الله كريم ان شاء الله

مرحبا حبيباتي
كيفكم اليوم ؟ ان شاء الله تمام ؟
بنات صراحة ما راح الف ولا ادور معكم انا كنت محتاره من قبل بالموضوع اللي جايتكم فيه
ويعلم الله اني من النوع الصبور والحليم بشكل ماتتخيلونه
واحترت اشكي واطلب المشورة والا اكتمها بقلبي جمرة تحرق بجوفي بس بصراحه احس اني مظلومة
بقوة وبنفس الوقت ظالمة والله ما ادري انا ظالمة والا مظلومة بس ابيكم تساعدوني
انا متزوجة لي سنة واربع شهور احب زوجي واموت بتراب رجلينه ويعلم الله اني ما فيه شي ما سويته
عشان بس اقدر ارضيه من اول ماتزوجنا وانا كل شهر احتفل انا وياه ودايما اسوي له مفاجآت
واهدي له هدايا لكن هو ؟ ولا مرة دخل علي يفاجاني بهديه غير مرة كنت انا زعلانه منه كانت
بيننا مشكلة وهو اللي كان غلطان ومره للعيد والحين انا طالعه من نفاسي صار لي شهر تخيلوا يا بنات
من قبل لا اطلع من نفاسي وانا متفقه انا وياه انه بمجرد ما اطلع من نفاسي اروح انا وياه اشتري لي طلاعه
ويوم طلعت من نفاسي لا سفرني ولا شي ورحت معه انتداب من دوامه لقريه تخيلوا والطلاعه قال لي
معليش ضروفي الماديه صعبه اصبري شوي وهالكلمه لاعت كبدي منها ولا عاد اقدر اتحمل اسمعها لانه من يوم
انا وياه بشهر العسل وانا ما اسمع الا هي عند اي شي ابيه منه وانا مستنزفني نفسيا وماديا رغم اني
مو موظفة ولاشي والله من تزوجنا ما عطاني مصروف ابد ما انكر انه قبل لا اولد ولدي ما كان يقصر
بس احسه تغير من يوم جبت ولدي صار يمن بكل قرش علي بنات انا ادري انني ببداية حياتي انا وياه
بس على قولة المثل اللي هذا اوله ينعاف تاليه اذا من اول مشوارنا في الحياة يشتكي من مادته اجل
شلون بعدين ؟ اذا الحين مادللني ودلعني متى اجل ؟ انا تعبت تعبت وقلبي بدا يعورني انا متغربه عن اهلي
ومحرومة من امي وابوي واخواني عشان خاطر عيونه ولا مره شكيت منه ولا مره حسسته انه مقصر معي
يعلم الله صبرت عليه صبرت صبر ما احد كان راح يتحمل انه ما يتدلل وهو ببداية عمره وحياته
بس قولوا لي شاسوي شاسوي ؟ والله محتاره ؟ لا وكله كوم وانه يدخن من وراي كوم ثاني هو على
باله اني مو عارفه بس اشم ريحته دخان ويسوي نفسه برئ وكم مرة المح له اني شاكه ولا فكر يعترف
شلون اتصرف معه ؟ اذا هو من الحين ما يصارحني ولا يقاسمني شي ؟ ولا يصرف علي زي الناس رغم ان وظيفته ممتازه اجل بعدين شبنسوي دلوني تكفون ؟ انا ما ادري يستغل طيبتي او انا اللي مو قنوعه
اسفه اني طولت عليكم بس من حرتي والله