اقروا مشكلتي واعطوني حلولكم

1. انا اقولكم انتو اقروا قتي بعدين احكموا..!!


2. ياحبيباتي اعطيكم نبذه مخترة عن وضع زوجي واهله.


3. ولا اصر على رايي لعل وعسى يرضى ودعواتكم الله يسخرلكم رجالكم!!


4. ولا ابطل من السفريه خير شر واسفر اهلي اولى منها!!


5. وحتى لما حجز غرفتن قبال بعض زعلت تقول له ما اخذنا غرفتين بينهم باب!!!

بسم الله الرحمن الرحيم.
السلام علكم ورحمة الله وبركاتة.
كيفكم يااخوات وكل عام وانتم بخير والله يجعلها سنة سعيده ع الجميع.
حبيباتي انا عندي مشكلة وابغاكم تحكموا ووتعطوني حل عقلاني يعني كل وحده تحط نفسها مكاني وتحس نفسها هيا احبة المشكلة.
انا زوجي ماشاءالله تبارك الله طيب والحمدلله انسان يخاف الله ومتزن واخلاق لكن تعرفوا مافي انسان خالي من العيوب!!
زوجي مشكلتي الازلة والوحيده معاه ه امه ادري اغلبكم حيقول ها شوفوا هذه عقلها صغير وغيرة و الخ .

انا اقولكم انتو اقروا قتي بعدين احكموا..!!

والله والله والله العظم وربي شاهد على كلامي ليوم الدين. اني ماعندي مشكله بحد ذاتها مع امه!! ولاني من الحريم الي يغاروا من الام!! ويكرهوا ازواجهم يبروا امهاتهم ويدلعوهم بالعكس والله انا الي كنت اساعده واشجعه،، لكن يااخوات الشي لما يزيد عن حده ينقلب ضدة
والله خلاص خلاص قاض بيا ومعد اقدر استحمل ايش الحل!!

ياحبيباتي اعطيكم نبذه مخترة عن وضع زوجي واهله.

