بالصور ومن داخل مطبخي طريقة اعداد القهوة العربية فرنش توست للفطور

1. نبدأ اولا بالقهوة العربية

اليوم وانا اعد فطوري قررت اني اصور لكم خطوة بخطوة (ستيب باي ستيب) لفطور مانصر.....

نبدأ اولا بالقهوة العربية

(1)
"اللهم بلغنا رمضان.." دعاء لاتنسونه يااخوان..وكثير من الاخوان مايعرف يضبط قهوة عربية..آخر مرة زرنا فيها ابوحسين..قدم لنا ببسي!! وش ذا الحتسي؟؟ وبما ان قهوتي اللي اضبطها ماخذه سمعة خطيرة... اليوم راح افيد اخواني وحبايبي العزاب كيف يضبطونها..
بداية : لازم يعرف كل شخص ان البن العربي انواع بري ،هريري، جبلي....الخ ومافي شي ازين من شي الناس مزاجات انت جرب الانواع الين تشوف اللي يجوزلك..يعني تروح لراعي القهوة وتقوله ابي بن هريري نص غامق ونص متوسط وخلها يطحنها لك بس يفضل يكون الطحن متوسط يعني مو ناعم(علشان المزاج افهم).
بالنسبة لي انا وقهوتنا لهل اليوم انا اجيبها من محل إسمه: بن بايوني . عنده بن خاص يجيبه حصري له ويقع خلف شارع السويكت.
المقادير
1- ترمس ثلثينه ماء . واذا كان دلة قهوة نحاسية تبي تسوي فيها انك ببر نفس الشي ثلثينه ماء
2- اثنين الى ثلاثة ملعقة هيل مطحون (وماعليك من ذول اللي يطحنون الهيل مع البن تراه قوي بالحيل للشيبان وما فوق)
3- ربع ملعقة صغيره مسمار مطحون
4- ربع ملعقة صغيرة زعفران
5- ثلاث ملاعق كبيرة بُن (عاد حسب النوع اللي اخترتة بس زي ماقلنا لاجا يطحنه يكون وسط مو ناعم ولاخشن)
الاعداد:
إغلي المويه ببريق ..واذا بدا يفوور الماء ..ضع الثلاث ملاعق من البُن عليه..وبعد كذا خفض حرارة الدافور لاقل شي خله يطبخ بروقان ولمدة عشر دقائق.
على بال مايطبخ البُن..نبدأ نعد ترمس القهوة بالمقادير المتبقية..
نحط اثنين ملعقة هيل بالترمس+ربع ملعقة مسمار+ربع ملعقة زعفران ..ونحط عليهم شوية موية باردة ونخلطهم..والسر هنا كيميائياً ماعندي وقت والله اشرحلكم كيميا بس باختصار حتى يتماسكون وينتشر الطعم.
بعد مرور عشر دقايق نطفي الدافور ونخلي ابريق البن المطبوخ لمدة دقيقتين حتى ينزل البُن..ثمن نسكب البن على ترمس القهوة اللي فيها الخلطة مستعينين (بمشخال) زي ماهو موضح بالصورة.
طبعاً الهيل يلعب دور بالطعم فحاول تشوف الكمية المناسبة لك..بس انتبه تكثر مسمار وتسوي فيها راعي بعارين وتزيد الكمية..ربع ملعقة يكفي للنكهة(فليفور)
كذا تكون قهوتك قهوة أبطال ان شاءالله..وانت اليوم اصبحت راعي مضارب بادية ينحسب لقهوتك الف حساب
&&&&&&&&
يتبع