يا ربي .. قطو علي كل الشغل مرة وحدة .
مشاري : اوف كل الشغل ! .. الله يعينج .
موضي : اي والله ، حتى نسوني ادق على امي ..
مشاري : لا...... ( وهو عاقد النونة ) ..
موضي : اي والله ، عاد امي تعبانة و حالتها النفسية تعبانة .. و اهي وايد محتاجتني ..
حاسة اني كشت فيها ..
مشاري : لا يقلبي .. انتي حبيبة و مستحيل تنسين امج .
طبعا عقب هالحوار .. اللي تم .. موضي حست انها مرتاحة نفسيا .. و حست بعد ان مشاري يحبها
وايد لانه قاعد يسمع لها ..
ومشاري حس انه كل شي تمام ، لا و حس انه مستانس لانه شاف اشلون موضي مستانسه
عليه لانه قاعد يسمع لها بس .. يعني مو اكثر من جذي .
لا تنسون الموضوع باللهجة الكويتية ،،أتمنى ينال استحسانكم
قراءة ممتعة