زوجي الولد الكبير وماشاءالله البار جدا جدا جدا بامه وهذا شي حلو،، لكن يااخوات متى سرت انقهر واتنرفز لما سرت احسه خوف اكثر من ماهو بر!!
ام زوجي الله يهديها قوية جدا وماسحة شخصية اولادها وبناتها يخافوا منها مااعرف ليه!! والمشكلة زوجي يبغى ينقلي هذا الشعور،، والله واقسملكم بالله العظيم اني احترمها واساعدها واخدمها ولاعمري قليت ادبي عليها لكن مايكفيها!!
وزوجي يبغاني اذل نفسي ليها زي ماهوا بيتعامل معاها وانا ماابغى!! انت ولدها مجبور طيب وانا!!
مثلا يبغاني ل ما اسلم عليها اجري عليها قبل الناس وابوس يدها وراسها!!
اذا مثلا كانت فيدها شغله اخدها منها واكملها واحيانا يحرجني يقولها خلاص يا اني هيا تكمل عنك وعاد ماتصدق!! والي يقهرني انها والله فاهمه ومستمتعه!!
اي احد طلب منها شغله مثلا سفتلي طلبت منها شي فهي تكون مضطرة تقوم من مكانها وتجيبيه يقوم بصوت عالي يامرني انا اجيبة عنها وقدام الكل!!
ليه ليه؟؟ ارجوكم ريحوني هذا شي عادي ياناس!! وقيسو عليها كثير المواقف هذه
ياعالم زوجي معايا لحالنا والله مهو كذا!! ابدا مو هذه شخصيته بالعكس طيب وحنون قدام امه يسير ديكتاتوري وكم وكم وكم مره اتكلمت معاه والله احس انه شي مهو بيديه يخاف منها جدا من غير هواه.
ولاتقولولي احمدي ربك مو ساكنه معاك،، والله العظيم كانها معايا في البيت تتدخل ف كل شي في حياتي،،كل مادخل وخرج لازم يعدي عليها وطبيعته يقولها كل شي مع انه مو كذا مع الناس ولا معايا حتى!!
وعارفين الي يقهرني ايش انها ماتحبني عمرها مااتكلمت معايا وواجهتني بس انا اعرف واحس من حركاتها ومن نظراتها وبعدين 5 سنوات كفيله انك تعرفي طبع زوجك وتعرفي وانتي متاكده اذا احد قالبه عليكي!!
والادهى والامر انها لو حست مجرد احساس اننا خرجنا من غير ماناخدها اقسملكم بالله تقلب عليه وتنكد عيشته ولاتستحي مني عيني عينك تبين غيرتها!!
ياويل يجبلي شي ومايجبلها والله العظيم حتى لو ماتحبه بس كذا حب تملك وغيرة!!
الن احس انه سار عنده رعب منها اول سنه زواج منا نخرج ويجلس معايا ونسهر وكانت دايما قالبه خلقتها فيا ودايما احسها حاقده عليا والله العظيم ماكنت اعرف السبب!! لكن بعدين عرفت وسار هوا مسكين يقولي هذه امي لازم اتحملها والله يؤجرني عليها.
والله بعدها قلي شوفي انا بعد كذا مااروح محل الا امي معايا ولاسفر الا وها معانا وربي اتحطمت لانها اقسم بايات الله مهي زي اي ام يعني لو انها طيبه وتخاف الله فيا والله والله ماازعل لكنها تعشق التملك وغيورة وحتى ولدها تستغله فوق ماتتصوره يمكن لانها موسعودية اجنبية!!
وربي يابنات لما اسافر اكره حياتي لانها قبل السفر يجي يحطلي قائمة بالشروط( لاتسوي كذا- انتبهي تتكلمي كذا_ لاتمسكيني- امشي جنبها- و الخ) بالله هذه عيشة!!
ولايمكن تقول لا ابدا ابدا ابدا وربي لو انها مريضة ماتفرط في الخرجه،،واذا اطرينا نخرج مع اهلي معزومين وكذا وربي تتمارض وتسوي نفسها حتموت وهوا مسكين قلبه يطيح ويبطل عشان يقعد معاها واقسملكم بالله انها تمثل!!
اي مشوار لازم تجي معانا والله لو بنقضي من السوبر ماركت تجي وماتقصر طبعا في المشتروات،، وهووا لايمكن يفتح فمه،، وعارفين لما يكون مامعاه فلوس يجيني بصوت واطي يقول بالله لاتكثري ماعندي لانه عارف امه والله ماتعرف ولاتقدر!
اذا عرفت انه عندي مخطط ولا ناوية على فكره اقسم بالله تقضي عليها في ثواني،، اولادي حارمتني اسميهم تجلس تحط فراسه وتقنعه يغير رايه بعد مايكون موافق لانها عارفه انه مستحيل يقولها لا وكلامها منزل عليه من السما!!
بيتها تغير الفرش كل كم سنة لانه بفلوس زوجي طبعا،، وانا تجلس تقوله حرام بيتكم طيب والكنب ممتاز وتخليه يغير راية حسبي الله بس!!
البيت الي ساكنه فيه ملك مسجل باسمها وهيا مهي موظفة وماعندها غير معاش التقاعد حق زوجها،، خلال 5 سنوات اشترت سيارتين وكلهم باسمها وطبعا زوجي دافع نصهم وهوا والله العظيم ماعنده سيارة ولا بيت لحد الان،، قريب بدأنا نعمر وياحسرة عمارة مع اهله برضه وحكمت علهم يسجلوها باسمها!!
في السفر اهلي اعطوني فلوس وربي كل مااشتري شي لازم تاخد زيه طبعا ولاتدفع ريال واحد زوجي الي يدفع،، سرت والله مااروح ولا اشتري شي علشانها اذا ابغى شي مع اهلي اروح بالله هذه حركات عاديه ولا انا الشيطان مكبرها فراسي قولولي!!
واخر مشكله بيني وبينه انا فقدت الامل انه ممكن نخرج او نسافر لحالنا وربي ولاعمري سهرت معاه اقسملكم بالله علشان امه لاتزعل
قررت من فلوسي اجمع الين ير مبلغ ونقدر نسافر لو ا سبوعين اي مكان في العالم المهم اغير جووقولت من فلوسي علشان امه.
وكنت ابغى احجز واسويها مفاجاة بعدين خفت لاني ما اضمنه والله مايسوي غيرة او كبيرة فحياته بدون موافقتها. قلت ايش خليني اعطيله هيا على بلاطة.
وكنا في ساعه هدوء وفاء وفتحت معاه الموضوع وقولتله اسالك بالله ماتفتح فمك الين اخلص كلامي ولاترفض بدون تفكير قال خير.
المهم قلتله انا كذا كذا بسوي علشان بغير جو انا طفشانه شغلك اخد كل وقتك واخر الاسبوع مع اهلك،، كل ما اشتهي شي تقول ماعندي ماعندي واشوفك كيف تعطي امك و الخ.
خليني مره وحده فحياتي انبسط واغير جوا وانا عازمتك نسافر اي مكان نغير جوا ،، قام يسوي نفسه مو فاهم موضوع امه سكت ولاجاب سيرتها،، وانا قولت بتكلم يعني بتكلم،، قام قال افكر وكذا بس علامات القبول على وجههه . قومت اتشجعت وقولتله خلا ممكن تحققلي حلمي مره وحده ونسافر انا وانت وبزورت لحالنا،، قال ليه امي مافي انا خلاص
قولت والله حكمل،، قولت ايوة انا عازمتك تقول امك حرام عليك بعد الكلام هذا كله تسوي نفسك مو فاهم،، ترى شي مره غرب،، صحيح الناس تبر امها بس مو بطريقتك انت،، يعني انا كمان لي حقوق وانت مابتقر معاها،، بالعكس اقسم بالله يقر معايا علشانها،، ولا بكل وقاحه تطلب منه ساعات يخرجها لحالها والله والله ولايرضى ياخدني وانا عمري مااتهنيت بخرجه معاه الا وهيا معانا،، الا اذا كنت رايحه لاهلي ولا رايحه مستشفى او عندي عذر شرعي!!
المهم سرت ابكي ومره كنت منهارة من القهر وانفلت و طلعت كل الي فقلبي،، وهوا ساكت ونظراته حزينة لانه يابنات والله العظيم هوا شايف كيف تعاملي معاها وهيا كيف تعاملها معايا وكلامها وتعليقاتها الي زي السم وانا ساكتة علشان تربيتي وعلشانة.
وفهمته الواحد يبغى يسافر نبسط وانا اتقيد بزياده لات سوي ولا تقولي ولا تمش و....الخ
المهم هوا سامع وساكت وانا والله حزنت عليه لاني احسه هوا فاهم هذا كله لكن مو بيده الله يعلم اش تسوي فيه علشان خاف منها قد كذا!! احس نفسه يفرحني ويسويلي الي ابغاه بس يخاف منها.
والله مره سافرت مع اخو زوجي عشت احلى اسبوعين فحياتي نخرج ونطلع ويجلس معايا في البيت كانها هيا الي كانت رادته!!
المهم قولولي ايش الحل!!
استسلم!!

