الي يصير معي سحر لو عين لو حسد لو شنو بالضبط

1. السلام عليكم و رحمة الله و بركاته

السلام عليكم و رحمة الله و بركاته

طبعا صايبتني حالة هلوسة هذي الايام و راح اقرب على الجنون لاني بجد متعجبه و مستغربه ... قلت مالي غير قسم المتزوجات اطرح فيه الموضوع و افضفض .. لان جنوني قريب و لا تقولوا لي السحر لو الحسد خرافه مثل ما قالوا لي بعض الناس لان الي يصير معي شي مو طبيعي
ياطويلات العمر انا تزوجت من 4 شهور.. الحمد لله الي ربط بيني و بين زوجي بموده و رحمة و الفه و كل المشاعر الجميله و الحلوه الي لازم تكون بين اي زوجين...ايام خطوبتنا كنا نتمنى يجي اليوم الي ننجمع فيه بسرعه ...
من اول ليلة زواج اكتشفت عندي المشكلة الشائعه و المعروفه حاليا و الي اسمها التشنج المهبلي و اعذوروني لاني كتبت الاسم بس حتى تفهمون مشكلتي عدل... طبعا كانت دمار نفسي تمام لي و لزوجي لاني رفضت كل انواع التقارب الطبيعي... راجعت عدة طبيبات و كل دكتوره تقول الحل بيدج انتي لان هذا مرض نفسي و احنه ما نقدر نتدخل.. طبعا انا ساكنه بأوربا و هذي الحالات نادره عندهم جدا....
عطوني مخدر و مرطب و حبوب تهدي الاعصاب و عطوني تمارين ما تنفع اساسا بس قالوا جربي ... زوجي ابتعدت عنه و صار عندي وقت النوم كابوس مزعج اشيل همه ..... مرت فترة شهر و شوي حسيت من جديد بتحرك مشاعري تجاه زوجي لكن هو كان مبتعد تماما و انا اعذره لاني صدمته اكثر من مره و صديته... حالتنا صارت معكوسه زوجي ما يحس فيني و انا احس فيه عكس اول و شي طبيعي عصبيته زادت عن اول بشكل مو معقول... يعني الزعل و الغضب على اتفه الاسباب.... مرت الايام و دخلنا بشهرنا الرابع و طبعا احنا مخبين على الكل مشاكلنا حتى المشاكل الخاصه....
جلست معاه قبل اسبوعين ... شرحت له وضعي الصحي و اني محتاجه مساعدته و انه يطول باله ... حتى تكلمت عن ابتعاده عني ... كانت جلسه مصارحه تامه.... هو صدمني من قال انه ما يعرف ليه كان يعصب و ليه ما يحس فيني ... و كمان صدمني من قال انه يحس دائما ببروده برجله اليسار من يكون جالس جنبي و احيان كثير يحس بعيونه تحرقه من يطالعني
المهم تكلمنا و فضفضنا و قررنا نبتدي محاولات بعد ابتعاد دام تقريبا 3 شهور و شوي... و الحين بدت الامور تثير استغرابي
اول ليله عملت عشى خفيف و رومانسي ... و زوجي كان متونس و مرتاح ما اسمع الا رنة التلفون و كان ابوي اله يمد بعمره طلب من زوجي يجي لان واحد من جماعتنه صايره مشكله بينه و بين زوجته و يريد يطلق عافانا الله ... طبعا زوجي توتر بس بالتالي راح لآهلي ... و ما رجع الا قريب الصبح ... انا زعلت كثير بس قلت اوكي المهم نكسب اجر و عادي الايام جايه
بعد يومين ... كمان عملت عشى و كنت مرتاحه مع زوجي حتى اني كنت انكت و اضحك... صار الليل حسيت بتعب مو طبيعي و نعس رغم اني ما كنت مداومه جامعه لان عندي فري و نمت تقريبا 3 ساعات اضافيه الظهر ... زوجي قالي نامي و ارتاحي و بعدين يصير خير ... و النومه نومه لثاني يوم حتى صلاة الفجر فاتتني و زوجي حلف لي انه اكثر من مره صحاني و حاول يقومني بس انا ابدا كاني حالفه ما اترك المخده.... و كمان زعلت و كمان قلت عادي الايام جايه
