الله يرحمك يا الغالي

السلام عليكم ورحمة الله وبركاته
ماني عارفة من فين ابدا بس لاني في غربة وصحباتي اللي ارتاح اتكلم معاهم بعيدين عني وزوجي ماقدرت اوصله للي احس فيه لان بكل مرة احسسه انه هوا السبب وتصير مشكلة مع اني مو قصدي..
انا الحمدالله ولدت شهر خمسة اللي فات بامريكا وكان زواج اخويا بالصيف ورتبت سفري للسعودية عشان فرح اخويا وهوا كذا مرة كلمني عشان يتاكد اني باحضر الفرح...
هوا اكبر مني بس انا وهوا ملكنا باسبوع واحد وكنت مرة فرحانه عشان الشي هذا .. اخوي متوظف وراتبه ع قده ولما خطب المهر اللي طلبوه اهل العروسه اكثر من خمسين الف غير الفرح وكان له سنتين وهوا يقدم على بنك التسليف وكل مرة يجيب كفيل ما يتم الموضوع الين تعب نفسيا وكلم البنت انه مستعد يطلقها وتشوف نصيبها ، هذا فوق التعب النفسي اللي جاه من امها الله يهديها .. المهم امي بعدها حاولت تجمع فلوس من هنا وهنا واولاد اعمامي وخالاتي كمان استعدوا بالمساعدة باللي يقدروا عليه وامي حجزت القاعة وطبعوا الكروت ..
انا وقتها كنت ليا ستة شهور متوظفة ومبتعثة من شغلي والحمدالله عندي مبلغ طيب بالحساب لاني ما كنت استخدم الراتب
كلمت زوجي اني اكفل اخويا عشان السلفة ما رضي مع العلم اني اخويا مستحيل يخليني ادفع ريال وهوا اللي راح يسدد
بعدها امي كلمتني اذا ابغا اساهم بمبلغ زي ما كل العيلة سوت انا كنت بدفع خمسة الاف زي اختي واولاد عمي بس زوجي وما رضي قال مافي الا خمس مية، قلتلوا اخويا لما ملكت جاب لابويا الف ريال وهوا وقتها ما عنده قال طيب ارسلي الف .
طبعا انا في خاطري ان هاذي مي مساعدة مجرد اني رديت الالف حقتوا ، بس ما اتكلمت قلت نسوي الفرح ونفرح اخويا وبعدين نتحاسب ...
بعدها ولدت قيصري واخدت من الكلية اسبوعين اجازة وبعدها رجعت واختبرت النهائي وراجعة فرحانه اني خلصت..
في نفس اليوم زوجي بلغني بوفاة اخويا بحادث وهوا رايح جدة يسلم ع صاحبه ويعزمه ع فرحه ...
ما شفته ليا سنه ولا شفته قبل الدفن ولا حضرت عزاه ، اخر مرة سمعت صوته لما خرجت من المستشفي يقولي ترا بنتك لولدي ويقولي انه مو قادر يصبر ع شوفة بنتي وشوفتي ....
صارلي زي الصدمة استرجعت كل شي صار بحياتي معاه اتذكرت كيف كان ابويا ما يحبه لانه اخويا من امي وكيف كان دايم يقول هذا مو اخوكم ولا اسمع في يوم ان وحدة فيكم تساعده ولا تكفله في حاجة
مع انه يوم جا زوجي يخطبني ما في احد من اخواني استقبله الا هوا ولما اهل زوجي عزمونا ع العشا بعد الملكة ابويا ما رضي يقوله عن العزيمة يقول بيقشلني مع الناس ...
الين هذا اليوم احس بالذنب وكل ما اشوف بنتي اتذكر انه ما شافها ابكي ..
وفوق هذا انا راتبي اسوي فيه جمعية مع اخو زوجي عشان لا اصرفها وقبل كم شهر كان وقت استلامي الجمعية واتفاجا ان زوجي سلف اخوه الفلوس .. قلبي اتقطع ع اخويا اللي ما رضيت اعطيه فلوس يتزوج والحين زوجي يسلف اخوه فلوسي
انا زوجي مو سي بالعكس طيب معايا وهوا قصده ان ما نلعب بالفلوس لان لسا ورانا مسوليات بس ماني عارفة كيف افسر تصرفه هذا ما ابغى اظلمه وما ابغى احمله اللي صار مع اخويا الله يرحمه....
ندمانه على اللي صار واقول الحمدالله هذا نصيبه لانه ما كان مرتاح في الدنيا والناس ما كانت راحمته بس ربي بيكون رحوم عليه اكثر مننا وبيعطيه وبيعوضه بالجنه ان شاءالله ......
مو قادر اشيل احساس الذنب من قلبي احسه انه مات وهوا زعلان مني مع اني ليا كم شهر اتبرع بمبلغ للجمعيات الخيرية صدقة جارية عنه ووصيت زوجي انه الصدقة هادي تستمر حتى بعد موتي بس مو قادرة انسى ..
ان مومنة بالقضاء والقدر وماني معترضه عليه بس كان نفسي اساعد اخويا الله يرحمه وافرحه بس الله ما اراد ...
انا بس ابغاكم تدعوله بالرحمة وتدعولي بالصلاح والهداية واعذروني لو ما رديت ع الموضوع لانشغالي بالدراسة
ونصيحة مني لاني احبكم لاتنامون واحد زعلان منكم من اهلكم الواحد ما يدري متى يموت والاعمار بيد الله سبحانه وتعالى .
اختكم