ولا اصر على رايي لعل وعسى يرضى ودعواتكم الله يسخرلكم رجالكم!!

ولا ابطل من السفريه خير شر واسفر اهلي اولى منها!!

والله والله ماتستاهل اني اسفرها بفلوسي والله العظيم،، لانها حتى في السغر مهي من امهات الزوج الي يمسكو الاحفاد ولا ياخدوهم ولا تنام بدري لا رجلي على رجلكم وكل شويه تتصل على غرفتنا زي الي تتاكد ماشردنا!!

وحتى لما حجز غرفتن قبال بعض زعلت تقول له ما اخذنا غرفتين بينهم باب!!!

ياعالم نبغى ندخل سنما قولتله الاولاد نايمين وهيا وقت نومها خليهم عندها ونروح مو قادر ينطقها،، راح قلها ايش رايك مره هي تمسك الاولاد وانا وانتي نروح ومره انتي تمسكيهم وانا وهيا نروح اقسم بالله طالعت فيه بنظره كانها شويه وتعطيه كف!!
ولما شافني اتضايقت وحزنت مسكين حزن عليا وقول نحنا نخرج يوم ونمشيها من مكان لمكان يمكن هي لحالها تكون تعبت وتقول روحو اقسم بايات الله لاحياة لمن تنادي دخلني السنما والاولاد نايمين وهما ماعانا وهيا قبلنا ومن يوم بدأ الفلم مانسمع الا شخيرها!! يعني تبهدل نفسها ولا انها تفرحني وتريح ولداه!! بالله شوفتو زي كذا ياجماعه الخير!!
والله شوفو والي خلقني هذا كله نقطة في بحر من الي انا عايشته معاها.
انسانة ببساطة تحب التملك وتعشق الفلوس وماتحبني تستاهل اتنازل علشانها!!
وللمعلومية لاتحسبوها عجوز لا والله يعني لسه بصحتها 52 سنه (( اخ يا امي ياريت في زيك)).
طولت عليكم ودوشتكم بس قولت افضفض لعل وعسى ارتاح ويمكن تفيدوني بحلولك وارجوكم ادعولي الله يوفقكم.
تحياتي لكم