النوادي الرياضية في مدينة الرياض موضوع لتبادل الخبرات

مرحبا ألوف
كيف الجميع ؟؟؟
يا رب تكونوا على ما يُرام و في أحسن حال ..
الموضوع مبين من عنوانه :
تجاربكم مع النوادي الصحية في مدينة الرياض
و أتمنى تكون كل الردود مُثرية و مفيدة
من حيث أسماء النوادي , مواقعها , أرقامها , عُروض العضويات عندهم
الإيجابيات و السلبيات من وجهة نظرك .... و غيرها
و أكيد حبدأ أنا
الحمد لله ما عندي مشاكل في الوزن
بس بروح الجيم للياقة و الصحة البدنيّة عموما
و برضو لرفع المعنويات و الحصول على جرعات كبيرة من الانتشاء ههه
جد : الرياضة مرة تبسطني و تريح أعصابي
سواءً سباحة أو ماشينز ( أجهزة ) , و أكيد أكيد الكلاسات الرياضية
تجربتي مع أوباجي
موقعه :
بجوار هيف للسيارات في طريق مكة
رقمه :
1
إيجابياته :
تنوع الكلاسات , جديّة المدربات , التزامهم بالموعيد , إجابتهم على استفسار العضوات
يتوفر فيه مراوش , دواليب , حمام بخار , و خدمة مساج , و صالون تجميل , كافيتيريا صغنونه , و كم حاجة ثانية ما انتبهت لها
سلبياته :
هوا مُلحق بعيادات أوباجي للتجميل و هذا الشي أنا أعده إيجابية
يكفي أطمن أشوف سيارة الإسعاف واقفة عند العيادة على طول
بس بالنسبة للعيادات فهوا في ( البدروم ) حقها !!
يعني كتمه شوية و ضيق و إرسال الجوال صعب حبتين
بس جد جد بعد التجربة مرة حبيته و ارتحت له
نظام العضويات عنده :
ما أقدر أفيدكم إلا باللي جربته ( الكوبونات )
7 كوبونات ب 350 ريال صلاحيتها شهرين
يقدر أحد غيرك يستخدمها
و سبق مروا عليا صبايا في المتوسط وزنهم زايد
و حبيت كيف المدربات حافظين أساميهم و متابعين وضعهم تمام
يفتح من 9 الصباح ل 9 المساء
كل يوم عدا الجمعة إجازة
ايش أبغى أقولكم كمان .. ايش .. ايش ... , ايوا
النادي اللي حابة أجربه
المناهل ( في حي السفارات )
ذكريات مرة زمان
بس زرته قريب من ثلاثة شهور تقريبا
و الي أذكره قالوا لي الشهر بألف بالنسبة للجيم
و ما يشمل المسبح
برضه ما أذكر إذا غيري يقدر يستفيد من العضوية أو لا
( عالأقل أيام الدورة الشهرية )
و لا أذكر إذا أقدر أعلق العضوية مدة ما
بس اللي أكيدة منه أنو طوال الأسبوع كلاسات و أجهزة
بس الجمعة أجهزة و حبيت هالنقطة الحقيقة
المسبح عندهم حجربه قريب و أقولكم
عن طريق الكوبونات ( الواحد ب 50 )
رغم إني متخوفة شوية لانهم ما يطلبوا فحوصات و تعبية بيانات
و لما قولتلهم هالملاحظة قالوا : 16 سنة و أبدا ماسبق عانينا من أي مشكلة سواء مع كبار أو صغار , عرب أو أجانب
بس برضه أبقى مترددة و متخوفة
عندهم شغلات كثير للأطفال من 3 سنوات و المراهقين
و عندهم عروض أسعار للمجموعات
( تنس , و باليه , و ألعاب دفاع عن النفس )
بكذا أكون خلصت
و زي ما قولت في البداية أتمنى كل رد
يكون مُثري و مفيد
المساحة لكم الآن