السينابون من إيد أسيرة الكويت

السلام عليكم ورحمة الله وبركاته
اليوم مسوية طبق ( من ايدي) وان شاء الله يعجبكم يارب..
وطبعاً عندي نصائح لكم يا البنات وخاصه منكم يا المتزوجات..
لا تعلمون الخدامه كل شي خلي كم طبق من ايديج عشان زوجج يذكرج فيه وتكون لج لمستج الخاصه
وطبقنا اليوم الكل يعرفه ويشتريه من المجمعات ويحبونه ( انا ما ذقته ) ولكن هالطريقه اخف وألذ وان شاء الله تعجبكم
وألحين ابدي اكتب لكم المقادير والطريقه
للعلم انا مو كاتبها من كثر ما اسويها حافظتها فبكتب لكم على طريقتي وانتوا لكم الحرية
المقادير:
استكانه ( فنجال شاي) ماي
استكانه ( فنجال شاي) زيت دلال ( اي نوع دهن عندكم)
استكانه ( فنجال شاي) سكر
ملعقتين أكل دارسين ناعم
6 قطع جبن كيري
حليب نستله صغير
صمون هوت دوغ
نص زبده
قمير ( قشطه ) العلبه العادية
كأس\ كأسين سكر ( على حسب الرغبه)
وللزينه
اللوز او الجوز
الطريقه:
نخلط مكونات الاستكانات ( الفناجيل) بالخلاط الكهرباي مع الملعقتين الدارسين
ويصير شكله مثل هالصورة..
وبعدين نقطع الصمون اربع اجزاء وناخذ الوجه البني له ونغمسه بالخلطه مو كله بس اشوية ونصفه في البايركس
بعدين نحط بالخلاط بعد ما تغسلونه الجبن كيري والنستله وينخلط زين لما يصير كريمه وتاخذون بالملعقه صغيرة وتصبون على وحده وحده كمية صغيرة
بعدين نحط البايركس في الفرن لمده 7 دقايق ونطلعه... في هذا الوقت نسوي التوفي
طريقه التوفي يا حلوات انه ناخذ طابي ( طنجره اي كان اسمه بس مو من النوع اللي تلصق) ونصب الكأس من السكر فيه ولازم على نار هادية ولا تعلونه مهما طولت العملية لانه يبيله صبر وقلاص ماي بارد لانه سبب لي هبوط كذا مرة من حراره النار..قلبي السكر بملعقه من خشب لين يذوب نهائي وحركه دائمه عشان لا يتماسك ولما يذوب خلاص حطي الزبده وحركي بسرعه ولما تذوب حطي القيمر( القشطه) وحركي بسرعه لانه الحين لاح يصير تش وممكن يحرقج اشوي انتي ديري بالج..وراح تصير معاج كتل لا تخافين وقلبي بسرعه لين يرخي ويذوب مرة ثانية وبعدين هم كملي وقلبي وقلبي لين تشمين ريحه حلوة مثل الكيك او الحلاو
بعدين نصب على الكيكه اللي بالبايركس وانتي وابداعج عاد بالحركات والصب
وهذي شكلها بالنهاية...اتمنى انها اعجبتكم
وأي سؤال انا حاضرة...
ولا تنسوني بصالح دعائكم