بيتزتي الروعه والسريعه

مرحبا فراشات
هذي بيتزتي السريعه والعجينه شي خيال لاتفوتكم
شوفوا شكلها اول عشان الحماس
وهذي عن قرب عشان السعابيل تقوطر
المقادير تبع العجينة
كاستين دقيق
بيالة زيت زيتون
ملعقه بيكنج باودر
ملعقتين خميرة فورية مذابه في كاس موية دافية
4 ملاعق حليب بودرة
رشة ملح ورشة سكر
وهذي العجينة يابنات استخدموها لكل المعجنات وادعوا لي لاتنسوني من دعاكم بالتوفيق وقولوا الله يوفقك يا ام زياد ههه نكمل
اخطي المقادير الجافه اول بعدين اضيفي الموية والزيت واعجني وخبطي العجينه لين تقول امين السر في كثرة العجن
اذا حسيتي العجينة لينه مرره اضيفي شوي دقيق وكملي عجن
اقسميها نصين
اتركيها نص ساعه تتخمر وخلال هالوقت جهزي الخلطه
بالنسبة لصوص الطماطم انا احط صلصة العلالي على طول بدون ما اسوي لها شي ولا اضيف لها اي شي
صلصة العلالي اللي قوارير قزاز ماغيرها حقت الكبسه وحقت كل شي ألط منها على البيتزا وخلصنا تطلع زي طعم حقت المطاعم
فلفل رومي ملون
بصل مقطع شرايح خفيفه
زيتون اخضر واسود
فطر << احب الطازج أحلى من المعلب
هوت دوق مقطع حلقات
أحلى شي احب اضيفه وهو اللي يميز بيتزتي ورق الزعتر المجفف او تلقونه بأسم اوريجانو
يعطيها نكهة حلوة
خلال تحضير المقادير هذي وتقطيعها تكون العجينة تخمرت
وهالعجينه تسوي لك بيتزتين كبار
خذي النص الاول وافرديه بيدك بالصينية مو لازم فرادة ولا لازم تسوينها دائرة منتظمه
خلي سمك العجينة 1سم
بالنظر مو لازم مساطر
لما تفردينها بالصينيه اتركي مسافه بين العجينة والحافه لانها بتنتفش خلي لها مجال
وبالشوكه خفسي العجينة
وادهنيها بالصلصة وممكن تستخدمين صلصات البيتزا الجاهزة
او تسوينها بنفسك
ورشي المكونات اللي عندك على العجينه
ودخلي البيتزا الفرن على حرارة 350
لمدة 10 دقايق الى ربع ساعه
خلال هالوقت جهزي جبنة الموزاريلا وعلى فكرة يابنات انا اخذ الجبنة بالكيلو مو مبشورة جاهزة لانها تكون ارخص
طالعي من تحت اذا كانت العجينة تحمرت معناته انها جاهزة طلعيها ورشي الجبنة فوقها ودخليها لمدة دقيقتين
وبالهناء والعافيه
النص الثان سويه فيه بيتزا ثانية او مثلي رشي عليها جبنة الطيب مع نعناع مجفف ودخليها الفرن
واو تهبل هالجنه اموت فيها
صحة وعافيه انتظر ردودكم