بعد كم يوم قررنا من جديد... و طبعا الفترات المتباعده مو بيدنا لان انا طالبه و هو يشتغل و دوامنه صباحي يعني من السته و نص لازم نكون صاحين حتى نفطر براحتنا.... المهم طلب زوجي عشى من بره و طبعا طلب مني من العصر انام و اشبع نوم... و انا ماصدقت نمت و ارتحت... على التسعه باليل و كنا عاملين جو ما سمعنا الا صراخ قوي و خبط على الباب ... والله رعب حتى اني من الرعب صابتني حمى و ارتفاع حراره لان كنت خايفه لا يكون صاير شي عند اهلي ... طلع جارنه الله يسامحه متخانق مع حرمته ولم علينه امة لا اله الا الله... طلع زوجي من الشقه مرتبك و من الارتباك لبس ثوبه مقلوب والله يقولي فكرت احترقنا لو صار شي... طبعا جارنه ساكن جنبنا .. راح زوجي الكريم و دخله و صار يهدي فيه و عمله شاي و قهوه ... والاخ اخذ راحته و صار يسب و يشتم بمرته ... بعد كم ساعه راح الرجل و هدى و دخل زوجي شافني محمومه حتى حسيت ان بطني راح تنفجر ... ليلة ما انساها لاني تالمت فيها و قضيتها بين الحمام الله يكرمكم و بين الهلوسه و الارق... و كمان عدت الليله و انا زعلانه و معصبه على جارنه الله يهدي
و استمرينا على هذا الحال والله على ما اقول شهيد... كلما ننوي يصير شي... مره اخوي يجي بزياره مفاجئة و ينام عندنا و هو اساسا ما متعود ينام بره... مره خالي يجي و ينام عندنا ... و مره عذر شرعي ... و مره و مره و مره
اخير شي البارحه قررنا خلاص ... نسكر الباب و ما نفتح و نشيل فيش التلفون و نسكر الموبايلات ... و كان كل شي تمام تصوروا اني دخلت الحمام الله يكرمكم و اشوف نفسي معي العذر !!!! رغم اني كنت معذوره قبل 12 يوم!!! و عمرها الاخت ما شرفت مرتين بالشهر ولا صارت معاي ابدا ابدا ابدا لاني منتظمه ولله الحمد... انجنيت والله و قلت خلاص انا مسحوره لو محسوده لان مستحيل كل هذي الامور تصير معاي طبيعيه مستحيل مستحيل مستحيل
طبعا الليله الي سبقت زواجي صارت كثير امور غريبه .... انكسرت 5 من الاناره الي موجوده بالصاله من دون سبب... ما سمعنا الا صوت التكسير... الاناره الي في الصاله انطفت تماما والله على ما اقول شهيد حاولوا كثير يصلحوها حتى كنا مضطرين نتصل بصاحب الصاله يجي رغم ان الساعه كانت 2 الفجر و بعد عدة محاولات و تسميه و دعوات مني اشتغلت من جديد
ديكورات كنت عاملتها للكوشه من زجاج تكسرت من دون سبب...
عند باب القاعه تكسرت طاوله زجاجيه من دون سبب
عند باب القاعه تكسر عامود روماني كبير من الخزف كنت حابه اخليه بمدخل الصاله و اخلي عليه صوره لي ... تكسر من دون سبب
و طبعا بعد زواجي بفتره .. تساقط جزء من حاجبي رغم ان حاجبي كثيف و عمره ما حصل هذا الاشكال عندي... و هذا غير المشاكل الي تصير بيني و بين زوجي على اتفه سبب
و الحين يا اخوات يا مجربات... كل هذي الامور عاديه و طبيعيه و انا مزودتها والا في شي ؟؟